Hardik-Krunal: പരസ്പരം സ്‌നേഹമില്ല; ശത്രുക്കളെ പോലെയുള്ള പെരുമാറ്റം; ഹാര്‍ദ്ദിക്കും ക്രുണാലും അടിച്ചുപിരിഞ്ഞോ?

ക്രുനാൽ പാണ്ഡ്യയും ഹാർദിക് പാണ്ഡ്യയും

Hardik Pandya vs Krunal Pandya: ക്രുണാല്‍ പാണ്ഡ്യയും, ഹാര്‍ദ്ദിക് പാണ്ഡ്യയും തമ്മില്‍ അസ്വാരസ്യത്തിലെന്ന് സംശയിച്ച് ആരാധകര്‍. ഇരുവരും തമ്മില്‍ പിണക്കത്തിലാണെന്ന് നേരത്തെ അഭ്യൂഹങ്ങളുണ്ടായിരുന്നെങ്കിലും, കഴിഞ്ഞ ദിവസം നടന്ന ആര്‍സിബി-മുംബൈ ഇന്ത്യന്‍സ് മത്സരത്തിന് ശേഷമാണ് സംശയങ്ങള്‍ ബലപ്പെട്ടത്. ശത്രുക്കളെ പോലെയായിരുന്നു ഇരുവരും ഗ്രൗണ്ടില്‍ പരസ്പരം പെരുമാറിയതെന്ന് ആരാധകര്‍ പറയുന്നു.

വ്യത്യസ്ത ടീമുകളില്‍ കളിക്കുമ്പോഴും ഗ്രൗണ്ടില്‍ സഹോദര സ്‌നേഹം പങ്കിടുന്നവരായിരുന്നു ഹാര്‍ദ്ദിക്കും, ക്രുണാലും. എന്നാല്‍ ഇത്തവണ ഇരുവരും പരസ്പരം സംസാരിക്കുന്നതുപോലും കണ്ടില്ല. ഹാര്‍ദ്ദിക് ഔട്ടായപ്പോള്‍ ‘അഗ്രസീവ്’ ആയാണ് ക്രുണാല്‍ ആഘോഷിച്ചത്. മത്സരശേഷം ഇരുവരും ഹസ്തദാനം പോലും ഒഴിവാക്കിയെന്നും അഭ്യൂഹമുണ്ട്.

ഇന്ത്യയുടെ ടി20 ലോകകപ്പ് കിരീടനേട്ടത്തിന് ശേഷമാണ് പാണ്ഡ്യ ബ്രദേഴ്‌സ് തമ്മില്‍ അത്ര രസത്തില്‍ അല്ലെന്ന സംശയം ആരാധകര്‍ക്കുണ്ടായത്. ലോകകപ്പ് നേടിയ ടീമില്‍ ഹാര്‍ദ്ദിക്കും ഭാഗമായിരുന്നു. എന്നാല്‍ കിരീടനേട്ടത്തിന് ശേഷം ഹാര്‍ദ്ദിക്കിനെ പ്രശംസിച്ചുകൊണ്ടുള്ള പോസ്റ്റ് ക്രുണാലോ, അദ്ദേഹത്തിന്റെ ഭാര്യ പാങ്കുരി ശര്‍മയോ സോഷ്യല്‍ മീഡിയയില്‍ പങ്കുവെച്ചില്ല.

Also Read: RCB vs MI: ദൈവത്തിന്റെ പോരാളികള്‍ക്ക് ശനിദശ; ആര്‍സിബിയോടും തോറ്റു

നേരത്തെ ഇരുവരും പരസ്പരം സോഷ്യല്‍ മീഡിയ പോസ്റ്റുകളില്‍ കമന്റ് ചെയ്യുന്ന പതിവുണ്ടായിരുന്നു. സമീപകാലത്ത് ഒരുമിച്ചുള്ള ചിത്രങ്ങള്‍ പോലും പങ്കുവെച്ചിട്ടില്ല. മഹിക ശര്‍മയുമായുള്ള ഹാര്‍ദ്ദിക്കിന്റെ പ്രണയബന്ധത്തിന് ശേഷമാണ് പാണ്ഡ്യ ബ്രദേഴ്‌സിന്റെ ബന്ധത്തില്‍ വിള്ളല്‍ വീണതെന്നാണ് ആരാധകരുടെ അനുമാനം. എന്നാല്‍ ഹാര്‍ദ്ദിക്കോ, ക്രുണാലോ ഇതുസംബന്ധിച്ച് ഇതുവരെ പ്രതികരിച്ചിട്ടില്ല.