Rohit Sharma: രോഹിത് ശർമ്മ കൊൽക്കത്തയിലേക്കോ?; മറുപടിയുമായി മുംബൈ ഇന്ത്യൻസ്
Rohit Sharma Trade To KKR: രോഹിത് ശർമ്മ ട്രേഡിങ് വഴി കൊൽക്കത്തയിലേക്കെന്ന അഭ്യൂഹങ്ങൾ തള്ളി മുംബൈ ഇന്ത്യൻസ്. എക്സ് ഹാൻഡിലിലൂടെയാണ് അറിയിപ്പ്.
രോഹിത് ശർമ്മ കൊൽക്കത്ത നൈറ്റ് റൈഡേഴ്സിലേക്കെന്ന അഭ്യൂഹങ്ങൾക്ക് മറുപടിയുമായി മുംബൈ ഇന്ത്യൻസ്. തങ്ങളുടെ എക്സ് പോസ്റ്റിലൂടെയാണ് പ്രചരിക്കുന്ന വാർത്തകൾ വ്യാജമാണെന്ന് വ്യംഗ്യാർത്ഥമുള്ള പോസ്റ്റിലൂടെ മുംബൈ ഇന്ത്യൻസ് അറിയിച്ചത്. (Image Credits- PTI)
രോഹിത് ശർമ്മ ട്രേഡിംഗിലൂടെ കൊൽക്കത്തയിലെത്തുമെന്നായിരുന്നു പ്രചാരണം. രോഹിതിൻ്റെ അടുത്ത സുഹൃത്തായ അഭിഷേക് നായർ കൊൽക്കത്ത നൈറ്റ് റൈഡേഴ്സിൻ്റെ പരിശീലകനായതോടെ ഈ പ്രചാരണങ്ങൾ ശക്തി പ്രാപിച്ചു. എന്നാൽ, ഇത് മുംബൈ തന്നെ തള്ളിയിരിക്കുകയാണ്.
രോഹിത് ശർമ്മയുടെ ഒരു ചിത്രം പങ്കുവച്ച് 'സൂര്യൻ നാളെ വീണ്ടും ഉദിക്കുമെന്ന കാര്യം ഉറപ്പാണ്. പക്ഷേ, രാത്രിയിൽ അത് ബുദ്ധിമുട്ടെന്നല്ല, നടക്കാത്ത കാര്യമാണ്' എന്ന് മുംബൈ കുറിച്ചു. രാത്രി (K)night എന്ന് എഴുതിയതും ഷാരൂഖ് ഖാൻ സിനിമയായ ഡോണിലെ ഡയലോഗുമാണ് ശ്രദ്ധേയം.
കൊൽക്കത്ത നൈറ്റ് റൈഡേഴ്സ് ഉടമയായ ഷാരൂഖ് ഖാൻ്റെ ഡോൺ എന്ന സിനിമയിലെ ഡയലോഗാണ് മുംബൈ ഉപയോഗിച്ചത്. ഇതോടെ രോഹിത് കൊൽക്കത്തയിലേക്കെന്ന അഭ്യൂഹങ്ങൾക്ക് മുംബൈ ഇന്ത്യൻസ് തന്നെ അവസാനം കുറിച്ചിരിക്കുകയാണെന്ന് ആരാധകർ പറയുന്നു.
നിലവിൽ മുംബൈ ഇന്ത്യൻസ് ക്യാപ്റ്റനല്ലെങ്കിലും ടീമിലെ പ്രധാന താരമാണ് രോഹിത് ശർമ്മ. രോഹിതിനെ കൊൽക്കത്ത നൈറ്റ് റൈഡേഴ്സ് ട്രേഡിനായി ശ്രമിക്കുന്നു എന്ന അഭ്യൂഹങ്ങൾ പുറത്തുവന്നെങ്കിലും ഇക്കാര്യത്തിൽ യാതൊരു സ്ഥിരീകരണവും ഉണ്ടായിരുന്നില്ല.
