LPG issue School Mid day meal: സ്കൂളിൽ ഉച്ചഭക്ഷണം മുടങ്ങുമോ? ആശങ്ക വേണ്ട പുതിയ മാർഗം സ്വീകരിച്ച് അധികൃതർ
Schools and Kochi’s Samridhi Shift to Firewood: നിലവിൽ ലൈവ് വിഭവങ്ങളുടെ പാചകം ഉൾപ്പെടെയുള്ളവയിൽ നിയന്ത്രണം ഏർപ്പെടുത്തിയിട്ടുണ്ട്. പാചകവാതക വിതരണത്തിലെ തടസ്സം സംസ്ഥാനത്തെ പൊതു ഭക്ഷണ സംവിധാനങ്ങളെ സാരമായി ബാധിച്ചിരിക്കുന്ന സാഹചര്യത്തിലാണ് ഈ അടിയന്തര നീക്കങ്ങൾ.
LPG Shortage in Kerala
തിരുവനന്തപുരം: സംസ്ഥാനത്ത് പാചകവാതക വിതരണത്തിൽ നേരിടുന്ന രൂക്ഷമായ ദൗർലഭ്യം പരിഗണിച്ച് സ്കൂളുകളിൽ ഉച്ചഭക്ഷണം പാകം ചെയ്യുന്നതിനായി വിറകടുപ്പുകൾ ഉപയോഗിക്കാൻ സർക്കാർ അനുമതി നൽകി. കുട്ടികളുടെ ഉച്ചഭക്ഷണ വിതരണം തടസ്സപ്പെടാതിരിക്കാനുള്ള ബദൽ സംവിധാനം എന്ന നിലയിലാണ് പൊതുവിദ്യാഭ്യാസ അഡീഷണൽ ഡയറക്ടർ ഈ താൽക്കാലിക ക്രമീകരണത്തിന് ഉത്തരവിട്ടത്. സ്കൂളുകളിൽ വിറകടുപ്പുകൾ ഉപയോഗിക്കരുതെന്ന മുൻപത്തെ കർശന നിർദ്ദേശത്തിനാണ് ഇപ്പോൾ ഇളവ് നൽകിയിരിക്കുന്നത്.
പാചകവാതകം ലഭ്യമല്ലാത്ത സ്കൂളുകളിൽ മാത്രമേ വിറകടുപ്പ് ഉപയോഗിക്കാവൂ. ഗ്യാസ് വിതരണം സാധാരണ നിലയിലാകുന്ന മുറയ്ക്ക് വിറകടുപ്പുകളുടെ ഉപയോഗം നിർത്തലാക്കണം. നൂൺ ഫീഡിംഗ് സൂപ്പർവൈസർമാരുമായി പൊതുവിദ്യാഭ്യാസ അഡീഷണൽ ഡയറക്ടർ നടത്തിയ ഓൺലൈൻ മീറ്റിംഗിലാണ് ഈ തീരുമാനമെടുത്തത്. ഇതുസംബന്ധിച്ച നിർദ്ദേശങ്ങൾ അടിയന്തരമായി സ്കൂളുകളിലെത്തിക്കാൻ നൂൺ മീൽ ഓഫീസർമാർക്ക് നിർദ്ദേശം നൽകി.
കൊച്ചി ‘സമൃദ്ധി’ ഹോട്ടലിലും മാറ്റം
പാചകവാതക പ്രതിസന്ധി കൊച്ചിയിലെ പ്രശസ്തമായ ജനകീയ ഭക്ഷണശാല സമൃദ്ധിയെയും ബാധിച്ചു. സാധാരണക്കാർക്ക് കുറഞ്ഞ നിരക്കിൽ ഭക്ഷണം നൽകുന്ന ഇവിടെയും പാചകം വിറകടുപ്പിലേക്ക് മാറ്റാനുള്ള നടപടികൾ ആരംഭിച്ചിട്ടുണ്ട്. ഹോട്ടലിന്റെ ദൈനംദിന പ്രവർത്തനം നിലയ്ക്കാതിരിക്കാനാണ് വിറകടുപ്പുകളെ ആശ്രയിക്കുന്നത്.
ALSO READ: വിറക് ഡിപ്പോകൾ, റെയിൽവേയിൽ ഇൻഡക്ഷൻ സ്റ്റൗ… എൽപിജി പ്രതിസന്ധിയിൽ ബദൽ മാർഗങ്ങളുമായി അധികൃതർ
നിലവിൽ ലൈവ് വിഭവങ്ങളുടെ പാചകം ഉൾപ്പെടെയുള്ളവയിൽ നിയന്ത്രണം ഏർപ്പെടുത്തിയിട്ടുണ്ട്. പാചകവാതക വിതരണത്തിലെ തടസ്സം സംസ്ഥാനത്തെ പൊതു ഭക്ഷണ സംവിധാനങ്ങളെ സാരമായി ബാധിച്ചിരിക്കുന്ന സാഹചര്യത്തിലാണ് ഈ അടിയന്തര നീക്കങ്ങൾ.
