Vietnam Boat Accident: വിയറ്റ്നാമില് ഇന്ത്യന് വിനോദസഞ്ചാരികള് സഞ്ചരിച്ച ബോട്ട് മുങ്ങി, നിരവധി മരണം
Vietnam Phu Quoc Boat Accident: വിയറ്റ്നാമിലെ ഫു ക്വോക്ക് ദ്വീപിന് സമീപം ഇന്ത്യന് വിനോദസഞ്ചാരികൾ സഞ്ചരിച്ച സ്പീഡ് ബോട്ട് മറിഞ്ഞ് നിരവധി മരണം. കുറഞ്ഞത് 15 പേർ മരിച്ചതായി വാർത്താ ഏജൻസിയായ എപി റിപ്പോർട്ട് ചെയ്തു. 32 ഇന്ത്യൻ വിനോദസഞ്ചാരികളും നാല് ജീവനക്കാരുമാണ് ബോട്ടിൽ ഉണ്ടായിരുന്നതെന്ന് അധികൃതർ.
Breaking Tv9 Malayalam2
ഹാനോയ്: വിയറ്റ്നാമിലെ ഫു ക്വോക്ക് ദ്വീപിന് സമീപം ഇന്ത്യന് വിനോദസഞ്ചാരികൾ സഞ്ചരിച്ച സ്പീഡ് ബോട്ട് മറിഞ്ഞ് നിരവധി മരണം. കുറഞ്ഞത് 15 പേർ മരിച്ചതായി പ്രാദേശിക അധികാരികളെ ഉദ്ധരിച്ച് വാർത്താ ഏജൻസിയായ എപി റിപ്പോർട്ട് ചെയ്തു. 32 ഇന്ത്യൻ വിനോദസഞ്ചാരികളും നാല് ജീവനക്കാരുമാണ് ബോട്ടിൽ ഉണ്ടായിരുന്നതെന്ന് അധികൃതർ വ്യക്തമാക്കി. ഹോൺ മേ റൂട്ട് ദ്വീപിൽ നിന്ന് ആൻ തോയ് പോര്ട്ടിലേക്ക് വരികയായിരുന്ന സ്പീഡ് ബോട്ടാണ് തീരത്തുനിന്ന് ഏകദേശം 400 മീറ്റർ അകലെ വെച്ച് അപകടത്തിൽപ്പെട്ടതെന്ന് പ്രാദേശിക അധികാരികളെ ഉദ്ധരിച്ച് ‘വിഎൻ എക്സ്പ്രസ്’ റിപ്പോർട്ട് ചെയ്തു. അപകടസമയത്ത് കടൽ അതീവ പ്രക്ഷുബ്ധമായിരുന്നുവെന്നും റിപ്പോർട്ടിൽ പറയുന്നു.
വിയറ്റ്നാമിലെ ഇന്ത്യന് എംബസി അപകടവിവരം നേരത്തെ പുറത്തുവിട്ടിരുന്നു. അപകടം ദൗര്ഭാഗ്യകരമാണെന്നും, രക്ഷാപ്രവര്ത്തനം ആരംഭിച്ചതായും എംബസി സോഷ്യല് മീഡിയയില് പങ്കുവച്ച പ്രസ്താവനയിലൂടെ വ്യക്തമാക്കി.
എംബസി പുറത്തിറക്കിയ ഔദ്യോഗിക പ്രസ്താവന:
“വളരെ ദൗർഭാഗ്യകരമായ ഒരു സംഭവത്തിൽ, വിയറ്റ്നാമിലെ ഫു ക്വോക്ക് ദ്വീപിന് സമീപം ഏതാനും മണിക്കൂറുകൾക്ക് മുൻപ് നിരവധി ഇന്ത്യൻ വിനോദസഞ്ചാരികൾ സഞ്ചരിച്ച ഒരു ബോട്ട് മറിഞ്ഞു. പ്രാദേശിക അധികാരികളുടെ നേതൃത്വത്തിൽ തിരച്ചിലും രക്ഷാപ്രവർത്തനവും പുരോഗമിക്കുന്നു. അപകടത്തിന്റെ കൃത്യമായ വിവരങ്ങൾ ശേഖരിച്ചുവരികയാണ്.
അപകടത്തിൽപ്പെട്ടവരുടെ കുടുംബങ്ങൾക്ക് ആവശ്യമായ വിവരങ്ങളും സഹായവും നൽകുന്നതിനായി ഹോ ചി മിൻ സിറ്റിയിലെ ഇന്ത്യൻ കോൺസുലേറ്റ് ജനറലിൽ ഒരു കൺട്രോൾ റൂം സജ്ജീകരിച്ചിട്ടുണ്ട്. +84 36 281 7930, +84 91 552 37 14, +84 33 452 0414 എന്നീ നമ്പറുകളിൽ ഈ കൺട്രോൾ റൂമുമായി ബന്ധപ്പെടാം.
ഹനോയിയിലും ഒരു കൺട്രോൾ റൂം സ്ഥാപിച്ചിട്ടുണ്ട്. +84 91 308 9165 എന്ന നമ്പറിൽ ഹനോയി കൺട്രോൾ റൂമിലേക്ക് വിളിക്കാവുന്നതാണ്. ഏത് തരത്തിലുള്ള സഹായങ്ങൾക്കും അന്വേഷണങ്ങൾക്കും എംബസിയെ സമീപിക്കാം”.
