Kerala Rain Alert: കാലവര്ഷത്തിനൊപ്പം ചക്രവാതച്ചുഴിയും; പെരുമഴയില് സംസ്ഥാനത്ത് അഞ്ച് മരണം
സംസ്ഥാനത്തിന്റെ വിവിധ ഭാഗങ്ങള് കനത്ത മഴ തുടരുകയാണ്. കോട്ടയം എറണാകുളം ജില്ലകളില് റെഡ് അലര്ട്ട് പ്രഖ്യാപിച്ചു. പത്തനംതിട്ട, ആലപ്പുഴ, ഇടുക്കി ജില്ലകളില് ഓറഞ്ച് അലര്ട്ടാണ്.
Kerala Rain Alert
തിരുവനന്തപുരം: സംസ്ഥാനത്ത് തെക്കുപടിഞ്ഞാറന് കാലവര്ഷം നാലുദിവസത്തിനകം എത്തും. തെക്കന് തമിഴ്നാടിന് മുകളില് നിലനില്ക്കുന്ന ചക്രവാതച്ചുഴിയുടെ ഫലമായി കേരളത്തില് അടുത്ത ഏഴ് ദിവസം വ്യാപകമായി ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ നിരീക്ഷണ കേന്ദ്രം അറിയിക്കുന്നുണ്ട്.
മെയ് 31ഓടെ സംസ്ഥാനത്ത് കാലവര്ഷം പിടിക്കുമെന്നാണ് നേരത്തെ പ്രവചനമുണ്ടായിരുന്നത്. പിന്നീട് ജൂണ് 15 ഓടെ രാജ്യത്താകെ കാലവര്ഷമെത്തും. കേരളത്തില് കാലവര്ഷം എത്തുന്ന തീയതി അടിസ്ഥാനമാക്കിയാണ് ബാക്കി സംസ്ഥാനങ്ങളില് കാലവര്ഷത്തിന്റെ നിര്ണയം.
സംസ്ഥാനത്തിന്റെ വിവിധ ഭാഗങ്ങള് കനത്ത മഴ തുടരുകയാണ്. കോട്ടയം എറണാകുളം ജില്ലകളില് റെഡ് അലര്ട്ട് പ്രഖ്യാപിച്ചു. പത്തനംതിട്ട, ആലപ്പുഴ, ഇടുക്കി ജില്ലകളില് ഓറഞ്ച് അലര്ട്ടാണ്. വയനാട്, കണ്ണൂര്, കാസര്കോട് ഒഴികെയുള്ള ജില്ലകളില് യെല്ലോ അലര്ട്ടാണ്. വരുംദിവസങ്ങളിലും സംസ്ഥാനത്ത് കനത്തമഴ തുടരുമെന്നാണ് മുന്നറിയിപ്പ്.
അതേസമയം, വൈക്കം വേമ്പനാട്ടുകായലില് വള്ളം മറിഞ്ഞ് മത്സ്യതൊഴിലാളി മരിച്ചിരുന്നു. ചെമ്പ് സ്വദേശി സദാനന്ദന് ആണ് മരിച്ചത്. ശക്തമായ കാറ്റില് വള്ളം മറിഞ്ഞാണ് അപകടമുണ്ടായത്. ആലപ്പുഴയിലെ ശക്തമായ കാറ്റില് വീട്ടുമുറ്റത്തെ തെങ്ങ് വീണ് യുവാവ് മരിച്ചു. ചിറയില് കുളങ്ങര ധര്മ്മപാലന്റെ മകന് അരവിന്ദ് ആണ് മരിച്ചത്. തിരുവനന്തപുരം മുതലപ്പൊഴിയില് വള്ളം മറിഞ്ഞ് ഒരാള് മരിച്ചിട്ടുണ്ട്. അഞ്ചുതെങ്ങ് സ്വദേശി എബ്രഹാം ആണ് മരിച്ചത്. എറണാകുളം വേങ്ങൂരില് തോട്ടില് കുളിക്കാന് ഇറങ്ങിയ പത്താം ക്ലാസുകാരന്
മുങ്ങിമരിച്ചു. ഐക്കരക്കുടി ഷൈബിന്റെ മകന് എല്ദോസ് ആണ് മരിച്ചത്. കാഞ്ഞങ്ങാട് കൂട്ടുകാര്ക്കൊപ്പം പുഴയില് കുളിക്കാനിറങ്ങിയ പതിനാറുകാരന് മുങ്ങിമരിച്ചു. അരയി വട്ടത്തോടിലെ അബ്ദുള്ള കുഞ്ഞിയുടെ മകന് സിനാന് ആണ് മരിച്ചത്.
