ICAI CA Exams Postponed: ഇന്ത്യ-പാക് സംഘർഷം; ഐസിഎഐ നടത്താനിരുന്ന പരീക്ഷകൾ മാറ്റിവെച്ചു
ICAI CA May 2025 Exams Postponed: മെയ് 9 മുതൽ 14 വരെ നടത്താനിരുന്ന സിഎ ഫൈനൽ, ഇൻ്റർമീഡിയറ്റ്, പോസ്റ്റ് ക്വാളിഫിക്കേഷൻ കോഴ്സ് (പിക്യുസി) എന്നീ പരീക്ഷകളാണ് മാറ്റിവെച്ചത്. പുതുക്കിയ തീയതികൾ പിന്നീട് അറിയിക്കുമെന്ന് ഐസിഎഐ അറിയിച്ചു.
ന്യൂഡൽഹി: ഇന്ത്യ-പാക് സംഘർഷം നിലനിൽക്കുന്ന സാഹചര്യത്തിൽ ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടൻ്റ്സ് ഓഫ് ഇന്ത്യ (ഐസിഎഐ) നടത്താനിരുന്ന പരീക്ഷകൾ മാറ്റിവെച്ചു. മെയ് 9 മുതൽ 14 വരെ നടത്താൻ നിശ്ചയിച്ചിരുന്ന സിഎ പരീക്ഷകളാണ് മാറ്റിവെച്ചത്. പുതുക്കിയ തീയതികൾ പിന്നീട് അറിയിക്കുമെന്ന് ഐസിഎഐ അറിയിച്ചു. എക്‌സിലൂടെയാണ് ഐസിഎഐ ഇക്കാര്യം അറിയിച്ചത്.
മെയ് 9 മുതൽ 14 വരെ നടത്താനിരുന്ന സിഎ ഫൈനൽ, ഇൻ്റർമീഡിയറ്റ്, പോസ്റ്റ് ക്വാളിഫിക്കേഷൻ കോഴ്സ് (പിക്യുസി) പരീക്ഷകളാണ് മാറ്റിവെച്ചത്. അപേക്ഷകർ പുതിയ അപ്‌ഡേറ്റുകൾക്കായി ഔദ്യോഗിക വെബ്സൈറ്റായ icai.org സന്ദർശിക്കണമെന്നും ഐസിഎഐ നിർദേശിച്ചു.
സിഎ മെയ് 2025 ടൈംടേബിൾ പ്രകാരം, സിഎ ഫൈനൽ ഗ്രൂപ്പ് പരീക്ഷകൾ മെയ് 2, 4, 6 തീയതികളിലായി നടന്നു. ഗ്രൂപ്പ് II പരീക്ഷകൾ മെയ് 8, 10, 13 തീയതികളിലും, ഇൻ്റർമീഡിയറ്റ് തലത്തിൽ ഗ്രൂപ്പ് 1 പരീക്ഷകൾ മെയ് 3, 5, 7 തീയതികളിലും നടന്നു. തുടർന്ന്, മെയ് 9, 11, 14 തീയതികളിൽ നടത്താൻ നിശ്ചയിച്ചിരുന്ന ഗ്രൂപ്പ് II പരീക്ഷകളാണ് ഇപ്പോൾ മാറ്റിവെച്ചതായി അറിയിച്ചിരിക്കുന്നത്.
എന്നാൽ, മെയ് 15, 17, 19, 21 തീയതികളിൽ നടക്കാനിരിക്കുന്ന സിഎ ഫൗണ്ടേഷൻ പരീക്ഷകൾ നിശ്ചയിച്ച പ്രകാരം തന്നെ നടക്കും. അബുദാബി, ബഹ്റൈൻ, ദോഹ, ദുബായ്, കാഠ്‌മണ്ഡു (നേപ്പാൾ), കുവൈറ്റ്, മസ്‌കറ്റ്, റിയാദ് (സൗദി അറേബ്യ), തിംഫു (ഭൂട്ടാൻ) തുടങ്ങിയ സ്ഥലങ്ങളിലാണ് സിഎ ഫൗണ്ടേഷൻ പരീക്ഷകൾ നടക്കുന്നത്.
ഐസിഎഐ പങ്കുവെച്ച പോസ്റ്റ്:
Important Announcement-In view of the tense security situation in the Country, the remaining papers of CA Final, Intermediate & PQC Examinations [International Taxation–Assessment Test (INTT AT)] May 2025 from 9th May 2025 to 14th May 2025 stand postponed.https://t.co/EIS52g5gRz pic.twitter.com/06WvolgR7s
— Institute of Chartered Accountants of India – ICAI (@theicai) May 9, 2025
ഫൗണ്ടേഷൻ, ഇന്റർമീഡിയറ്റ്, ഫൈനൽ പരീക്ഷകൾ എഴുതുന്ന ഉദ്യോഗാർത്ഥികൾക്ക് ഇംഗ്ലീഷിലോ ഹിന്ദിയിലോ പരീക്ഷ എഴുതാം. എന്നിരുന്നാലും, ഇന്റർനാഷണൽ ടാക്സേഷൻ (INTT-AT) പരീക്ഷ ഇംഗ്ലീഷിൽ മാത്രമേ നടത്തൂ. അതേസമയം, കശ്മീർ സർവകലാശാല നടത്താനിരുന്ന എല്ലാ പരീക്ഷകളും മാറ്റിവച്ചിട്ടുണ്ട്. പുതുക്കിയ തീയതികൾ പിന്നീട് പ്രഖ്യാപിക്കുമെന്ന് സർവകലാശാല അറിയിച്ചു.
