BSF Constable Recruitment: ബിഎസ്എഫിൽ കായിക താരങ്ങൾക്ക് ജോലി നേടാം; ഒഴിവുകൾ, അപേക്ഷിക്കേണ്ട അവസാന തീയതി

Bsf Constable Recruitment

ബിഎസ്എഫിൽ കായിക താരങ്ങൾക്ക് ജോലി നേടാൻ അവസരം. സ്‌പോർട്‌സ് ക്വാട്ടയ്ക്ക് കീഴിലുള്ള കോൺസ്റ്റബിൾ (ജനറൽ ഡ്യൂട്ടി) തസ്തികകളിലേക്ക് യോഗ്യരായ ഉദ്യോഗാർത്ഥികളെ ക്ഷണിച്ച് ബോർഡർ സെക്യൂരിറ്റി ഫോഴ്‌സ് വിജ്ഞാപനം പുറത്തിറക്കി. താല്പര്യമുള്ള യോ​ഗ്യരായ ഉദ്യോ​ഗാർത്ഥികൾക്ക് https://rectt.bsf.gov.in എന്ന ഔ​ദ്യോ​ഗിക വെബ്സൈറ്റിലൂടെ അപേക്ഷ സമർപ്പിക്കാവുന്നതാണ്. ഡിസംബർ 27 മുതൽ നിങ്ങൾക്ക് അപേക്ഷിച്ച് തുടങ്ങാം. അപേക്ഷ സമർപ്പിക്കാനുള്ള അവസാന തീയതി 2026 ജനുവരി 16 വരെയാണ്.

വിവിധ തസ്തികകളിലായി 549 ഒഴിവുകളാണ് ആകെയുള്ളത്. 18 മുതൽ 23 വയസ് വരെ പ്രായമുള്ള ഉദ്യോ​ഗാർത്ഥികൾക്ക് ഇതിലേക്ക് അപേക്ഷിക്കാവുന്നതാണ്. അംഗീകൃത ബോർഡിൽ നിന്നുള്ള മെട്രിക്കുലേഷൻ അല്ലെങ്കിൽ തത്തുല്യമാണ് അപേക്ഷിക്കാനുള്ള വിദ്യാഭ്യാസ യോ​ഗ്യത. തിരഞ്ഞെടുക്കുന്നവർക്ക് പ്രതിമാസം 21,700 മുകൽ 69,100 രൂപ വരെ തസ്തികയ്ക്ക് അനുസരിച്ച് ശമ്പളം ലഭിക്കുന്നതാണ്. പെൺകുട്ടികൾക്കും അപേക്ഷിക്കാം.

ALSO READ: കെ ടെറ്റ് അപേക്ഷാത്തീയതി അവസാനിക്കുന്നു; അപേക്ഷിക്കേണ്ടത് എങ്ങനെ? അറിയേണ്ടതെല്ലാം

15/01/2024 നും 15/01/2026 നും ഇടയിൽ അന്താരാഷ്ട്ര അല്ലെങ്കിൽ ദേശീയ തലത്തിലുള്ള മത്സരങ്ങളിൽ പങ്കെടുത്തതോ മെഡലുകൾ നേടിയതോ ആയ കായിക താരങ്ങൾക്ക് മാത്രമാണ് അപേക്ഷിക്കാനുള്ള അവസരം. എല്ലാ കേന്ദ്ര സർക്കാർ ജീവനക്കാർക്കും ബാധകമായ മറ്റ് എല്ലാ അലവൻസുകളും തിരഞ്ഞെടുക്കുന്ന ഓരോ ഉദ്യാ​ഗാർത്ഥികൾക്കും ലഭിക്കുന്നതാണ്. പുരുഷൻ (ജനറൽ/യുആർ) 159 രൂപയും, പുരുഷൻ (ഒബിസി) 159 രൂപയുമാണ് അപേക്ഷാ ഫീസ്. സ്ത്രീകൾക്ക് ഫീസ് നൽകേണ്ടതില്ല. എസ്‌സി/എസ്ടി വിഭാ​ഗത്തിൽ ഉൾപ്പെട്ടവർക്ക് ഫീസില്ല.

അപേക്ഷകളുടെ സൂക്ഷ്മപരിശോധന, ഡോക്യുമെന്റേഷൻ, ശാരീരിക പരിശോധന, മെറിറ്റ് ലിസ്റ്റ് തയ്യാറാക്കൽ, വിശദമായ മെഡിക്കൽ പരിശോധന തുടങ്ങിയ മാനദണ്ഡങ്ങളിലൂടെ മാത്രമാണ് നിയമനം. തിരഞ്ഞെടുക്കപ്പെടുന്ന ഉദ്യോഗാർത്ഥികൾ അടിസ്ഥാന പരിശീലനവും മറ്റ് നിർദ്ദിഷ്ട കോഴ്സുകളും പൂർത്തിയാക്കണം. കൂടുതൽ വിവരങ്ങൾക്ക് ഔദ്യോ​ഗിക വെബ്സൈറ്റ് സന്ദർശിക്കാവുന്നതാണ്.