Bajaj Pulsar NS400Z: അപ്പൊ സെറ്റ്! പുതിയ ബജാജ് പൾസർ NS400Z വിപണിയിൽ
New Bajaj Pulsar NS400Z 2026: പരിഷ്കരിച്ച പൾസർ NS400Z മോഡലിനെ ബജാജ് ഔദ്യോഗികമായി പുറത്തിറക്കി. 1,90,015 രൂപയാണ് വാഹനത്തിന്റെ ഡൽഹി എക്സ്-ഷോറൂം വില. ഈ മോഡലിൽ വ‌ന്നിരിക്കുന്ന പ്രധാന മാറ്റങ്ങൾ എന്തൊക്കെയെന്നും പുതിയതായി കൂട്ടിച്ചേർത്ത് ഫീച്ചറുകൾ എന്താണെന്നും വിശദമായി അറിയാം.
ഇൻസ്ട്രുമെന്റ് ക്ലസ്റ്ററിലും കണക്റ്റഡ് ഫീച്ചറുകളിലുമാണ് NS400Z ൽ പ്രധാന മാറ്റങ്ങൾ വന്നിരിക്കുന്നത്. ഇതുവരെ ഉപയോഗിച്ചിരുന്ന ബോണ്ടഡ്-ഗ്ലാസ് കളർ LCD-ക്ക് പകരമായി 5-ഇഞ്ച് TFT ഡിസ്‌പ്ലേ ആണ് ഇപ്പോൾ നൽകിയിരിക്കുന്നത്. ടേൺ ബൈ ടേൺ നാവിഗേഷനായുള്ള ഗൂഗിൾ മാപ്‌ മിററിംഗ്, മ്യൂസിക് കൺട്രോളുകൾ, ഡോക്യുമെന്റ് സ്റ്റോറേജ് എന്നീ ഫീച്ചറുകളും വാഹനത്തിലുണ്ട്. ( Image Credit Source Bajaj Website)
ബ്ലൂടൂത്ത് വഴിയാണ് കണക്റ്റിവിറ്റി സൗകര്യം ഒരുക്കിയിരിക്കുന്നത്. പെട്ടെന്നുള്ള ബ്രേക്കിംഗ് സമയത്ത് പിന്നാലെ വരുന്ന വാഹനങ്ങൾക്ക് മുന്നറിയിപ്പ് നൽകാനായി ഹസാർഡ് ലൈറ്റുകൾ പ്രവർത്തിപ്പിക്കുന്ന 'പാനിക് ബ്രേക്ക് അലേർട്ട്' സംവിധാനവും ബജാജ് ഈ പുതിയ മോഡലിൽ അവതരിപ്പിച്ചിട്ടുണ്ട്.
ഈ വർഷം പൾസർ നിരയിലെ മറ്റ് മോഡലുകളിലും ഇതേ 5-ഇഞ്ച് TFT യൂണിറ്റ് ഘട്ടംഘട്ടമായി കമ്പനി അവതരിപ്പിച്ചിരുന്നു. ആദ്യം N160-ൽ, പിന്നീട് പൾസർ 125, 150 മോഡലുകളിൽ, ഇപ്പോൾ NS400Z-ലും.എന്നാൽ പുതിയ മോഡലിൽ മെക്കാനിക്കൽ സൈഡിൽ മാറ്റങ്ങൾ ഒന്നും തന്നെയില്ല.
6-സ്പീഡ് ഗിയർബോക്സിൽ 349cc സിംഗിൾ-സിലിണ്ടർ ലിക്വിഡ്-കൂൾഡ് എൻജിനാണ് പുതിയ മോഡലിലും തുടരുന്നത്. 9,000 rpm-ൽ 40hp കരുത്തും 7,500 rpm-ൽ 33 Nm ടോർക്കും ഈ എൻജിൻ നൽകുന്നു. നാല് റൈഡ് മോഡുകൾ, ട്രാക്ഷൻ കൺട്രോൾ, 43 mm USD ഫ്രണ്ട് ഫോർക്ക്, ഡ്യുവൽ-ചാനൽ ABS, റേഡിയൽ ടയറുകൾ എന്നിവയും അതേപടി നിലനിർത്തിയിരിക്കുന്നു.
1.90 ലക്ഷം രൂപ വിലയുള്ള അപഡേറ്റഡ് NS400Z-ന് പഴയ മോഡലിനേക്കാൾ വില അൽപം ഉയർന്നിട്ടുണ്ട്. 300 മുതൽ 400 സിസി വരെയുള്ള നേക്ക‍‍ഡ് ബൈക്ക് വിഭാഗത്തിൽ KTM 390 Duke ഉൾപ്പെടെയുള്ള മറ്റ് മോഡലുകളോടാണ് ഈ വാഹനം മത്സരിക്കുന്നത്.
