8th Pay Commission: കാലാവധി പകുതിയോടടുക്കുന്നു; അടിസ്ഥാന ശമ്പളം ഇരട്ടിക്കാൻ ഫിറ്റ്മെന്റ് ഫാക്ടർ എത്രയാകണം?
8th Pay Commission Updates: സാധാരണയായി പത്ത് വർഷത്തിലൊരിക്കലാണ് പുതിയ ശമ്പള കമ്മീഷൻ നടപ്പിലാക്കാറുള്ളത്. കഴിഞ്ഞ ഏഴാം ശമ്പള കമ്മീഷൻ 2016 ജനുവരി 1-നാണ് പ്രാബല്യത്തിൽ വന്നത്. ഇതനുസരിച്ച് അടുത്ത ശമ്പള പരിഷ്കരണം 2026 ജനുവരി മുതൽ നടപ്പിലാക്കേണ്ടതുണ്ട്. എന്നാൽ എട്ടാം ശമ്പള കമ്മീഷൻ രൂപീകരിച്ചതിൽ കാലതാമസം ഉണ്ടായി.
എട്ടാം ശമ്പളകമ്മീഷന് വേണ്ടിയുള്ള കാത്തിരിപ്പിലാണ് രാജ്യത്തെ ദശലക്ഷക്കണക്കിന് കേന്ദ്ര സർക്കാർ ജീവനക്കാരും പെൻഷൻകാരും. സാധാരണയായി പത്ത് വർഷത്തിലൊരിക്കലാണ് പുതിയ ശമ്പള കമ്മീഷൻ നടപ്പിലാക്കാറുള്ളത്. കഴിഞ്ഞ ഏഴാം ശമ്പള കമ്മീഷൻ 2016 ജനുവരി 1-നാണ് പ്രാബല്യത്തിൽ വന്നത്. ഇതനുസരിച്ച് അടുത്ത ശമ്പള പരിഷ്കരണം 2026 ജനുവരി മുതൽ നടപ്പിലാക്കേണ്ടതുണ്ട്. എന്നാൽ എട്ടാം ശമ്പള കമ്മീഷൻ രൂപീകരിച്ചതിൽ കാലതാമസം ഉണ്ടായി. ശമ്പള പരിഷ്കരണം എന്ന് പ്രഖ്യാപിച്ചാലും അവയ്ക്ക് മുൻകാല പ്രാബല്യം ഉണ്ടായിരിക്കുമെന്നാണ് സൂചന.
ശമ്പള പരിഷ്കരണം എന്ന് മുതൽ?
മുൻ സുപ്രീം കോടതി ജസ്റ്റിസ് രഞ്ജന പ്രകാശ് ദേശായി അധ്യക്ഷയായ കമ്മീഷൻ കഴിഞ്ഞ നവംബറിലാണ് രൂപീകരിച്ചത്. തുടർന്ന് അന്തിമ റിപ്പോർട്ട് സമർപ്പിക്കാൻ 18 മാസത്തെ കാലയളവ് നൽകി. മുൻകാല കണക്കുകൾ വെച്ചുനോക്കുകയാണെങ്കിൽ, ഇത്തവണ ഏറ്റവും നേരത്തെ റിപ്പോർട്ട് ലഭിക്കുക 2027 ഫെബ്രുവരിയിലായിരിക്കും. കൂടാതെ, മുൻകാല പ്രവണതകളെ അടിസ്ഥാനമാക്കി, ശമ്പള കമ്മീഷന്റെ ശുപാർശകൾ വന്നുകഴിഞ്ഞാൽ, അത് നടപ്പിലാക്കാൻ 2 മുതൽ 3 വർഷം വരെ എടുക്കും. അതായത് 2027 ൽ പ്രഖ്യാപിച്ച വർദ്ധനവ് 2029 അല്ലെങ്കിൽ 2030 ഓടെ മാത്രമേ പൂർണ്ണമായും നടപ്പിലാക്കാൻ കഴിയൂ.
ശുപാർശ സമർപ്പിക്കാൻ നൽകിയിട്ടുള്ള കാലാവധി പകുതിയായി. നിലവിൽ, ജീവനക്കാരുടെ ശമ്പളം, അലവൻസുകൾ, പെൻഷൻ എന്നിവ സംബന്ധിച്ച് വിവിധ വിഭാഗങ്ങളിൽ നിന്ന് കമ്മീഷൻ അഭിപ്രായങ്ങൾ ശേഖരിച്ചുവരികയാണ്. ജീവനക്കാരുടെ യൂണിയനുകൾ, സംസ്ഥാന സർക്കാരുകൾ, കേന്ദ്രഭരണ പ്രദേശങ്ങൾ എന്നിവയുടെ പ്രതിനിധികളുമായി കൂടിക്കാഴ്ചകൾ നടത്തുകയും അവരുടെ നിർദ്ദേശങ്ങൾ പരിഗണിക്കുകയും ചെയ്യുന്നുണ്ട്. ജീവനക്കാരുടെ യൂണിയനുകൾ സമർപ്പിക്കുന്ന നിർദ്ദേശങ്ങൾ കമ്മീഷന് പ്രാധാന്യം നൽകുന്നുണ്ട്. അവയുടെ അടിസ്ഥാനത്തിലാകും കേന്ദ്ര സർക്കാരിന് അന്തിമ ശുപാർശകൾ നൽകുക.
