EPFO Updates: പിഎഫ് മാറ്റൽ എളുപ്പം ; പക്ഷെ സർവ്വീസ് ഓവർലാപ്പിംഗ് വന്നാൽ എന്ത് ചെയ്യാം?

ജോലി മാറിയിട്ടും നിങ്ങളുടെ പിഎഫ് അക്കൗണ്ട്‌ മാറ്റാൻ സാധിച്ചിട്ടില്ലേ? മാത്രമല്ല ജോലി മാറി അൽപ്പം കഴിഞ്ഞാണ് അടുത്ത് സ്ഥാപനത്തിൽ ജോലിക്ക് കേറിയത് എന്നതിനാൽ നിങ്ങളുടെ പിഎഫ് ട്രാൻസ്ഫറിൽ പ്രശ്നം നേരിടുന്നുണ്ടോ? എങ്കിൽ ഇത്തരം പ്രശ്നങ്ങൾ ഒഴിവാക്കാൻ ഇപിഎഫ്ഒ ഒരു സുപ്രധാന തീരുമാനം എടുത്തിട്ടുണ്ട്.
ജോലി മാറുമ്പോൾ രണ്ട് കമ്പനികൾക്കിടയിൽ ഒരു ജീവനക്കാരൻ ഒരു ഇടവേള എടുക്കുന്നതിനെയാണ് സർവീസ് ഓവർലാപ്പ് എന്ന് പറയുന്നത്. ഇത് മൂലം പിഎഫ് ട്രാൻസ്ഫറിൽ തടസ്സങ്ങൾ നേരിട്ടേക്കാം. ഇത്തരം പ്രശ്നങ്ങൾ ഒഴിവാക്കാൻ എന്തൊക്കെ ചെയ്യാം എന്ന് നോക്കാം

സർവീസ് ഓവർലാപ്പ് എന്താണ്?

ഒരു ജീവനക്കാരൻ പുതിയൊരു കമ്പനിയിൽ ചേരുമ്പോൾ പഴയ കമ്പനി അയാളെ ഔദ്യോഗികമായി പിരിച്ചുവിടുകയോ എക്സിറ്റ് തീയതി പുതുക്കുകയോ ചെയ്തില്ലെങ്കിൽ, ആ ജോലി ഒരേ സമയം രണ്ട് കമ്പനികളുടെയും രേഖകളിൽ രേഖപ്പെടുത്തും. ഈ സാഹചര്യത്തെ സർവീസ് ഓവർലാപ്പ് എന്ന് വിളിക്കുന്നു.

തീയതികൾ തമ്മിൽ വ്യത്യാസം വരുന്നതിനാൽ

ഒരു ജീവനക്കാരൻ ജോലി മാറുമ്പോൾ, അയാൾ തന്റെ പഴയ തൊഴിലുടമയുടെ ഇപിഎഫ് അക്കൗണ്ടിൽ നിന്ന് പുതിയ തൊഴിലുടമയുടെ അക്കൗണ്ടിലേക്ക് പിഎഫ് ബാലൻസ് ട്രാൻസ്ഫർ ചെയ്യണം. ചിലപ്പോൾ പഴയതും പുതിയതുമായ തൊഴിലുടമകളുടെ ജോലി തീയതികൾ തമ്മിൽ പരസ്പരം പൊരുത്തപ്പെടാറില്ല. അതായത്, ഒരേ തീയതിയിൽ രണ്ട് വ്യത്യസ്ത കമ്പനികളിൽ ജോലി ചെയ്തതിൻ്റെ റെക്കോർഡ് ഇപിഎഫിൽ വന്നേക്കാം. ഇക്കാരണത്താൽ, പിഎഫ് ഓഫീസ് ട്രാൻസ്ഫർ ക്ലെയിം നിരസിക്കാം.

ഉദ്യോഗസ്ഥരുടെ ഉത്തരവാദിത്തം നിശ്ചയിക്കൽ

സേവന കാലയളവിൽ എന്തെങ്കിലും വൈരുദ്ധ്യമുണ്ടെങ്കിൽ, റീജിയണൽ പിഎഫ് ഓഫീസുകൾക്ക് ട്രാൻസ്ഫർ ക്ലെയിം നിരസിക്കാൻ കഴിയില്ലെന്ന് ഇപിഎഫ്ഒ പുതിയ നിർദ്ദേശങ്ങളിൽ വ്യക്തമാക്കിയിട്ടുണ്ട്. കൂടാതെ, ട്രാൻസ്ഫറിൽ എന്തെങ്കിലും പ്രശ്നങ്ങളുണ്ടെങ്കിൽ ഇത് ഒഴിവാക്കാൻ ജീവനക്കാരൻ്റെ എല്ലാ വിവരങ്ങളും സമഗ്രമായി പരിശോധിക്കാനുള്ള ഉത്തരവാദിത്തം ഇപിഎഫ്ഒ ബന്ധപ്പെട്ട ഓഫീസുകളെ ഏൽപ്പിച്ചിട്ടുണ്ട്. ഇതിനുപുറമെ, ഉദ്യോഗസ്ഥർ മുഴുവൻ പ്രക്രിയയും ശരിയായ രീതിയിൽ പൂർത്തിയാക്കേണ്ടതുണ്ട്. സർവീസ് ഓവർലാപ്പ് സംബന്ധിച്ച് വലിയ ആശയക്കുഴപ്പം നിലനിൽക്കുന്ന സന്ദർഭങ്ങളിൽ മാത്രം, ആവശ്യമായ വ്യക്തതകൾ വന്ന ശേഷം ക്ലെയിം പരിഹരിക്കപ്പെടും.

ഇപിഎഫ്ഒ അംഗങ്ങൾക്ക് ആശ്വാസം

സർവ്വീസ് ഓവർലാപ്പ് മൂലം പിഎഫ് ട്രാൻസ്ഫർ ക്ലെയിമുകൾ ആവർത്തിച്ച് നിരസിക്കപ്പെട്ട ലക്ഷക്കണക്കിന് ഇപിഎഫ്ഒ അംഗങ്ങൾക്ക് പുതിയ മാറ്റം ആശ്വാസം നൽകുന്നുണ്ട്. നേരത്തെ, ഈ പ്രശ്നങ്ങൾ കാരണം, ജീവനക്കാർക്ക് അവരുടെ ഫണ്ടുകൾ ആക്‌സസ് ചെയ്യുന്നതിൽ കാലതാമസവും ബുദ്ധിമുട്ടുകളും നേരിടേണ്ടി വന്നിരുന്നു.