Mohammed Shami: ‘പേപ്പട്ടികളെ പേടിയാണെങ്കിൽ പണ്ടേ ഞാൻ ഭയന്നേനെ’; ഷമിയെ ലക്ഷ്യമിട്ട് ഇൻസ്റ്റഗ്രാം പോസ്റ്റുമായി മുൻ ഭാര്യ
Hasin Jahan Against Mohammed Shami: മുഹമ്മദ് ഷമിയ്ക്കെതിരെ മുൻ ഭാര്യ ഹസിൻ ജഹാൻ്റെ ഇൻസ്റ്റഗ്രാം പോസ്റ്റ്. അടുത്തിടെ നൽകിയ അഭിമുഖത്തിൽ ഷമി നടത്തിയ പരാമർശങ്ങൾക്കെതിരെയാണ് ഹസിൻ രംഗത്തുവന്നത്.
മുഹമ്മദ് ഷമിയ്ക്കെതിരെ ഒളിയമ്പുമായി മുൻ ഭാര്യ ഹസിൻ ജഹാൻ. തൻ്റെ ഇൻസ്റ്റഗ്രാം ഹാൻഡിലിലൂടെയാണ് ഹസിൻ ജഹാൻ ഷമിക്കെതിരെ രംഗത്തുവന്നത്. ന്യൂസ്24ന് നൽകിയ അഭിമുഖത്തിൽ ഷമി നടത്തിയ പരാമർശങ്ങൾക്കെതിരെയാണ് ഹസിൻ്റെ ഇൻസ്റ്റഗ്രാം പോസ്റ്റ്. (Image Courtesy- Hasin Jahan Instagram)
"എനിക്ക് പേപ്പട്ടികളെ പേടിയാൺകിൽ 2018ൽ തന്നെ ഞാൻ ഭയന്നേനെ. എന്നെ ഭയപ്പെടുത്താൻ കഴിവിൻ്റെ പരമാവധി ശ്രമിച്ചോളൂ. നശിപ്പിക്കാൻ ശ്രമിച്ചോളൂ. പക്ഷേ, അള്ളാഹുവിൻ്റെ അനുഗ്രഹത്താൽ ഞാൻ ഇനിയും കരുത്തയാവും."- ഹസിൻ ജഹാൻ തൻ്റെ ഇൻസ്റ്റഗ്രാം ഹാൻഡിലിൽ കുറിച്ചു.
കഴിഞ്ഞ ദിവസം നൽകിയ അഭിമുഖത്തിൽ ഹസിൻ ജഹാനുമായ വിവാഹത്തെപ്പറ്റിയും വിവാഹമോചനത്തെപ്പറ്റിയും ഷമി പ്രതികരിച്ചിരുന്നു. ഇതുമായി ബന്ധപ്പെട്ടാണ് ഹസിൻ ജഹാൻ്റെ ഇൻസ്റ്റഗ്രാം പോസ്റ്റ്. പോസ്റ്റിൽ പേര് സൂചിപ്പിച്ചിട്ടില്ലെങ്കിലും ഹസിൻ്റെ ഉദ്ദേശ്യം ഷമി തന്നെയാണെന്ന് വ്യക്തം.
"അത് വിട്. ഞാൻ ഭൂതകാലത്തെയോർത്ത് പശ്ചാത്തപിക്കാറില്ല. കഴിഞ്ഞത് കഴിഞ്ഞു. ഞാൻ ഉൾപ്പെടെ ആരെയും കുറ്റപ്പെടുത്താനില്ല. എനിക്ക് ക്രിക്കറ്റിൽ ശ്രദ്ധിച്ചാൽ മതി. വിവാദങ്ങൾ ആവശ്യമില്ല" എന്നായിരുന്നു വിവാഹത്തെപ്പറ്റിയുള്ള ചോദ്യത്തോട് മുഹമ്മദ് ഷമി നൽകിയ മറുപടി.
ശിഖർ ധവാൻ, യുസ്വേന്ദ്ര ചഹാൽ തുടങ്ങിയവരുടെ വിവാഹമോചനവുമായി ബന്ധപ്പെട്ട് പ്രതികരിക്കാനില്ലെന്നും ഷമി പറഞ്ഞു. അതന്വേഷിക്കേണ്ടത് നിങ്ങളാണ്. മറ്റേ ഭാഗത്തേക്ക് കൂടി നോക്കൂ. താൻ ക്രിക്കറ്റിലാണ് ശ്രദ്ധ കേന്ദ്രീകരിക്കുന്നത്, വിവാദങ്ങളിലല്ല എന്നും ഷമി കൂട്ടിച്ചേർത്തു.
