7th Pay Commission: ക്ഷാമബത്ത വർദ്ധനവ്; കേന്ദ്ര സർക്കാർ ജീവനക്കാർക്ക് എപ്പോൾ, എത്ര തുക പ്രതീക്ഷിക്കാം?

പ്രതീകാത്മക ചിത്രം

കഴിഞ്ഞ മാർച്ചിൽ കേന്ദ്ര മന്ത്രിസഭാ യോഗം ഏഴാം ശമ്പള കമ്മീഷൻ പ്രകാരം ശമ്പളം ലഭിക്കുന്ന കേന്ദ്ര സർക്കാർ ജീവനക്കാർക്കും പെൻഷൻകാർക്കും ക്ഷാമബത്തയിലും ക്ഷാമാശ്വാസത്തിലും 2 ശതമാനം വർദ്ധനവ് അംഗീകരിച്ചിരുന്നു. വർദ്ധനവിന് ശേഷം, കേന്ദ്ര സർക്കാർ ജീവനക്കാർക്കും പെൻഷൻകാർക്കും 55 ശതമാനം നിരക്കിൽ ഡിഎ/ഡിആർ ലഭിക്കാൻ അർഹതയുണ്ട്. നിലവിൽ കേന്ദ്ര സർക്കാരിൽ 48 ലക്ഷത്തിലധികം ജീവനക്കാരും 66 ലക്ഷത്തിലധികം പെൻഷൻകാരുമാണുള്ളത്.

ഏഴാം ശമ്പള കമ്മീഷൻ പ്രകാരം കേന്ദ്ര സർക്കാർ ജീവനക്കാരുടെ ഏറ്റവും കുറഞ്ഞ അടിസ്ഥാന ശമ്പളം 18,000 രൂപയാണ്. പെൻഷൻകാർക്ക് അടിസ്ഥാന പെൻഷൻ 9,000 രൂപയും ലഭിക്കുന്നു. 55 ശതമാനം ഡിഎ/ഡിആർ നിരക്കിൽ, ഒരു സർക്കാർ ജീവനക്കാരന് ഇപ്പോൾ പ്രതിമാസം 27,900 രൂപ (കുറഞ്ഞ അടിസ്ഥാന ശമ്പളം + ഡിഎ) ലഭിക്കുന്നുണ്ട്. അതേസമയം പെൻഷൻകാർക്ക് പ്രതിമാസം 13,950 രൂപയും (കുറഞ്ഞ അടിസ്ഥാന പെൻഷൻ + ഡിആർ) കിട്ടുന്നുണ്ട്.

ALSO READ: ശമ്പള വർദ്ധനവ് എത്ര, ആനുകൂല്യങ്ങളിൽ മാറ്റമുണ്ടാകുമോ? എട്ടാം ശമ്പള കമ്മീഷൻ ഉടൻ, അറിയേണ്ടതെല്ലാം….

സർക്കാർ ജീവനക്കാർക്ക് എപ്പോൾ, എത്ര ശമ്പളം പ്രതീക്ഷിക്കാം?

കേന്ദ്ര സർക്കാർ വർഷത്തിൽ രണ്ടുതവണയാണ് ഡിഎ/ഡിആർ വർധിപ്പിക്കുന്നത്. ആദ്യ വർദ്ധനവ് ജനുവരി 1 മുതലും മറ്റൊന്ന് ജൂലൈ 1 മുതലും പ്രാബല്യത്തിൽ വരും. മുൻകാല പ്രവണതകൾ നോക്കുമ്പോൾ, 2025 സെപ്റ്റംബറിൽ കേന്ദ്ര സർക്കാർ ഡിഎ/ഡിആർ നിരക്കിലെ അടുത്ത വർദ്ധനവ് പ്രഖ്യാപിക്കാൻ സാധ്യതയുണ്ട്.

മാധ്യമ റിപ്പോർട്ടുകൾ പ്രകാരം, അടുത്ത ഡിഎ/ഡിആർ വർദ്ധനവ് ഏകദേശം 3 ശതമാനമായിരിക്കുമെന്നാണ് പ്രതീക്ഷ.  18,000 രൂപ അടിസ്ഥാന ശമ്പളത്തിൽ, 3 ശതമാനം നിരക്കിൽ 540 രൂപ വർദ്ധിപ്പിക്കും. ഇതോടെ ഏഴാം ശമ്പള കമ്മീഷൻ പ്രകാരമുള്ള ആകെ കുറഞ്ഞ ശമ്പളം 58 ശതമാനം ഡിഎയിൽ 28,440 രൂപയായി ഉയരും. അതുപോലെ, 3 ശതമാനം ഡിആർ വർദ്ധനവ്, പെൻഷൻ തുകയിൽ 270 രൂപ കൂട്ടും. ഇതോടെ പെൻഷൻ 14,220 രൂപയായി ഉയരും.