ISL 2024 Kerala Blasters: ആരാധകർക്ക് പുതുവത്സര സമ്മാനം നൽകാൻ ബ്ലാസ്റ്റേഴ്സ്; മത്സരം എപ്പോൾ, എവിടെ കാണാം

Kerala Blasters

കൊച്ചി: ആരാധകർക്ക് പുതുവത്സര സമ്മാനം നൽകാനായി കേരളാ ബ്ലാസ്റ്റേഴ്സ് ഇന്ന് ​ഗ്രൗണ്ടിലേക്ക്. മുഹമ്മദൻസിനെതിരെ ഹോം ​ഗ്രൗണ്ടിൽ നേടിയ വിജയത്തിന്റെ ആത്മവിശ്വാസത്തിലാണ് ബ്ലാസ്റ്റേഴ്സ് ഇന്ന് ബൂട്ടു കെട്ടാനൊരുങ്ങുന്നത്. ജംഷഡ്പൂർ ടാറ്റാ സ്പോർട്സ് കോംപ്ലക്സിൽ രാത്രി 7.30-നാണ് മത്സരം. ആതിഥേയരായ ജംഷഡ്പൂർ എഫ്സിയാണ് എതിരാളികൾ. മുഖ്യപരിശീലകൻ മിക്കേൽ സ്റ്റാറെയ്ക്ക് പകരക്കാരനായി പുതിയ പരിശീലകനെ ഇതുവരെയും കണ്ടെത്താനാകാത്ത സഹപരിശീലകൻ ടി ജി പുരുഷോത്തമന് കീഴിലാണ് ബ്ലാസ്റ്റേഴ്സ് ഇന്നും ഇറങ്ങുക.

മുഹമ്മദൻസ് എഫ്സിയെ എതിരില്ലാത്ത മൂന്ന് ​ഗോളുകൾക്ക് തോൽപ്പിച്ചതിന് പിന്നിൽ ടി ജി പുരുഷോത്തമന്റെ തന്ത്രങ്ങളും ഉണ്ട്.  കൊമ്പന്മാരുടെ ഈ വിജയം ജംഷഡ്പൂരിലും ആവർത്തിക്കുമോ എന്നാണ് ആരാധകർ ഉറ്റ് നോക്കുന്നത്. അതേസമയം, ഐഎസ്എല്ലിൽ 150-ാം മത്സരത്തിനാണ് ജംഷഡ്പൂർ എഫ്സി ഇന്നിറങ്ങുന്നത്. ഹാവിയർ സിവേറിനോ, ഹാവി ഹെർണാണ്ടസ്, മുൻ ബ്ലാസ്റ്റേഴ്സ് താരം ജോർദാൻ മുറെ തുടങ്ങിയവർ ജംഷഡ്പൂർ നിരയിൽ മിന്നും ഫോമിലാണ്. മലയാളി താരം മുഹമ്മദ് സനാനും ഇമ്രാൻ ഖാനും ആതിഥേയരുടെ പ്ലേയിം​ഗ് ഇലവനിൽ ഇടംപിടിച്ചേക്കും. നോവയും ലൂണയും ജംഷഡ്പൂരിന് ഭീഷണി ഉയർത്തുമെന്ന് ഉറപ്പാണ്. ആതിഥേയ ടീമിന്റെ പ്രതിരോധത്തിലെ പാളിച്ചകൾ മുതലെടുത്ത് ജയം സ്വന്തമാക്കാനായിരിക്കും ബ്ലാസ്റ്റേഴ്സിന്റെ ശ്രമം.

ബ്ലാസ്റ്റേഴ്സ് നിരയിൽ ​ഗോൾ മീഷൻ ജീസസ് ജിമിനെസ് കളിക്കില്ല. പരിക്ക് കാരണമാണ് ജീസസ് ജിമിനെസിന് ഇന്നത്തെ മത്സരം നഷ്ടമാകുന്നത്. രണ്ട് മഞ്ഞകാർഡുകൾ കണ്ടെതിനാൽ പ്രതിരോധതാരം ഹോർമിപാമിനും ഇന്നത്തെ മത്സരം നഷ്ടമാകും. ജീസസ് ഹിമിനെസിന് പകരം ക്വാമി പെപ്ര പ്ലേയിം​ഗ് ഇലവനിൽ ഇടംപിടിടച്ചേക്കും. ഹോർമിപാം ബെഞ്ചിലിരിക്കുന്നതോടെ മി​ലോ​സ് ഡ്രി​നി​സി​ച്ചി​ന് കൊമ്പന്മാരുടെ പ്ര​തി​രോ​ധ​ത്തി​ൽ വിയർപ്പൊഴുക്കേണ്ടി വരും. നായകൻ അഡ്രിയാൻ ലൂണയുടെ ഫോമും ബ്ലാസ്റ്റേഴ്സിന് സന്തോഷം പകരുന്നതാണ്. 13 മത്സരങ്ങളിൽ നിന്ന് 14 പോയിന്റുമായി പത്താമതാണ്‌ കേരളാ ബ്ലാസ്റ്റേഴ്സ്.  ജംഷഡ്‌പൂർ എഫ്സി ആകട്ടെ 11 മത്സരങ്ങളിൽ നിന്ന് 18 പോയിന്റുമായി എട്ടാം സ്ഥാനത്തുമാണ്. 2024-ൽ ബ്ലാസ്റ്റേഴ്സിന് ബാഡ് ലക്ക് ആയിരുന്നെങ്കിൽ 2025-ൽ വിജയതീരമണിയാൻ‌ കൊമ്പന്മാർക്ക് സാധിക്കട്ടെ എന്ന പ്രാർത്ഥനയും ആരാധകർക്കുണ്ട്.

കേരളാ ബ്ലാസ്റ്റേഴ്സ്- ജംഷഡ്പൂർ എഫ്സി മത്സരം എങ്ങനെ കാണാനാവും

ഇന്ന് രാത്രി 7.30ന് ജംഷഡ്പൂർ ടാറ്റാ സ്പോർട്സ് കോംപ്ലക്സിലാണ് കേരളാ ബ്ലാസ്റ്റേഴ്സ്- ജംഷഡ്പൂർ എഫ്സി മത്സരം ആരംഭിക്കുക. ഐഎസ്എല്ലിന്റെ ബ്രോഡ്കാസ്റ്റിം​ഗ് അവകാശം സ്വന്തമാക്കിയിരിക്കുന്നത് സ്പോർട്സ് 18 ആണ്. അതുകൊണ്ട് തന്നെ സ്പോർട്സ് 18 1, സ്പോർട്സ് 18 2, സ്പോർട്സ് 18 3 എന്നീ മത്സരം തത്സമയം കാണാം. മലയാളം പ്രേക്ഷകർക്ക് ഏഷ്യാനെറ്റ് പ്ലസ് ചാനൽ വഴിയും മത്സരം ആസ്വദിക്കാം. മലയാളം കമന്ററിയോടെയാണ് ഏഷ്യാനെറ്റ് പ്ലസിലെ ഐഎസ്എൽ സംപ്രേഷണം. ഒടിടി സേവനമുള്ളവർക്ക് ജിയോസിനിമയിലൂടെയും മത്സരം കാണാനാവും. ജിയോ സിനിമ വെബ്സെെറ്റിലും ഐഎസ്എൽ മത്സരങ്ങളുടെ സംപ്രേക്ഷണം ഉണ്ട്.