Special train: എറണാകുളം, കൊല്ലം, നാഗർകോവിൽ റൂട്ടുകളിൽ സ്പെഷ്യൽ ട്രെയിനുകൾ; ആറ്റുകാൽ പൊങ്കാല റെയിൽവേ സമയവിവരങ്ങൾ

ട്രെയിന്‍

തിരുവനന്തപുരം: ആറ്റുകാൽ ഭഗവതി ക്ഷേത്രത്തിലെ പൊങ്കാല മഹോത്സവം പ്രമാണിച്ച് ഭക്തർക്കായി വിപുലമായ യാത്രാ സൗകര്യങ്ങളൊരുക്കി റെയിൽവേ. മാർച്ച് 3-ന് നടക്കുന്ന പൊങ്കാലയോടനുബന്ധിച്ച് പ്രത്യേക ട്രെയിനുകൾ, അധിക സ്റ്റോപ്പുകൾ, സുരക്ഷാ ക്രമീകരണങ്ങൾ എന്നിവ റെയിൽവേ പ്രഖ്യാപിച്ചു.

പ്രത്യേക ട്രെയിൻ സർവീസുകൾ

പൊങ്കാല ദിവസം വിവിധ റൂട്ടുകളിലായി അഞ്ച് പ്രത്യേക അൺറിസർവ്ഡ് ട്രെയിനുകൾ സർവീസ് നടത്തും.

• തിരുവനന്തപുരം – നാഗർകോവിൽ സ്പെഷ്യൽ (06121): മാർച്ച് 2-ന് രാത്രി 10.55-ന് പുറപ്പെട്ട് രാത്രി 11.20-ന് നാഗർകോവിലിലെത്തും.
• നാഗർകോവിൽ – തിരുവനന്തപുരം സ്പെഷ്യൽ (06122): മാർച്ച് 3-ന് പുലർച്ചെ 1.40-ന് പുറപ്പെട്ട് 3.30-ന് തിരുവനന്തപുരത്തെത്തും.
• എറണാകുളം – തിരുവനന്തപുരം സ്പെഷ്യൽ (06123): മാർച്ച് 3-ന് പുലർച്ചെ 1.20-ന് പുറപ്പെട്ട് 6.30-ന് തിരുവനന്തപുരത്തെത്തും. (കോട്ടയം വഴി)
• തിരുവനന്തപുരം – എറണാകുളം സ്പെഷ്യൽ (06123): മാർച്ച് 3-ന് ഉച്ചയ്ക്ക് 3.10-ന് പുറപ്പെട്ട് രാത്രി 8.15-ന് എറണാകുളത്തെത്തും.
• തിരുവനന്തപുരം – എറണാകുളം അൺറിസർവ്ഡ് സ്പെഷ്യൽ (06124 – ആലപ്പുഴ വഴി): മാർച്ച് 3-ന് ഉച്ചയ്ക്ക് 2.40-ന് പുറപ്പെട്ട് രാത്രി 7.10-ന് എറണാകുളത്തെത്തും.

അധിക സ്റ്റോപ്പുകൾ

ചെന്നൈ എക്സ്പ്രസ് (കഴക്കൂട്ടം, ചിറയിൻകീഴ്), പുനലൂർ – മധുര എക്സ്പ്രസ് (പള്ളിയാടി, ബാലരാമപുരം), അമൃത എക്സ്പ്രസ് (ചിറയിൻകീഴ്), ജനശതാബ്ദി, വന്ദേ ഭാരത് എക്സ്പ്രസ് (തിരുവനന്തപുരം പേട്ട) എന്നീ ട്രെയിനുകൾക്ക് പൊങ്കാല ദിവസം അധിക സ്റ്റോപ്പുകൾ അനുവദിച്ചു.

തിരുവനന്തപുരം സെൻട്രലിലെ ക്രമീകരണങ്ങൾ

കൊല്ലം ഭാഗത്തേക്കുള്ള ട്രെയിനുകൾ പ്ലാറ്റ്‌ഫോം 1, 2, 3, 4 എന്നിവയിൽ നിന്നും നാഗർകോവിൽ ഭാഗത്തേക്കുള്ള ട്രെയിനുകൾ പ്ലാറ്റ്‌ഫോം 5-ൽ നിന്നും പുറപ്പെടും. തിരക്ക് ഒഴിവാക്കാൻ അധിക ടിക്കറ്റ് കൗണ്ടറുകളും ക്യൂആർ കോഡ് സൗകര്യത്തോടു കൂടിയ യുടിഎസ് കൗണ്ടറുകളും ഏർപ്പെടുത്തി. ആർ.പി.എഫ്, ജി.ആർ.പി, ലോക്കൽ പോലീസ് എന്നിവർക്കൊപ്പം മെഡിക്കൽ ടീമിനെയും വിവിധ പോയിന്റുകളിൽ വിന്യസിക്കും.

സുരക്ഷാ നിർദ്ദേശങ്ങൾ

• റെയിൽവേ പരിസരത്ത് ഒരിടത്തും പൊങ്കാല അടുപ്പുകൾ കൂട്ടാൻ അനുവദിക്കില്ല.
• പ്ലാറ്റ്‌ഫോമുകളിലോ മേൽപ്പാലങ്ങളിലോ കൂട്ടം കൂടരുത്.
• ട്രെയിൻ പാളങ്ങൾ മുറിച്ചുകടക്കുന്നത് കർശനമായി നിരോധിച്ചു; മേൽപ്പാലങ്ങൾ മാത്രം ഉപയോഗിക്കുക.

കൂടാതെ, പൊങ്കാല ദിവസം ഹസ്രത്ത് നിസാമുദ്ദീൻ എക്സ്പ്രസ്, നാഗർകോവിൽ പാസഞ്ചർ, കൊട്ടാരം എക്സ്പ്രസ് തുടങ്ങിയ ട്രെയിനുകൾ നിശ്ചിത സമയത്തേക്കാൾ വൈകി മാത്രമേ സർവീസ് നടത്തൂ എന്നും റെയിൽവേ അറിയിച്ചു.