Kane Williamson: കളി മതിയാക്കി കെയിൻ വില്ല്യംസൺ; പുതിയ പിള്ളേർ കളിക്കട്ടെ എന്ന് താരം
Kane Williamson Retires: ക്രിക്കറ്റിൽ നിന്ന് വിരമിക്കൽ പ്രഖ്യാപിച്ച് കെയിൻ വില്ല്യംസൺ. 2026 ടി20 ലോകകപ്പ് മുന്നിൽ കണ്ടാണ് പ്രഖ്യാപനം.
ടി20 ക്രിക്കറ്റ് മതിയാക്കുന്നതായി ന്യൂസീലൻഡ് ഇതിഹാസതാരം കെയിൻ വില്ല്യംസൺ. 2026 ടി20 ലോകകപ്പിലേക്ക് മാസങ്ങൾ മാത്രം നീണ്ടുനിൽക്കുമ്പോഴാണ് വില്ല്യംസൺ വിരമിക്കൽ പ്രഖ്യാപനം നടത്തിയിരിക്കുന്നത്. പുതിയ താരങ്ങൾക്കായി വഴിമാറുകയാണെന്ന് അദ്ദേഹം പറഞ്ഞു. (Image Credits- PTI)
93 മത്സരങ്ങൾ നീണ്ട കരിയറിനാണ് 35 വയസുകാരൻ അവസാനം കുറിച്ചത്. ടി20യിൽ ന്യൂസീലൻഡിനായി ഏറ്റവുമധികം റൺസ് നേടിയ താരങ്ങളുടെ പട്ടികയിൽ വില്ല്യംസൺ രണ്ടാം സ്ഥാനത്താണ്. 18 ഫിഫ്റ്റികൾ സഹിതം 33 ശരാശരിയിൽ താരം 2575 റൺസാണ് ആകെ നേടിയത്.
2011ൽ ആദ്യ ടി20 കളിച്ച താരം ആകെ കളിച്ച 93 മത്സരങ്ങളിൽ 75 എണ്ണത്തിൽ ടീമിനെ നയിച്ചു. 2016, 22 ലോകകപ്പുകളിൽ ടീമിനെ സെമിയിലെത്തിച്ച വില്ല്യംസണ് 2021 ലോകകപ്പിൽ ന്യൂസീലൻഡിനെ ഫൈനലിലെത്തിക്കാനും കഴിഞ്ഞു. കിരീടം നേടാൻ അദ്ദേഹത്തിന് സാധിച്ചില്ല.
"ലഭിച്ച ഓർമ്മകൾക്കും എക്സ്പീരിയൻസിനും നന്ദി. എനിക്കും ടീമിനും ഇതാണ് കൃത്യമായ സമയം. അടുത്ത ലോകകപ്പ് ലക്ഷ്യമാക്കി നീങ്ങുന്ന ടീമിന് എൻ്റെ തീരുമാനം കൂടുതൽ വ്യക്തത നൽകും. ടി20 കളിക്കാൻ ഒരുപാട് താരങ്ങളുണ്ട്."- വിരമിക്കൽ പ്രഖ്യാപനത്തിൽ വില്ല്യംസൺ പറഞ്ഞു.
"പുതിയ താരങ്ങൾക്ക് ലോകകപ്പിന് മുൻപ് തയ്യാറാവാൻ സമയം ലഭിക്കണം. മിച്ചൽ സാൻ്റ്നർ വളരെ മികച്ച ഒരു ക്യാപ്റ്റനാണ്. തൻ്റെ ടീമിൽ അദ്ദേഹത്തിന് സ്വന്തമായ ശൈലിയുണ്ട്. ഈ ഫോർമാറ്റിൽ ടീമിനെ പിന്തുണക്കേണ്ട സമയമാണിത്. അത് ഞാൻ തുടർന്നും ചെയ്യും."- അദ്ദേഹം കൂട്ടിച്ചേർത്തു.
