India vs South Africa: ‘നിങ്ങൾക്ക് നാണമുണ്ടോ?’; നാലാം ടി20 ഉപേക്ഷിച്ചതിൽ ബിസിസിഐക്കെതിരെ രൂക്ഷ വിമർശനം
Fans Criticize BCCI: ബിസിസിഐക്കെതിരെ അതിരൂക്ഷ വിമർശനവുമായി ആരാധകർ. ദക്ഷിണാഫ്രിക്കക്കെതിരായ നാലാം ടി20 മുടങ്ങിയതിലാണ് വിമർശനം.
ദക്ഷിണാഫ്രിക്കക്കെതിരായ നാലാം ടി20 ഉപേക്ഷിച്ചതിൽ ബിസിസിഐയ്ക്കെതിരെ രൂക്ഷവിമർശനം. കനത്ത മൂടൽമഞ്ഞിനെ തുടർന്ന് മത്സരം ഉപേക്ഷിച്ചത് ബിസിസിഐയുടെ പിടിപ്പുകേടാണെന്നാണ് ആരാധകരുടെ വിമർശനം. സമൂഹമാധ്യമങ്ങളിലൂടെ നിരവധി ആരാധകരാണ് വിമർശനമുന്നയിച്ചത്. (image Credits- PTI)
ശൈത്യകാലത്ത് ഉത്തരേന്ത്യൻ നഗരങ്ങളിൽ മത്സരങ്ങൾ സംഘടിപ്പിച്ചതിനെ ആരാധകർ ചോദ്യം ചെയ്യുകയാണ്. ഈ സമയത്ത് പല ഉത്തരേന്ത്യൻ നഗരങ്ങളിലും മൂടൽ മഞ്ഞ് വളരെ അധികമായിരിക്കും. ഇതിനൊപ്പം പലയിടത്തെ വായുഗുണനിലവാരവും ഈ സമയത്ത് മോശമായിരിക്കും.
ന്യൂ ഛണ്ഡീഗഡ്, ധരംശാല, ലഖ്നൗ, റാഞ്ചി, റായ്പൂർ, വിശാഖപട്ടണം, കട്ടക്ക്, അഹ്മദാബാദ്, ഗുവാഹത്തി, കൊൽക്കത്ത എന്നീ വേദികളിലാണ് ഇന്ത്യ -ദക്ഷിണാഫ്രിക്ക പരമ്പര നടന്നത്. ലഖ്നൗ, ന്യൂ ഛണ്ഡീഗഡ്, ധരംശാല എന്നീ വേദികളിൽ ഈ സമയത്ത് വായുഗുണനിലവാരവും മോശമായിരിക്കും.
ഇതൊന്നും പരിഗണിക്കാതെയാണ് ബിസിസിഐ വേദികൾ അനുവദിച്ചതെന്ന് ആരാധകർ കുറ്റപ്പെടുത്തുന്നു. പണം മുടക്കി ടിക്കറ്റെടുത്ത് കളി കാണാൻ വന്ന ആരാധകരെ അപമാനിക്കുന്ന നിലപാടാണ് ബിസിസിഐയുടേതെന്നും വിമർശനമുണ്ട്. നാളെയാണ് പരമ്പരയിലെ അവസാന മത്സരം.
പരിക്കേറ്റ ശുഭ്മൻ ഗില്ലിന് പകരം ലഖ്നൗവിലെ മത്സരത്തിൽ സഞ്ജു കളിക്കുമെന്നായിരുന്നു സൂചനകൾ. എന്നാൽ, കളി ഉപേക്ഷിച്ചതോടെ സഞ്ജുവിൻ്റെ അവസരം നഷ്ടമായി. അഹ്മദാബാദിൽ നടക്കുന്ന അവസാന മത്സരത്തിൽ ശുഭ്മൻ ഗിൽ കളിക്കുമെന്നും സൂചനയുണ്ട്.