അതിനിടെ കനത്ത മഴയെതുടര്ന്ന് കോട്ടയം ഭരണങ്ങാനം വില്ലേജില് ഇടമറുക് ചൊക്കല്ല് ഭാഗത്ത് ഉരുള്പൊട്ടലുണ്ടായി. പ്രദേശത്ത് വ്യാപക നാശനഷ്ടമാണ് സംഭവിച്ചിരിക്കുന്നത്. പ്രദേശത്തെ ഏഴ് വീടുകള് ഉരുള്പ്പൊട്ടലില് തകര്ന്നു. ആളപായമൊന്നും തന്നെ റിപ്പോര്ട്ട് ചെയ്തിട്ടില്ല. കോട്ടയം ജില്ലയിലെ വിവിധ മേഖലകളില് വലിയ നാശനഷ്ടമാണ് ഇന്നത്തെ മഴയില് റിപ്പോര്ട്ട് ചെയ്തിരിക്കുന്നത്.
തലനാട് മണ്ണിടിച്ചിലില് രണ്ട് വീടുകള് തകര്ന്നു. ഇവിടെ മണ്ണിനടിയില്പ്പെട്ട് ഒരു ആട് ചത്തു. കാഞ്ഞിരപ്പള്ളി ഈരാറ്റുപേട്ട റോഡില് പലയിടത്തും വെള്ളക്കെട്ട് രൂപപ്പെട്ടു. പാലാ നഗരത്തിലടക്കം വെള്ളംകയറിയിട്ടുണ്ട്.
കനത്ത മഴയില് തെക്കന് കേരളത്തിലും വലിയ ദുരിതമാണ് റിപ്പോര്ട്ട് ചെയ്തിരിക്കുന്നത്. കൊല്ലത്തും തിരുവനന്തപുരത്തും റോഡുകളിലെ വെള്ളക്കെട്ടുകള് ഗതാഗതത്തിന് തടസ്സമായി. കൊല്ലത്ത് അര്ദ്ധരാത്രി മുതല് ഇടവിട്ട് ശക്തമായ മഴയാണ് ലഭിക്കുന്നത്. കാവനാട്, പറക്കുളം ഭാഗങ്ങളില് വീടുകളില് വെള്ളം കയറി.
ദേശീയപാതയില് ചാത്തന്നൂര് മുതല് പരിപ്പള്ളി വരെ വെള്ളക്കെട്ടില് ഗതാഗതം തടസം രൂപപ്പെട്ടു. ഇന്ത്യന് സമയം രാത്രി 8.56 ഓടെ അറബിക്കടലില് ഭൂചലനം ഉണ്ടായി. മാലിദ്വീപിന്റെയും ലക്ഷദ്വീപിന്റെയും ഇടയില് സമുദ്രനിരപ്പില് നിന്ന് 10 കിലോമീറ്റര് താഴ്ചയിലാണ് ഭൂചലനം ഉണ്ടായിരിക്കുന്നതെന്ന് ദേശീയ ഭൂചലന നിരീക്ഷണ കേന്ദ്രം സ്ഥിരീകരിച്ചു.
ഇതിന്റെ ഫലമായി മാലിദ്വീപിലെ ഏഴ് നഗരങ്ങളില് നേരിയ തോതില് ഭൂചലനം അനുഭവപ്പെട്ടു. റിക്ടര് സ്കെയിലില് 4.5 തീവ്രതയാണ് രേഖപ്പെടുത്തിയിരിക്കുന്നത്. അതുകൊണ്ട് തന്നെ സുനാമിക്ക് സാധ്യതയില്ലെന്നാണ് സ്വകാര്യ നിരീക്ഷണ കേന്ദ്രം മെറ്റ്ബീറ്റ് വെതര് പറയുന്നത്.
