Vidarsa Vinod: വിദര്ശ പൊളിച്ചടുക്കി! ഏഷ്യന് ഗെയിംസില് ഇരട്ട മെഡല് തിളക്കത്തില് മലയാളി താരം
Vidarsa Vinod Asian Games 2026 Silver Medal: ഏഷ്യന് ഗെയിംസില് വിദര്ശ കെ വിനോദിന് ചരിത്രനേട്ടം. വനിതകളുടെ 50 മീറ്റര് റൈഫിള് 3 പൊസിഷനില് താരം വെള്ളി മെഡല് നേടി. 10 മീറ്റര് എയര് റൈഫിള് ടീം ഇനത്തിലും വിദര്ശ നേരത്തെ വെള്ളി സ്വന്തമാക്കിയിരുന്നു.
ജപ്പാനില് നടക്കുന്ന ഏഷ്യന് ഗെയിംസില് മലയാളി താരം വിദര്ശ കെ വിനോദിന് ചരിത്രനേട്ടം. വനിതകളുടെ 50 മീറ്റര് റൈഫിള് 3 പൊസിഷനില് താരം വെള്ളി മെഡല് നേടി. 10 മീറ്റര് എയര് റൈഫിള് ടീം ഇനത്തിലും വിദര്ശ നേരത്തെ വെള്ളി സ്വന്തമാക്കിയിരുന്നു. ഏഷ്യന് ഗെയിംസ് ഷൂട്ടിങില് ആദ്യമായി മെഡല് നേടുന്ന മലയാളി താരമാണ് വിദര്ശ (Image Credit Source: PTI).
ആഷി ചൗക്സി, തിലോത്തമ സെന് എന്നിവരോടൊപ്പമാണ് വിദര്ശ ഇന്ത്യയ്ക്കായി മത്സരിച്ചത്. 50 മീറ്റര് റൈഫിള് 3 പൊസിഷനിലെ വ്യക്തിഗത മത്സരത്തില് ഫൈനലിനും താരം യോഗ്യത നേടി. തിലോത്തമയും വ്യക്തിഗത ഫൈനലിന് യോഗ്യത നേടിയിട്ടുണ്ട്. യോഗ്യതാ റൗണ്ടില് തിലോത്തമ 590 പോയിന്റോടെ മൂന്നാമതെത്തി.
588 പോയിന്റോടെ ആറാമതായിരുന്നു വിദര്ശ. ആഷി ചൗക്സിക്ക് യോഗ്യത നേടാനായില്ല. 585 പോയിന്റാണ് ചൗക്സ് നേടിയത്. ഏഷ്യന് ഗെയിംസ് ഷൂട്ടിങില് ഇന്ത്യ ഇതുവരെ 11 മെഡല് നേടി. കോഴിക്കോട് തിരുവമ്പാടി സ്വദേശിയാണ് വിദര്ശ.
2018-ല് എന്സിസിയിലൂടെയാണ് വിദര്ശ ഷൂട്ടിംഗിലേക്ക് വരുന്നത്. 2019-ല് ഷൂട്ടിംഗ് പ്രൊഫഷനാക്കാന് തീരുമാനിച്ചു. കോഴിക്കോട് തൊണ്ടയാടുള്ള കാലിക്കറ്റ് റൈഫിള് ക്ലബ് റെയ്ഞ്ചിലാണ് താരം പ്രൊഫഷണല് പരിശീലനം ആരംഭിച്ചത്. 2021-ല് മികച്ച പരിശീലനത്തിനായി ഡല്ഹിയിലേക്ക് പോയി.
മനോജ്കുമാറാണ് പരിശീലകന്. ഭര്ത്താവ് മനു എസ് രവി, മറ്റ് കുടുംബാംഗങ്ങള് എന്നിവരുടെ പിന്തുണയാണ് വിദര്ശയുടെ കരുത്ത്. ഇതിന് മുമ്പ് ദേശീയ മത്സരങ്ങളില് താരം നിരവധി മെഡലുകള് നേടിയിട്ടുണ്ട്. പ്രഥമ കേരള ഒളിമ്പിക്സിലും മെഡല് നേടിയിരുന്നു.
