India vs England: ബിസിസിഐയെ വിമർശിച്ച കോലിയെ തള്ളി ഗംഭീർ; അവധിയാഘോഷമല്ലല്ലോ നടക്കുന്നതെന്ന് ചോദ്യം
Gautam Gambhir Against Virat Kohli: ബിസിസിഐയെ വിമർശിച്ച വിരാട് കോലിക്കെതിരെ ഇന്ത്യൻ പരിശീലകൻ ഗൗതം ഗംഭീർ. പര്യടനങ്ങളിൽ കുടുംബാംഗങ്ങളെ ഒപ്പം കൂട്ടുന്ന വിഷയത്തിലാണ് പ്രതികരണം.
കുടുംബാംഗങ്ങളെ പരമ്പരകളിൽ ഒപ്പം കൂട്ടുന്നതുമായി ബന്ധപ്പെട്ട് ബിസിസിഐയുടെ നിബന്ധനയെ വിരാട് കോലി വിമർശിച്ചിരുന്നു. പ്രത്യക്ഷമായി വിമർശിച്ചില്ലെങ്കിലും ഈ നിബന്ധനയിൽ തനിക്ക് നിരാശയുണ്ടായി എന്നും കുടുംബാംഗങ്ങളെ മാറ്റിനിർത്തുന്നത് പരിഹാരമായി കണ്ടു എന്നുമായിരുന്നു താരം പറഞ്ഞത്. (Image Courtesy- Social Media)
കോലിയുടെ ഈ പരാമർശത്തിനെതിരെ ഗൗതം ഗംഭീർ രംഗത്തുവന്നു. കുടുംബം വളരെ പ്രാധാന്യമുള്ളതാണെങ്കിലും അവധിയാഘോഷത്തിനല്ല എത്തിയതെന്ന് മനസ്സിലാക്കണം. അതുകൊണ്ട് താൻ ബിസിസിഐയുടെ നിബന്ധനയെ അനുകൂലിക്കുന്നു എന്നും ഗംഭീർ പറഞ്ഞു.
"കുടുംബം വളരെ പ്രാധാന്യമുള്ളതാണ്. പക്ഷേ, ഒരു കാര്യം മനസ്സിലാക്കണം. നിങ്ങളിവിടെ ഒരു ലക്ഷ്യത്തിനായാണ് വന്നത്. അവധിയാഘോഷമല്ല. ഒരു വലിയ ലക്ഷ്യമുണ്ട്. അതുകൊണ്ട് കുടുംബം ഒപ്പം വരരുത് എന്ന ബിസിസിഐയുടെ തീരുമാനത്തിന് ഞാൻ എതിരല്ല. "- ഗംഭീർ പ്രതികരിച്ചു.
"രാജ്യത്തിൻ്റെ യശസുയർത്തുക എന്നതാണ് നിങ്ങളുടെ ലക്ഷ്യമെങ്കിൽ, ആ ലക്ഷ്യത്തോട് നിങ്ങൾക്ക് പൂർണസമർപ്പണമുണ്ടെങ്കിൽ, ബാക്കിയൊന്നും നോക്കേണ്ടതില്ല. എന്നെ സംബന്ധിച്ചിടത്തോളം മറ്റേതിനെക്കാളും പ്രാധ്യാന്യമേറിയ കാര്യമാണ് ഇത്."- അദ്ദേഹം പറഞ്ഞു.
പര്യടനങ്ങളിൽ കുടുംബാംഗങ്ങളെ ഒപ്പം കൂട്ടരുതെന്നായിരുന്നു ബിസിസിഐയുടെ നിബന്ധന. ടീം അംഗങ്ങൾ ടീം ബസിൽ തന്നെ യാത്ര ചെയ്യണമെന്നും അധിക ലഗേജിനുള്ള ചാർജ് അതാത് താരങ്ങൾ സ്വയം നൽകണമെന്നും ബിസിസിഐയുടെ നിബന്ധനകളിലുണ്ടായിരുന്നു.
