പ്രിന്റര്‍ പണിമുടക്കി! ക്രിക്കറ്റ് മത്സരത്തില്‍ വമ്പന്‍ തോല്‍വി, കാരണം കേട്ടോ നിങ്ങള്‍?

ക്രിക്കറ്റ് മത്സരത്തില്‍ ഒരു ടീം തോല്‍ക്കുന്നതിന് കാരണം ബാറ്റിങ്ങിലോ ബൗളിങ്ങിലോ പിഴവുകള്‍ സംഭവിച്ചിട്ടാകാം. എന്നാല്‍ വടക്കന്‍ അയര്‍ലന്‍ഡില്‍ നടന്ന ഒരു മത്സരത്തില്‍ തോല്‍വിക്ക് കാരണമായത് കളിക്കാരുടെ പ്രകടനമല്ല, മറിച്ച് ഒരു പ്രിന്ററിന്റെ തകരാറാണ്. കനത്ത മഴയെ തുടര്‍ന്ന് മത്സരം നിര്‍ത്തിവെച്ചതിന് പിന്നാലെയാണ് സാങ്കേതിക പ്രശ്‌നം ടീമിന് തിരിച്ചടിയായത്.

നോര്‍ത്ത് വെസ്റ്റ് ക്രിക്കറ്റ് യൂണിയന്‍ പ്രീമിയര്‍ ലീഗില്‍ ബാലിസ്പാലന്‍ സ്വന്തം ഗ്രൗണ്ടില്‍ എഗ്ലിന്റണെതിരെയായിരുന്നു മത്സരത്തില്‍ ഇറങ്ങിയത്. ആദ്യം ബാറ്റ് ചെയ്ത എഗ്ലിന്റണ്‍ 48.1 ഓവറില്‍ 159 റണ്‍സിന് പുറത്തായി. മറുപടി ബാറ്റിംഗിനിറങ്ങിയ ബാലിസ്പാലന്‍ രണ്ട് ഓവര്‍ പൂര്‍ത്തിയാകുമ്പോള്‍ 19 റണ്‍സ് നേടിയിരുന്നു. ഇതിനിടെയാണ് മഴയെത്തിയത്, ഇതേതുടര്‍ന്ന് മത്സരം താല്‍ക്കാലികമായി നിര്‍ത്തിവെച്ചു.

മഴ കാരണം മത്സരത്തിലെ ഓവറുകളുടെ എണ്ണം കുറയ്‌ക്കേണ്ട സാഹചര്യമുണ്ടായി. ഇത്തരം സന്ദര്‍ഭങ്ങളില്‍ മറ്റൊരു വിജയലക്ഷ്യം കണക്കാക്കാന്‍ ഡക്ക്വര്‍ത്ത് ലൂയിസ് സ്റ്റേണ്‍ (ഡിഎല്‍എസ്) രീതി ഉപയോഗിക്കേണ്ടതുണ്ട്. അതിനായി ആവശ്യമായ ഡിഎല്‍എസ് ഷീറ്റ് തയാറാക്കി ടീമുകള്‍ക്കും അമ്പയര്‍മാര്‍ക്കും നല്‍കേണ്ടതായിരുന്നു. എന്നാല്‍ ബാലിസ്പാലന്റെ ഗ്രൗണ്ടിലെ പ്രിന്റര്‍ പ്രവര്‍ത്തിക്കാതിരുന്നതോടെ ആവശ്യമായ രേഖ പ്രിന്റ് ചെയ്യാന്‍ സാധിച്ചില്ല. മത്സരത്തിന്റെ നിയമപ്രകാരം ഡിഎല്‍എസ് സംബന്ധിച്ച രേഖ ലഭ്യമല്ലെങ്കില്‍ മത്സരം മുന്നോട്ടുകൊണ്ടുപോകാന്‍ കഴിയില്ല. ഇതോടെ കളി പുനരാരംഭിക്കാനുള്ള സാധ്യത തന്നെ ഇല്ലാതാകുകയായിരുന്നു.

