Rahul Mamkootathil: രണ്ടാം പീഡനക്കേസ്: രാഹുൽ മാങ്കൂട്ടത്തിലിൻ്റെ മുൻകൂർ ജാമ്യം റദ്ദാക്കുമോ? നിർണ്ണായക വിധി ഇന്ന്

Rahul Mamkoottathil

തിരുവനന്തപുരം: യൂത്ത് കോൺഗ്രസ് മുൻ അധ്യക്ഷനും പാലക്കാട് എംഎൽഎയുമായ രാഹുൽ മാങ്കൂട്ടത്തിലിനെതിരായ (Rahul Mamkoottathil) രണ്ടാം പീഡനക്കേസിൽ ഇന്ന് നിർണായകം. രാഹുലിന് അനുവദിച്ച മുൻകൂർ ജാമ്യം റദ്ദാക്കണമെന്ന പ്രോസിക്യൂഷൻ ഹർജി ഇന്ന് കോടതി പരി​ഗണിക്കും. തിരുവനന്തപുരം ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയാണ് ഹർജി പരിഗണിക്കുക.

ബംഗളൂരു സ്വദേശിനിയായ യുവതി നൽകിയ പരാതിയിലാണ് രാഹുലിനെതിരെ രണ്ടാമത്തെ പീഡന കേസ് രജിസ്റ്റർ ചെയ്തിരിക്കുന്നത്. ഈ കേസിൽ കടുത്ത നിബന്ധനകളോടെയാണ് നേരത്തെ ​രാഹുലിന് കോടതി മുൻകൂർ ജാമ്യം അനുവദിച്ചത്. എന്നാൽ അതിനിടെ, പരാതിക്കാരിയെ രാഹുൽ വാട്സാപ്പ് വഴി വിളിക്കാൻ ശ്രമിച്ചുവെന്നും പോലീസിൽ പരാതി ലഭിച്ചിരുന്നു.

ALSO READ: വിമത കൺവെൻഷനിലെ വിമർശനം; പി കെ ശശി സിപിഎമ്മിൽ നിന്നും പുറത്തേക്ക്?

പരാതിക്കാരിയെയോ സാക്ഷികളെയോ ഒരു തരത്തിലും സ്വാധീനിക്കാൻ ശ്രമിക്കരുത് എന്ന ജാമ്യവ്യവസ്ഥയുടെ നഗ്നമായ ലംഘനമാണിതെന്നാണ് പ്രോസിക്യൂഷൻ വാദം. ഈ പരാതി കണക്കിലെടുത്ത് പ്രോസിക്യൂഷൻ കോടതിയെ സമീപിക്കുകയായിരുന്നു. പ്രോസിക്യൂഷൻ നൽകിയ ഡിജിറ്റൽ തെളിവുകൾ കോടതി കണക്കിലെടുത്താൽ രാഹുലിൻ്റെ ജാമ്യം റദ്ദാക്കപ്പെടാനുള്ള സാധ്യതയുണ്ട്. ഇത് വരുന്ന തെരഞ്ഞെടുപ്പിനെ അടക്കം ബാധിക്കുകയും ചെയ്തേക്കും.