മാജിക് അല്ല, ടെക്നോളജി! ഫോണിന് പുറകിൽ മിനി ഡിസ്പ്ലേയുമായി ലാവ വിരാട് കർവ് സെപ്റ്റംബർ 21ന് ഇന്ത്യയിൽ
Lava Virat Curve to launch in India on September 21: ഇന്ത്യയിൽ 'ലാവ വിരാട് കർവ്' സെപ്റ്റംബർ 21-ന് ഉച്ചയ്ക്ക് 12:00ന് ലോഞ്ച് ചെയ്യും. ഇത് ഒരു മിഡ്-റേഞ്ച് മോഡലാണ്. മുൻ മോഡലുകളെ അപേക്ഷിച്ച് മികച്ച ഡിസൈനും ഹാർഡ്വെയർ അപ്ഗ്രേഡുകളും സഹിതമാണ് ഈ ലാവ ഫോൺ എത്തുന്നത്. ക്യാമറ മൊഡ്യൂളിൽ നേരിട്ട് ഘടിപ്പിച്ചിരിക്കുന്ന മിനി ഡിസ്പ്ലേയാണ് ഈ ലാവ ഫോണിന്റെ മുഖ്യ ആകർഷണം.
ലാവ വിരാട് കർവ് (Lava Virat Curve) സെപ്റ്റംബർ 21-ന് ഉച്ചയ്ക്ക് 12ന് ഇന്ത്യയിൽ ലോഞ്ച് ചെയ്യും. മിഡ് റേഞ്ചിൽ ഒരു പുതിയ സ്മാർട്ട്ഫോൺ തേടുന്നവർക്കും നല്ലൊരു കർവ്ഡ് ഡിസ്പ്ലേ സ്മാർട്ട്ഫോൺ ഉപയോഗിക്കാൻ ഇഷ്ടപ്പെടുന്നവർക്കും പരിഗണിക്കാൻ കഴിയും വിധത്തിലാണ് ലാവ വിരാട് കർവ് എത്തുന്നത്. (Image credit: Lava)
റിയർ പാനലിലെ മിനി ഡിസ്പ്ലേയാണ് ലാവ വിരാട് കർവിന്റെ ഹൈലൈറ്റ്. ഫോൾഡബിൾ സ്മാർട്ട്ഫോണുകൾ സജീവമായ ഇക്കാലത്തും സ്മാർട്ട്ഫോണിന്റെ പിന്നിലും ഒരു ഡിസ്പ്ലേയുള്ളത് പലർക്കും ഇപ്പോഴും ഒരു കൗതുകമുണർത്തുന്ന കാര്യമാണ്. റിയർ പാനലിൽ മിനി ഡിസ്പ്ലേ സഹിതം ഇതിന് മുൻപും ലാവ വിവിധ മോഡലുകൾ പുറത്തിറക്കിയിട്ടുണ്ട്.
ലാവ ഫോണുകളിൽ മിനി ഡിസ്പ്ലേ എന്നത് പുതുമയുള്ള കാര്യമല്ലെങ്കിലും വിരാട് കർവിനെ ലോഞ്ചിന് മുമ്പ് തന്നെ ഏറ്റവും ശ്രദ്ധേയമാക്കുന്നത് അതിലെ മിനി ഡിസ്പ്ലേ കൂടിയാണ്. ഇത് റിയർ ക്യാമറ മൊഡ്യൂളിൽ നേരിട്ട് ഘടിപ്പിച്ചിരിക്കുന്നു. ബാറ്ററി ചാർജ് ശതമാനം, വോളിയം, നോട്ടിഫിക്കേഷനുകൾ, ടൈം, കസ്റ്റമൈസ് ചെയ്യാവുന്ന ഇമോജികൾ എന്നിവ ഇതിൽ കാണാൻ സാധിക്കും.
ഒക്ടാ-കോർ മീഡിയടെക് ഡൈമെൻസിറ്റി 7100 ചിപ്സെറ്റ് കരുത്തിലാണ് ഈ ലാവ ഫോൺ എത്തുക. 6GB LPDDR5 റാം (+6GB വെർച്വൽ റാം പിന്തുണ), 128GB ഇന്റേണൽ സ്റ്റോറേജ് എന്നിവയും ഇതിലുണ്ട്. ഡ്യുവൽ സ്റ്റീരിയോ സ്പീക്കറുകൾ, ഡ്യുവൽ മൈക്രോഫോണുകൾ, ഒപ്റ്റിക്കൽ ഇൻ-ഡിസ്പ്ലേ ഫിംഗർപ്രിന്റ് സ്കാനർ എന്നിവയും ഇതിന്റെ ഫീച്ചറുകളിൽ ഉൾപ്പെടുന്നു.
6.67 ഇഞ്ച് 3D കർവ്ഡ് AMOLED മെയിൻ ഡിസ്പ്ലേ ആണ് ഈ ലാവ ഫോണിലുള്ളത്. ഇത് Full-HD+ (2400 × 1080) റെസല്യൂഷൻ, 120Hz റിഫ്രഷ് റേറ്റ്, 1,100 നിറ്റ്സ് പീക്ക് ബ്രൈറ്റ്നസ്, 93% സ്ക്രീൻ-ടു-ബോഡി റേഷ്യോ സഹിതം എത്തുന്നു. IP64 റേറ്റിങ്, MIL-STD-810H മിലിട്ടറി-ഗ്രേഡ് സർട്ടിഫിക്കേഷൻ എന്നിവയും ഉണ്ട്.
45W വയർഡ് ഫാസ്റ്റ് ചാർജിംഗ് പിന്തുണയ്ക്കുന്ന 6,000mAh ബാറ്ററി, ഡ്യുവൽ ക്യാമറ മൊഡ്യൂൾ (50MP സോണി IMX752 പ്രൈമറി സെൻസർ സഹിതം), 8MP പഞ്ച്-ഹോൾ സെൽഫി ക്യാമറ എന്നിവയും ഇതിലുണ്ട്. ആൻഡ്രോയിഡ് 16 അസിസ്ഥാനമാക്കിയാണ് പ്രവർത്തിക്കുക. രണ്ട് വർഷത്തെ OS അപ്ഗ്രേഡുകളും മൂന്ന് വർഷത്തെ സുരക്ഷാ അപ്ഡേറ്റുകളും ലഭിക്കും. വീഗൻ ലെതർ ബാക്ക് ഫിനിഷിൽ 'ഹെറിറ്റേജ് ഇൻഡിഗോ', 'മക്രാന ഐവറി' കളർ ഓപ്ഷനുകളിൽ എത്തുന്ന ഈ ഫോൺ ലോഞ്ചിന് ശേഷം ഫ്ലിപ്പ്കാർട്ട് വഴി വാങ്ങാനാകും.
