Mustafizur Rahman: മുസ്തഫിസുറിനെ റിലീസാക്കുമ്പോൾ കൊൽക്കത്ത മുടക്കിയ 9.2 കോടി രൂപ എവിടെപ്പോകും?; നിയമം അറിയാം
Mustafizur Rahman IPL Auction Price: മുസ്തഫിസുർ റഹ്മാനെ റിലീസ് ചെയ്ത കൊൽക്കത്ത മുടക്കിയ 9.2 കോടി രൂപ എവിടെപ്പോകും. ആ നിയമം എങ്ങനെയെന്നറിയാം.
ബിസിസിഐയുടെ നിർദ്ദേശത്തിന് പിന്നാലെ ബംഗ്ലാദേശ് പേസർ മുസ്തഫിസുർ റഹ്മാനെ കൊൽക്കത്ത നൈറ്റ് റൈഡേഴ്സ് ടീമിൽ നിന്ന് റിലീസ് ചെയ്തിരിക്കുകയാണ്. എന്നാൽ, മുസ്തഫിസുറിനായി കൊൽക്കത്ത നൈറ്റ് റൈഡേഴ്സ് മുടക്കിയ 9.2 കോടി രൂപ എവിടെപ്പോകും? അതറിയാം.
സാധാരണ രീതിയിൽ ഒരു താരത്തെ ടീമിലെടുത്തുകഴിഞ്ഞ് റിലീസ് ചെയ്താൽ ആ തുക കിട്ടില്ല. താരം സ്വമേധയാ പിന്മാറിയാലുള്ള നിയമം വേറെ. ടീം റിലീസ് ചെയ്താൽ ഇതാണ് നിയമം. എന്നാൽ, ഇവിടെ ബിസിസിഐയുടെ നിർദ്ദേശപ്രകാരമെടുത്ത തീരുമാനമായതിനാൽ കുറച്ച് മാറ്റമുണ്ട്.
ക്രിക്കറ്റല്ലാത്ത കാരണങ്ങൾ കാരണം, ബിസിസിഐയുടെ നിർദ്ദേശപ്രകാരം ഒരു താരത്തെ ഒരു ടീമിന് റിലീസ് ചെയ്യേണ്ടിവന്നാൽ, ലേലത്തിൽ ആ താരത്തിനായി ടീം മുടക്കിയ മുഴുവൻ തുകയും തിരികെലഭിക്കും. അതായത് മുസ്തഫിസുറിനായി മുടക്കിയ 9.2 കോടി രൂപ നഷ്ടമാവില്ല.
ഈ തുക ഉപയോഗിച്ച് ലേലത്തിൽ ഇതിനകം രജിസ്റ്റർ ചെയ്തിട്ടുള്ള താരങ്ങളിൽ നിന്ന് ഒരു വിദേശതാരത്തെ കൊൽക്കത്തയ്ക്ക് ടീമിലെത്തിക്കാം. ജെറാൾഡ് കോട്ട്സിയ, ഷോൺ ആബട്ട്, അൽസാരി ജോസഫ്, ഝൈ റിച്ചാർഡ്സൺ തുടങ്ങിയ താരങ്ങളാണ് ലഭ്യമായിട്ടുള്ളത്.
ബംഗ്ലാദേശിൽ ന്യൂനപക്ഷങ്ങൾക്കെതിരെ നടക്കുന്ന അതിക്രമങ്ങളുടെ പശ്ചാത്തലത്തിലാണ് കൊൽക്കത്തയ്ക്കെതിരെ വിമർശനം കടുത്തത്. കൊൽക്കത്ത നൈറ്റ് റൈഡേഴ്സ് ഉടമയായ ഷാരൂഖ് ഖാനെതിരെയും വിമർശനങ്ങളുയർന്നു. ഇതിനൊടുവിലാണ് ബിസിസിഐയുടെ നിർദ്ദേശം.