ALSO READ: ജീവനക്കാരുടെ മിനിമം ശമ്പളം 69,000 രൂപ; പെൻഷൻ ഉയർത്താനും ശുപാർശ
ഫിറ്റ്മെന്റ് ഫാക്ടർ എത്രയാകും?
ഇത്തവണ അടിസ്ഥാന ശമ്പളത്തിൽ വൻ വർദ്ധനവ് ഉണ്ടാകുമെന്നാണ് സൂചന. ശമ്പളം ഇരട്ടിയായി ഉയർന്നേക്കാം. എന്നാൽ, അടിസ്ഥാന ശമ്പളത്തിന്റെ വർദ്ധനവിൽ ഫിറ്റ്മെന്റ് ഫാക്ടർ നിർണായക പങ്ക് വഹിക്കുന്നുണ്ട്. നിലവിൽ ജീവനക്കാരുടെ കുറഞ്ഞ അടിസ്ഥാന ശമ്പളം 18,000 രൂപയാണ്. ഏഴാം ശമ്പള കമ്മീഷൻ പ്രകാരം ഫിറ്റ്മെന്റ് ഫാക്ടർ 2.57 ആയിരുന്നു.
എട്ടാം ശമ്പള കമ്മീഷനിൽ, ജീവനക്കാരുടെ സംഘടനകൾ നിരന്തരം ആവശ്യപ്പെടുന്നത് 3.68 ഫിറ്റ്മെന്റ് ഫാക്ടറാണ്. ഇത് അംഗീകരിക്കപ്പെടുകയാണെങ്കിൽ നിലവിലുള്ള കുറഞ്ഞ അടിസ്ഥാന ശമ്പളം 18,000 രൂപയിൽ നിന്ന് 26,000 രൂപ മുതൽ 34,000 രൂപ വരെയായി കുത്തനെ ഉയർന്നേക്കാം. അതേസമയം, സാമ്പത്തിക വിദഗ്ദ്ധരുടെയും സാമ്പത്തിക വിശകലന ഏജൻസികളുടെയും കണക്കുകൂട്ടലുകൾ പ്രകാരം സർക്കാർ ഫിറ്റ്മെന്റ് ഫാക്ടർ 2.86 നും 3.00 നും ഇടയിൽ നിശ്ചയിക്കാനാണ് കൂടുതൽ സാധ്യത.
പെൻഷൻകാർക്കും നേട്ടമാണേ…
ശമ്പള പരിഷ്കരണം നടപ്പിലാകുന്നതോടെ സർവീസിലുള്ള ജീവനക്കാർക്ക് മാത്രമല്ല, കോടിക്കണക്കിന് വരുന്ന കേന്ദ്ര സർവീസ് പെൻഷൻകാരുടെയും പ്രതിമാസ പെൻഷനിൽ വലിയ വർദ്ധനവുണ്ടാകും. അതേസമയം, വരും മാസങ്ങളിൽ കേന്ദ്ര സർക്കാരിന്റെ ഭാഗത്തുനിന്ന് ശമ്പള പരിഷ്കരണവുമായി ബന്ധപ്പെട്ട് നിർണ്ണായകമായ തീരുമാനങ്ങൾ ഉണ്ടാകുമെന്നാണ് സൂചന. നിലവിൽ, എട്ടാം ശമ്പള കമ്മീഷൻ രൂപീകരണവുമായി ബന്ധപ്പെട്ട ഔദ്യോഗിക പ്രഖ്യാപനത്തിനായി ജീവനക്കാരുടെ സംഘടനകൾ കേന്ദ്ര ധനമന്ത്രാലയത്തിന് മേൽ സമ്മർദ്ദം ശക്തമാക്കിയിട്ടുണ്ട്.
English Summary:
8th Pay Commission has crossed the halfway point of its 18-month timeline, with less than 10 months remaining to submit its recommendations. As discussions continue, the biggest area of speculation is the fitment factor, which will determine revised salaries and pensions for central government employees and pensioners.
