KEAM Admit Card 2026: കീം അഡ്മിറ്റ് കാര്ഡ് ഇനിയും താമസിക്കുമോ? എന്ന് പ്രതീക്ഷിക്കാം
KEAM Admit Card 2026 Expecting Soon: കീം അഡ്മിറ്റ് കാര്ഡ് ഉടന് ലഭിക്കും. പ്രോസ്പെക്ടസില് പറഞ്ഞ തീയതി കഴിഞ്ഞിട്ടും ഹാള് ടിക്കറ്റ് ലഭിക്കാത്തതില് വിദ്യാര്ത്ഥികള് ആശങ്കയിലാണ്. ഏപ്രില് ഒന്നിന് അഡ്മിറ്റ് കാര്ഡ് ലഭ്യമാകുമെന്നായിരുന്നു പ്രോസ്പെക്ടസിലുണ്ടായിരുന്നത്. എന്നാല് ഇനി അധികം കാലതാമസമുണ്ടാകില്ല.
പ്രോസ്പെക്ടസില് പറഞ്ഞ തീയതി കഴിഞ്ഞിട്ടും കീം അഡ്മിറ്റ് കാര്ഡ് ലഭ്യമാകാത്തതില് വിദ്യാര്ത്ഥികള് ആശങ്കയില്. ഏപ്രില് ഒന്ന് മുതല് ഹാള് ടിക്കറ്റ് ലഭ്യമാകുമെന്നായിരുന്നു പ്രോസ്പെക്ടസില് ഉണ്ടായിരുന്നത്. എന്നാല് ഏപ്രില് മൂന്നായിട്ടും അഡ്മിറ്റ് കാര്ഡ് ലഭ്യമായിട്ടില്ല. ഇതിന്റെ കാരണം എന്താണെന്നും അധികൃതര് വ്യക്തമാക്കിയിട്ടില്ല. അവധി ദിനങ്ങളാണോ നിലവിലെ കാലതാമസത്തിന് കാരണമെന്ന് വ്യക്തമല്ല.
അഡ്മിറ്റ് കാര്ഡ് എന്ന് പുറത്തുവിടുമെന്നത് സംബന്ധിച്ച് ഔദ്യോഗിക വിവരങ്ങള് ലഭ്യമായിട്ടില്ല. ഏപ്രില് അഞ്ചിനകം അഡ്മിറ്റ് കാര്ഡ് ലഭ്യമായേക്കാമെന്നാണ് അനൗദ്യോഗിക സൂചന. എന്തായാലും ഇനി വലിയൊരു കാലതാമസത്തിന് സാധ്യതയില്ല. രണ്ടോ മൂന്നോ ദിവസത്തിനകം അഡ്മിറ്റ് കാര്ഡ് ലഭ്യമാകും.
നിലവില് വിദ്യാര്ത്ഥികള് എന്ട്രന്സ് പരീക്ഷയ്ക്കുള്ള തയ്യാറെടുപ്പിലാണ്. പരീക്ഷയ്ക്ക് ഇനി ഏതാനും ദിവസങ്ങള് മാത്രമാണ് ബാക്കിയുള്ളത്. ഏപ്രില് 17 മുതല് 23 വരെ തീയതികളിലാണ് പരീക്ഷ. 13, 16, 24, 25 തീയതികളാണ് ബഫര് ദിനങ്ങള്.
അഡ്മിറ്റ് കാര്ഡ് ലഭ്യമാകുന്നതില് കാലതാമസം നേരിട്ടതോടെ പരീക്ഷാത്തീയതി മാറ്റിവച്ചോയെന്ന് സംശയം ഉന്നയിക്കുന്നവരുണ്ട്. എന്നാല് അത്തരത്തില് ഒരു അപ്ഡേറ്റുകളും പുറത്തുവന്നിട്ടില്ല. പരീക്ഷാത്തീയതി മാറ്റിവയ്ക്കാന് സാധ്യതയില്ല. അതുകൊണ്ട് തന്നെ വിദ്യാര്ത്ഥികള് മികച്ച രീതിയില് തയ്യാറെടുപ്പുകള് തുടരണം.
ഉച്ചയ്ക്ക് 2 മുതല് അഞ്ച് വരെയാണ് പരീക്ഷ നടക്കുന്നത്. 12 മണിക്ക് തന്നെ പരീക്ഷാ കേന്ദ്രത്തിലെത്തണം. 1.30-ന് ഹാളില് പ്രവേശിപ്പിക്കും. ഹാള് ടിക്കറ്റിലെ നിര്ദ്ദേശങ്ങള് പാലിക്കണം.
അഡ്മിറ്റ് കാര്ഡ് എവിടെ കിട്ടും?
cee.kerala.gov.in എന്ന പ്രവേശന പരീക്ഷാ കമ്മീഷണറുടെ ഔദ്യോഗിക വെബ്സൈറ്റിലാണ് കീം അഡ്മിറ്റ് കാര്ഡ് ലഭ്യമാകുന്നത്. വെബ്സൈറ്റില് ലഭ്യമായതിന് ശേഷം വിദ്യാര്ത്ഥികള്ക്ക് ‘കാന്ഡിഡേറ്റ് പോര്ട്ടല്’ വഴി ഇത് ഡൗണ്ലോഡ് ചെയ്യാനാകും.
