Gold Rate: കുതിപ്പിൽ നേരിയ ആശ്വാസം; ഇന്നത്തെ സ്വർണം, വെള്ളി നിരക്കുകൾ
Kerala Gold Silver Rate Today: യു.എസ് കേന്ദ്രബാങ്കായ ഫെഡറൽ റിസർവും ആർ.ബി.ഐയും പലിശനിരക്ക് കുറക്കുമെന്ന പ്രതീക്ഷയുമാണ് സ്വർണവിലയ്ക്ക് ശക്തിയാകുന്നത്. ഇന്നലെ പവന്റെ വിലയിൽ 480 രൂപയുടെ വർധനയുണ്ടായി.
സംസ്ഥാനത്ത് കുതിപ്പ് തുടർന്ന് സ്വർണ-വെള്ളി നിരക്കുകൾ. ആഭരണപ്രേമികളെയും സാധാരണക്കാരെയും ആശങ്കയിലാഴ്ത്തി റെക്കോർഡ് നിരക്കാണ് കഴിഞ്ഞ ദിവസം രേഖപ്പെടുത്തിയത്. യു.എസ് കേന്ദ്രബാങ്കായ ഫെഡറൽ റിസർവും ആർ.ബി.ഐയും പലിശനിരക്ക് കുറക്കുമെന്ന പ്രതീക്ഷയുമാണ് സ്വർണവിലയ്ക്ക് ശക്തിയാകുന്നത്.
ഇന്നലെ പവന്റെ വിലയിൽ 480 രൂപയുടെ വർധനയുണ്ടായി. ഇതോടെ ഒരു പവൻ സ്വർണവില 95,680 രൂപയായി ഉയർന്നു. 18 കാരറ്റ് സ്വർണത്തിന്റെ വില ഗ്രാമിന് 9,835 രൂപയായി. 50 രൂപയാണ് കൂടിയത്. 14 കാരറ്റ് സ്വർണത്തിന്റെ വില ഗ്രാമിന് 35 രൂപ ഉയർന്ന് 7,660 രൂപയുമായി. അതേസമയം, ഒരു ഗ്രാം സ്വർണത്തിന് 11,960 രൂപയായിരുന്നു വില.
ഇന്നത്തെ നിരക്കുകൾ
കുതിപ്പിനിടെ നേരിയ ആശ്വാസവുമായി ഇന്നത്തെ സ്വർണവില. 200 രൂപയുടെ കുറവാണ് രേഖപ്പെടുത്തിയത്. ഇതോടെ സംസ്ഥാനത്ത് ഒരു പവൻ സ്വർണവില 95,480 രൂപയായി കുറഞ്ഞു. അതേസമയം, മൂന്ന് ശതമാനം ജിഎസ്ടിയും അഞ്ച് ശതമാനം പണിക്കൂലിയും ചേരുമ്പോൾ വില ഒരു ലക്ഷം കടക്കുമെന്നതിൽ സംശയമില്ല. ജ്വല്ലറികൾക്കനുസരിച്ച് പണിക്കൂലിയിൽ മാറ്റം വരും. ഒരു ഗ്രാം സ്വർണത്തിന് ഇന്ന് 11,935 രൂപയാണ് വില.
കേരളത്തിൽ വെള്ളിയുടെ ഇന്നത്തെ വില ഗ്രാമിന് 196.10 രൂപയും കിലോഗ്രാമിന് 1,96,100 രൂപയുമാണ്. അന്താരാഷ്ട്ര വിപണികളിലെ വിലകൾക്കനുസരിച്ചാണ് കേരളത്തിലെ വെള്ളി വില നിശ്ചയിക്കുന്നത്. ചെന്നൈയിലും കേരളത്തിന് സമാനമായ നിരക്കാണ്. എന്നാൽ ഡൽഹി, ബംഗ്ലൂർ, ഹൈദരാബാദ്, പൂനെ തുടങ്ങിയ നഗരങ്ങളിൽ ഗ്രാമിന് 188 രൂപയാണ് വില.
വില കുതിക്കുമോ കുറയുമോ?
ഡിസംബർ ഒമ്പത്, പത്ത് തീയതികളിലാണ് പലിശനിരക്ക് നിർണയിക്കാനുള്ള ഫെഡറൽ റിസർവിന്റെ യോഗം. കൂടാതെ മൂന്ന്, നാല് തീയതികളിൽ ആർ.ബി.ഐ യോഗവും ചേരുന്നുണ്ട്. ഇവയിലെ തീരുമാനങ്ങൾ വരുദിവസങ്ങളിലെ സ്വർണവിലയ്ക്ക് നിർണായകമാണ്. കൂടാതെ റഷ്യ-യുക്രൈന് യുദ്ധം അവസാനിക്കുമെന്ന് പറയപ്പെടുന്നുണ്ടെങ്കിലും ചര്ച്ചകള് എങ്ങുമെത്താത്തതും സ്വര്ണത്തിന് കരുത്ത് പകരുന്നുണ്ട്.
