Malayalam Cinema: 1.5 കോടി ചോദിച്ച കൗമാരക്കാരന് താരം ആര്? മലയാള സിനിമയിൽ പ്രതിസന്ധിയെന്ന് നിർമ്മാതാക്കൾ
Malayalam Cinema Crisis: സംഗീത സംവിധായകർ പലരും സിനിമയിലെ ഗാനങ്ങളുടെ പകർപ്പവകാശമാണ് പ്രതിഫലത്തിന് പകരം ചോദിക്കുന്നത്. ഇത് വലിയ മ്യൂസിക് കമ്പനികൾക്ക് വിറ്റ് ലാഭം നേടുന്നതാണ് ഏറ്റവും പുതിയ ട്രെൻഡ്
ബോളിവുഡിലെ പോലെ തന്നെ പ്രതിസന്ധി ഉടലെടുത്തിരിക്കുകയാണ് മലയാള സിനിമയിലും. പുറത്തു വരുന്ന ഏറ്റവും പുതിയ റിപ്പോർട്ടുകൾ ഇത് ശരിവെയ്ക്കുന്നതാണ്. താരങ്ങൾ പ്രതിഫലം ഉയർത്തുന്നതോടെ നിർമ്മാതാവിന് ചിത്രത്തിൽ നിന്നും കാര്യമായി ഒന്നും ലഭിക്കാനില്ലെന്ന അവസ്ഥയാണ് ഇപ്പോഴുള്ളത്.ഇത്തരമൊരു പ്രശ്നത്തിൽ താര സംഘടനയായ അമ്മയെ സമീപിച്ചിരിക്കുകയാണ് നിർമ്മാതാക്കളുടെ സംഘടനയായ പ്രൊഡ്യൂസേഴ്സ് അസോസിയേഷൻ. സിനിമയിലെ തുടക്കകാർ വരെ ചോദിക്കുന്നത് 1 ഉം 2 ഉം കോടിയാണെന്നും, മുൻ നിര താരങ്ങളിൽ 4 കോടിയിൽ കുറഞ്ഞ് ആരും വാങ്ങുന്നില്ലെന്നും നിർമ്മാതാക്കളുടെ സംഘടന ചൂണ്ടിക്കാട്ടുന്നു. മുൻപ് ഒടിടി, സാറ്റലൈറ്റ് അവകാശങ്ങൾ വലിയ വിലയ്ക്കായിരുന്നു വാങ്ങിയിരുന്നതെങ്കിൽ കമ്പനികൾ പലതും അത്തരത്തിൽ വലിയ വിലയ്ക്ക് ഒടിടി വാങ്ങുന്നത് അവസാനിപ്പിച്ചിരിക്കുകയാണ്. ഇതും നിർമ്മാതാക്കളുടെ നടുവൊടിക്കുന്നതിലേക്കാണ് എത്തിയിരിക്കുന്നത്.
സിനിമയിൽ അഭിനയിക്കാൻ ഒരു യുവതാരം ആവശ്യപ്പെട്ടത് അഞ്ചരക്കോടിക്ക് മുകളിലാണ്. ഇതോടെ സിനിമയിൽ ശമ്പളം കൊടുക്കുന്നത് മാത്രം ബജറ്റിൻ്റെ അത്രയുമാകുമെന്നും ഇതിനൊരു പരിഹാരം വേണമെന്നുമാണ് നിർമ്മാതാക്കളുടെ ആവശ്യം. എന്നാൽ പണം ആവശ്യപ്പെട്ട താരങ്ങൾ ആരാണെന്ന് നിർമ്മാതാക്കൾ പുറത്തു വിട്ടിട്ടില്ല. അമ്മയുടെ പുതിയ ഭാരവാഹികളെ തിരഞ്ഞെടുത്തതിന് പിന്നാലെ ഉയരുന്ന ആവശ്യമായതിനാൽ വിഷയം ഭേദപ്പെട്ട രീതിയിൽ കൈകാര്യം ചെയ്യുമെന്നാണ് പ്രതീക്ഷിക്കുന്നത്.
സാങ്കേതിക മേഖലയിലും പ്രശ്നം
താരങ്ങളുടെ പ്രതിഫലം മാത്രമല്ല സാങ്കേതിക വിദഗ്ധരുടെ പ്രതിഫലത്തിലും വളരെ അധികം മാറ്റം വന്നിട്ടുണ്ട്. ഛായഗ്രാഹകർ പലരും ദിവസ വേതനത്തിൽ വരാൻ പോലും തയ്യാറാകുകയാണെന്നും നിർമ്മാതാക്കൾ പറയുന്നു. സംഗീത സംവിധായകർ പലരും സിനിമയിലെ ഗാനങ്ങളുടെ പകർപ്പവകാശമാണ് പ്രതിഫലത്തിന് പകരം ചോദിക്കുന്നത്. ഇത് വലിയ മ്യൂസിക് കമ്പനികൾക്ക് വിറ്റ് ലാഭം നേടുന്നതാണ് ഏറ്റവും പുതിയ ട്രെൻഡ് എന്നും നിർമ്മാതാക്കൾക്ക് ആരോപണമുണ്ട്.
എല്ലായിടത്തും പ്രശ്നം
ഇന്ത്യൻ-2 റിലീസുമായി ബന്ധപ്പെട്ടെത്തിയ വാർത്തയിൽ ഏറ്റവും പ്രധാനപ്പെട്ടത് ചിത്രത്തിൽ കമൽഹാസൻ വാങ്ങിയ പ്രതിഫലമായിരുന്നു. ഏകദേശം 150 കോടിക്ക് മുകളിലായിരുന്നു ചിത്രത്തിൽ ഉലക നായകൻ്റെ പ്രതിഫലം. ബഡേ മിയാൻ ഛോട്ടെ മിയാൻ ചിത്രത്തിൽ അഭിനയിച്ച പല താരങ്ങൾക്കും ഇപ്പോഴും പ്രതിഫലം ലഭിച്ചിട്ടില്ലെന്ന് വാർത്തയും സമീപകാലത്താണ് പുറത്തു വന്നത്.
