PM Shri Schools scheme: കാത്തിരുന്നു കാണാം..! ദേശീയ വിദ്യാഭ്യാസ നയം കേരളത്തിലും നടപ്പാക്കും; വി ശിവൻ കുട്ടിയെ വെല്ലുവിളിച്ച് കെ സുരേന്ദ്രൻ

V Shivankutty, K Surendran

തിരുവനന്തപുരം: പി എം ശ്രീ പദ്ധതിയിൽ പരസ്പരം വെല്ലുവിളിച്ച് വിദ്യാഭ്യാസ മന്ത്രി വി ശിവൻകുട്ടിയും ബിജെപി മുൻ സംസ്ഥാന അധ്യക്ഷൻ കെ സുരേന്ദ്രനും. പിഎം ശ്രീ ധാരണപത്രം ദേശീയ വിദ്യാഭ്യാസ നയത്തിലേക്കുള്ള ചവിട്ടുപടി ആണെന്നും കരിക്കുലത്തിൽ ഇടപെടൽ ഉണ്ടാകുമെന്നും കെ സുരേന്ദ്രൻ ഫേസ്ബുക്കിൽ കുറിച്ചു. പാഠ്യപദ്ധതിയിൽ ആർഎസ്എസ് നേതാക്കളെ ഉൾപ്പെടുത്തുമെന്നത് വ്യാജ പ്രചാരണമാണെന്ന വിദ്യാഭ്യാസ മന്ത്രി വി ശിവൻകുട്ടിയുടെ പ്രസ്താവനയ്ക്ക് മറുപടി നൽകിയതാണ് സുരേന്ദ്രൻ. ദേശീയ വിദ്യാഭ്യാസ നയം ഇവിടെയും നടപ്പാവും, കരിക്കുലത്തിലും ഇടപെടൽ ഉണ്ടാകും കാത്തിരുന്നു കാണാം എന്നാണ് സുരേന്ദ്രന്റെ വെല്ലുവിളി.

അതേസമയം കേരളത്തിലെ പാഠ്യപദ്ധതിയിൽ ആർഎസ്എസ് സ്ഥാപകൻ ഹെഡ്ഗേവറെയും സവർക്കറെയും ഉൾപ്പെടുത്തുമെന്ന് ബിജെപി മുൻ സംസ്ഥാന അധ്യക്ഷൻ കെ സുരേന്ദ്രന്റെ പ്രസ്താവന രാഷ്ട്രീയലക്ഷ്യം ഉന്നം വെച്ചിട്ടുള്ള വ്യാജ പ്രചാരണമാണെന്ന് വിദ്യാഭ്യാസ മന്ത്രി വി ശിവൻകുട്ടിയുടെ പ്രതികരണം. കേരളത്തിന്റെ വിദ്യാഭ്യാസ നയത്തെ കുറിച്ച് ബിജെപി നേതാവിനെ ധാരണയില്ലാത്തതുകൊണ്ടാണ് ഇത്തരം അസംബന്ധ പ്രസ്താവനകൾ നടത്തുന്നതെന്നും മന്ത്രി പറഞ്ഞു. ഫേസ്ബുക്കിലൂടെ ആയിരുന്നു വിദ്യാഭ്യാസ മന്ത്രിയുടെ പ്രതികരണം.

ALSO READ:പിഎംശ്രീ പദ്ധതി ദോഷകരമെങ്കിൽ നടപ്പാക്കാൻ അനുവദിക്കില്ല; ടി പി രാമകൃഷ്ണൻ

പിഎം ശ്രീ പദ്ധതിയവമായി ബന്ധപ്പെട്ട് സിപിഎമ്മും സിപിഐയും തമ്മിലും പോരുമുറുകുകയാണ്. ധാരണ പത്രത്തിൽ ഒപ്പിട്ട തീരുമാനം പിൻവലിക്കണം എന്നാണ് സിപിഐയുടെ ആവശ്യം. സർക്കാരിന്റെ നടപടിക്കെതിരെ എസ്എഫ്ഐയും രംഗത്തെത്തിയിട്ടുണ്ട്. അതേസമയം കേരളത്തിന് ദോഷകരം ആണെങ്കിൽ പിഎം ശ്രീ പദ്ധതി സംസ്ഥാനത്ത് നടപ്പാക്കാൻ അനുവദിക്കില്ലെന്ന് എൽഡിഎഫ് കൺവീനർ ടി പി രാമകൃഷ്ണൻ പറഞ്ഞു. അടുത്ത എൽഡിഎഫ് യോഗത്തിൽ വിഷയം ചർച്ച ചെയ്യുമെന്നും ചർച്ചയിലൂടെ ഇതിന് പരിഹാരം കാണുമെന്നും രാമകൃഷ്ണൻ പ്രതികരിച്ചു. പി എം ശ്രീ പദ്ധതിയുമായി ബന്ധപ്പെട്ട ഇടതുമുന്നണിയിൽ തർക്കങ്ങൾ ഇല്ലെന്നും നിലവിൽ ഉള്ള അഭിപ്രായവ്യത്യാസം എൽഡിഎഫിലെ ഭിന്നതയായി കണക്കാക്കേണ്ട സാഹചര്യം ഇല്ലെന്നും അദ്ദേഹം വ്യക്തമാക്കി.