Mani Shankar Aiyar: പിണറായി വിജയന് വീണ്ടും മുഖ്യമന്ത്രിയാകും; മണിശങ്കര് അയ്യരുടെ പ്രചവനം വിവാദത്തില്
Kerala Assembly Election 2026: കഴിഞ്ഞ കുറച്ചുവര്ഷങ്ങളായി മിസ്റ്റര് മണിശങ്കര് അയ്യര്ക്ക് കോണ്ഗ്രസുമായി യാതൊരു ബന്ധവുമില്ല, അദ്ദേഹം സംസാരിക്കുന്നതും എഴുതുന്നതും പൂര്ണമായും സ്വന്തം നിലയിലാണ് എന്നാണ് പവന് ഖേരയുടെ പോസ്റ്റ്.
മണി ശങ്കര് അയ്യര്
തിരുവനന്തപുരം: പിണറായി വിജയന് മൂന്നാം തവണയും കേരളത്തിന്റെ മുഖ്യമന്ത്രിയായി തെരഞ്ഞെടുക്കപ്പെടുമെന്ന മുതിര്ന്ന കോണ്ഗ്രസ് നേതാവ് മണിശങ്കര് അയ്യരുടെ പ്രസ്താവന വിവാദത്തില്. പിണറായി വിജയന് ഭരണം നിലനിര്ത്തുമെന്ന് പറഞ്ഞതിന് പിന്നാലെ അയ്യര്ക്കെതിരെ വ്യാപക വിമര്ശനമാണ് കോണ്ഗ്രസിനുള്ളില് നിന്നുയരുന്നത്. അയ്യരുടെ പ്രസ്താവനയുമായി കോണ്ഗ്രസിന് ബന്ധമില്ലെന്ന് മുതിര്ന്ന കോണ്ഗ്രസ് നേതാവ് പവന് ഖേര എക്സില് കുറിച്ചു.
കഴിഞ്ഞ കുറച്ചുവര്ഷങ്ങളായി മിസ്റ്റര് മണിശങ്കര് അയ്യര്ക്ക് കോണ്ഗ്രസുമായി യാതൊരു ബന്ധവുമില്ല, അദ്ദേഹം സംസാരിക്കുന്നതും എഴുതുന്നതും പൂര്ണമായും സ്വന്തം നിലയിലാണ് എന്നാണ് പവന് ഖേരയുടെ പോസ്റ്റ്.
പിണറായി വിജയന് മുഖ്യമന്ത്രി സ്ഥാനത്ത് തുടരുമെന്ന് തനിക്ക് ഉറപ്പുണ്ടെന്നാണ് അയ്യര് പറഞ്ഞത്. വിജയന് ഉദ്ഘാടനം ചെയ്ത് വിഷന് 2031 വികസനവും ജനാധിപത്യവും എന്ന അന്താരാഷ്ട്ര സെമിനാറില് സംസാരിക്കുകയായിരുന്നു അയ്യര്. പഞ്ചയത്തീരാജ് സംവിധാനത്തില് കേരളത്തിന്റെ സ്ഥാനം നിയമപരമായി ഉറപ്പാക്കുന്നതിന് ആവശ്യമായ ഭേദഗതികല് കൊണ്ടുവരണമെന്നും അദ്ദേഹം ആവശ്യപ്പെട്ടു.
കോണ്ഗ്രസ് നേതൃത്വത്തിലുള്ള യുപിഎ സര്ക്കാരിന്റെ കാലത്ത് കേന്ദ്ര പഞ്ചയത്തീരാജ് മന്ത്രിയായി സേവനമനുഷ്ഠിച്ച വ്യക്തിയാണ് അയ്യര്. സര്ക്കാരുമായി ബന്ധപ്പെട്ട് നടക്കുന്ന പരിപാടിയില് നിന്ന് കോണ്ഗ്രസ് മാറിനില്ക്കുന്നതിലുള്ള വിഷമവും അയ്യര് വേദിയില് പങ്കുവെച്ചു.
നേരത്തെ നവകേരള സദസിന്റെ സമാപനവേളയിലും മണിശങ്കര് അയ്യര് ഭാഗമായിരുന്നു. എന്നാല് യുഡിഎഫ് ബഹിഷ്കരിച്ച പരിപാടിയായിരുന്നു ഇത്. സമ്മേളനത്തില് പങ്കെടുക്കരുതെന്ന് കാണിച്ച് തനിക്ക് നിര്ദേശമൊന്നും ലഭിച്ചിട്ടില്ലെന്നായിരുന്നു അന്ന് അയ്യരുടെ വാദം.
