കളിക്കുന്നതിനിടെ ടാങ്കിൽ വീണു, സഹോദരങ്ങളായ കരുന്നുകൾക്ക് ദാരുണാന്ത്യം

പ്രതീകാത്മക ചിത്രം

പാലക്കാട്‌: പാലക്കാട് രണ്ടു കുരുന്നുകൾക്ക് ദാരുണാന്ത്യം. കളിക്കുന്നതിനിടെ വീട്ടിലെ വാട്ടർ ടാങ്കിൽ വീണാണ് സഹോദരങ്ങൾ മരിച്ചത്. കൊഴിഞ്ഞാമ്പാറ മേനോൻ പാറയിൽ ആണ് സംഭവം. കൊഴിഞ്ഞാമ്പാറ സ്വദേശിയായ ജോൺ കുമാറിന്റെ മക്കളായ അഞ്ചു വയസ്സുകാരി ജെനിഫർ ജൂലിയറ്റും, മൂന്നു വയസ്സുകാരൻ റോബിൻ ക്രിസ്റ്റഫറും ആണ് മരിച്ചത്. കുട്ടികൾ കളിക്കുന്നതിനിടെ അബദ്ധത്തിൽ വാട്ടർ ടാങ്കിലേക്ക് വീണതാണ് എന്നാണ് പ്രാഥമികമായി ലഭിക്കുന്ന സൂചന. കുട്ടികളുടെ മൃതദേഹങ്ങൾ പാലക്കാട് ജില്ലാ ആശുപത്രി മോർച്ചറിയിലേക്ക് മാറ്റുമെന്നാണ് റിപ്പോർട്ട്.

വീട്ടലെ കുളിമുറിയിൽ വെള്ളം ശേഖരിക്കുന്ന ചെറിയ തൊട്ടിയുണ്ടായിരുന്നു. ഇതിൽ വാണാണ് മരണം സംഭവിച്ചത്. അപകടം നടക്കുന്ന സമയത്ത് വീട്ടിൽ കുട്ടികളുടെ അമ്മയും മുത്തശ്ശിയുമാണ് ഉണ്ടായിരുന്നത്. ഇവരുടെ ശ്രദ്ധയിൽ പെടാതെ കുട്ടികൾ വെള്ളത്തിൽ ഇറങ്ങിയപ്പോഴാണ് അപകടം നടന്നത് എന്നാണ് സൂചന. കുട്ടികളെ കാണാതായതിനെ തുടർന്ന് പരിസരത്ത് നോക്കുമ്പോഴാണ്, കുളിമുറിയിലെ തൊട്ടിയിൽ വീണ് കിടക്കുന്നത് കാണുന്നത്. ഉടൻ തന്നെ തൊട്ടടുത്തള്ള സ്വകാര്യ ആശുപത്രിയിൽ എത്തിച്ചു. എന്നാൽ അവിടെ എത്തുമ്പോഴെക്കും മരണം സംഭവിച്ചിരുന്നു. അയൽ വാസികളുടെ സഹായത്തോടെയാണ് കുട്ടികളെ ആശുപത്രയിലേക്ക് എത്തിച്ചത്.

Also Read: 18 മരുന്നുകളുടെ കുറവുണ്ട്, ഒരാഴ്ചക്കുള്ളിൽ പരിഹരിക്കും, കിട്ടാത്തതുണ്ടേൽ പറഞ്ഞാൽ ശരിയാക്കാം: മന്ത്രി മുരളീധരൻ

വളരെ ചെറിയ വെള്ളത്തൊട്ടിയാണ് കുളിമുറിയിൽ ഉള്ളതെന്നും ഇതിൽ കുട്ടികൾ മുമ്പും കളിക്കാറുണ്ടായിരുന്നു എന്നും കേൾക്കുന്നു. എന്നാൽ ആ സമയത്തൊക്കെ വീട്ടുകാരും ഒപ്പമുണ്ടാകാറുണ്ട്. എന്നാൽ ഇന്ന് വീട്ടുകാരുടെ കണ്ണിൽ പെടാതെ കുട്ടികൾ തൊട്ടിയിൽ ഇറങ്ങിയതാണ് ദാരുണമായ സംഭവത്തിന് കാരണമെന്നും അറിയുന്നു. കുറച്ച് നേരമായി കുട്ടികളുടെ ശബ്ദം കേൾക്കാതെ വന്നപ്പോൾ പരിസരത്ത് നോക്കിയപ്പോഴാണ് അപകട വിവരം അറിയുന്നത്.

അതേസമയം ഇന്ന് ആലപ്പുഴയിൽ നിന്നും ഇതിന് സമാനമായ ഒരു ദാരുണമായ വാർത്ത പുറത്തുവന്നിരുന്നു. ഹൗസ് ബോട്ടിൽ നിന്നും വെള്ളത്തിൽ വീണ് രണ്ടര വയസ്സുകാരി മരിക്കുകയായിരുന്നു. തമിഴ്നാട്ടിലെ തിരുനെൽവേലിയിൽ നിന്ന് വിനോദസഞ്ചാരത്തിന് എത്തിയ ആറംഗ സംഘത്തിലെ കുട്ടിയാണ് പുന്നമട കായലിൽ വീണ് മരിച്ചത്. ഹൗസ് ബോട്ടിലെ യാത്രക്കിടയിലാണ് കുട്ടി വെള്ളത്തിൽ വീണത്. കുട്ടി വീണ ഉടൻ തന്നെ ബോട്ട് ജീവനക്കാരും നാട്ടുകാരും ചേർന്ന് തിരച്ചിൽ നടത്തി കുട്ടിയെ കരയ്ക്ക് എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

English Summary

Two small children met a tragic end in Palakkad. The siblings died after falling into a water tank at their home while playing. The incident occurred at Menonpara in Kozhinjampara. The deceased were Jennifer Juliet (5) and Robin Christopher (3), children of John Kumar, a native of Kozhinjampara.