മത്സരത്തിന്റെ ചട്ടങ്ങളില്‍ ഹോം ടീമിന് ആവശ്യമായ സാങ്കേതിക സംവിധാനങ്ങള്‍ ഒരുക്കേണ്ട ഉത്തരവാദിത്തം വ്യക്തമായി വ്യക്തമാക്കിയിട്ടുണ്ട്. ആവശ്യമായ സോഫ്റ്റ്വെയറുള്ള കമ്പ്യൂട്ടര്‍, പ്രവര്‍ത്തനക്ഷമമായ പ്രിന്റര്‍, മതിയായ പേപ്പറും മഷിയും, അത് കൈകാര്യം ചെയ്യാന്‍ കഴിവുള്ള ഒരാള്‍ എന്നിവ മത്സരത്തിന് മുമ്പ് തന്നെ ഒരുക്കിയിട്ടുണ്ടാകണം എന്നാണ് നിയമം.

Also Read: India W vs Thailand W: വനിതാ ഏഷ്യാ കപ്പില്‍ ഇന്ത്യയ്ക്ക് വിജയത്തുടക്കം; തായ്‌ലന്‍ഡിനെ തകര്‍ത്തു

എന്നാല്‍ പ്രിന്റര്‍ പ്രവര്‍ത്തനരഹിതമായതാണ് ബാലിസ്പാലന് വിനയായത്. നിയമപ്രകാരം ആവശ്യമായ ഡിഎല്‍എസ് ഷീറ്റ് നല്‍കാന്‍ കഴിയാത്ത സാഹചര്യത്തില്‍ ഹോം ടീമിന് മത്സരം വിട്ടുകൊടുക്കേണ്ടിവന്നു. ഇതോടെ എഗ്ലിന്റണെ വിജയിയായി സംഘാടകര്‍ പ്രഖ്യാപിക്കുകയായിരുന്നു.

അതേസമയം, മഴയ്ക്ക് ശേഷം ഒരു പന്ത് പോലും എറിയാതെയാണ് എഗ്ലിന്റണ്‍ വിജയം സ്വന്തമാക്കിയെന്നതാണ് ഇതില്‍ ഏറ്റവും അതിശയകരമായ കാര്യം. ബാലിസ്പാലന് മത്സരത്തില്‍ തിരിച്ചെത്താനും വിജയത്തിനായി ശ്രമിക്കാന്‍ പോലും അവസരം ലഭിച്ചില്ല. അഞ്ചാം പ്രീമിയര്‍ ലീഗ് വിജയം സ്വന്തമാക്കാനുള്ള സാധ്യതയിലായിരുന്ന ടീമാണ് ഒരു സാങ്കേതിക തകരാര്‍ കാരണം തോല്‍വി ഏറ്റുവാങ്ങേണ്ടിവന്നത്.

ക്രിക്കറ്റില്‍ സാങ്കേതിക സംവിധാനങ്ങള്‍ക്കും മത്സരച്ചട്ടങ്ങള്‍ക്കും എത്രത്തോളം പ്രാധാന്യമുണ്ടെന്ന് വ്യക്തമാക്കുന്ന സംഭവമായി ഇത് മാറിയിരിക്കുകയാണ്. സാധാരണയായി മഴ കാരണം കളി തടസപ്പെടുമ്പോള്‍ ആരാധകര്‍ പ്രതീക്ഷിക്കുന്നത് ഡിഎല്‍എസ് രീതിയിലൂടെ മത്സരം പുനഃക്രമീകരിക്കുമെന്നാണ്. എന്നാല്‍ ഇവിടെ ഡിഎല്‍എസിന് ആവശ്യമായ രേഖ തയാറാക്കാന്‍ കഴിയാതിരുന്നത് മത്സരത്തിന്റെ ഫലം തന്നെ മാറ്റുകയായിരുന്നു.

English Summary

A cricket team suffered a bizarre defeat after a broken printer prevented the DLS sheet from being printed. The technical issue meant the rain-affected match could not resume under the required rules.