മലനിരകളുടെ കഠിന വഴിയിലും മെസി തരംഗം; പുതിയ സസ്യത്തിന് ഇതിഹാസത്തിന്റെ പേര്‌

ലയണല്‍ മെസിയോടുള്ള ആദരസൂചകമായി തെക്കന്‍ പെറുവിലെ ആന്‍ഡീസ് മലനിരകളില്‍ കണ്ടെത്തിയ അപൂര്‍വ സസ്യത്തിന് അദ്ദേഹത്തിന്റെ പേരിട്ടു. സെൻട്രൽ, സതേൺ പെറുവിലെ ആൻഡീസ് മലനിരകളിൽ കാണപ്പെടുന്ന ഈ സസ്യത്തിന് ‘സാല്‍വിയ മെസി’ എന്നാണ് പേരിട്ടിരിക്കുന്നത്. ഈ ചെടിയുടെ ഇളം നീലയും വെള്ളയും നിറത്തിലുള്ള പൂക്കൾക്ക് അർജന്റീനയുടെ ദേശീയ ജേഴ്സിയുടെ നിറവുമായി സാമ്യമുണ്ട്. ഈ പുതിയ സസ്യ ഇനത്തെക്കുറിച്ചുള്ള ഒരു അക്കാദമിക് പഠനം ഇപ്പോൾ പ്രസിദ്ധീകരിച്ചിട്ടുണ്ട്. ലാറ്റിൻ ഭാഷയിലെ അന്താരാഷ്ട്ര സസ്യ നാമകരണ നിയമങ്ങളാണ് ഇതിനായി പേരിടാനായി ഉപയോഗിച്ചത്.

അക്കാദമിക് ലോകത്ത് ഇത്തരം ആദരവുകൾ വളരെ അപൂർവ്വമാണ്. ആഗോള സംസ്കാരത്തിൽ ആഴത്തിലുള്ള സ്വാധീനം ചെലുത്തിയ വ്യക്തികൾക്ക് മാത്രമാണ് സാധാരണയായി ഇത്തരം അംഗീകാരം ലഭിക്കാറുള്ളത്. ‘സാല്‍വിയ മെസി’ എന്നാൽ അർത്ഥമാക്കുന്നത് ‘മെസിയുടെ ചെടി’ എന്നാണ്.

‘സാൽവിയ മെസി’ എന്ന സസ്യം മിന്റ് വിഭാഗത്തില്‍ പെട്ടതാണ്. ഇതിന്റെ ഉപവർഗ്ഗങ്ങൾ ആന്റിഓക്‌സിഡന്റ്, ആന്റി-ഇൻഫ്ലമേറ്ററി, ആന്റിസെപ്റ്റിക് ഗുണങ്ങൾക്ക് പേരുകേട്ടവയാണ്.

1.5 മീറ്റർ വരെ വളർച്ച

ഏകദേശം 1.5 മീറ്റർ വരെ ഉയരത്തിൽ വളരാൻ ഇതിന് കഴിയും. മലനിരകളിലെ പാറക്കെട്ടുകളും വരണ്ടതുമായ ചരിവുകളിൽ പോലും അതിജീവിക്കാൻ കഴിയുന്ന സസ്യങ്ങളാണിത്. പെറുവിലെ ദുർഘടമായ ഭൂപ്രകൃതിയിൽ മാത്രം കണ്ടുവരുന്ന ഈ സസ്യം ഭൂമിയിലെ ഏറ്റവും ദുഷ്കരമായ സാഹചര്യങ്ങളെപ്പോലും അതിജീവിക്കുന്നുവെന്നതാണ് പ്രത്യേകത.

സമുദ്രനിരപ്പിൽ നിന്ന് 2,000 മുതൽ 2,400 മീറ്റർ വരെ ഉയരമുള്ള പ്രദേശങ്ങളിലാണ് ഇവ കാണപ്പെടുന്നത്. മറ്റ് പല ജീവജാലങ്ങൾക്കും നിലനിൽക്കാൻ കഴിയാത്ത, നേർത്ത വായുവും കഠിനമായ ഭൂപ്രകൃതിയുമുള്ള ഇടങ്ങളിൽപ്പോലും വളരാൻ ഈ ചെടിക്ക് കഴിയുന്നു എന്നത്, അതിൻ്റെ അസാധാരണമായ അതിജീവനശേഷിയെയാണ് എടുത്തുകാണിക്കുന്നത്.

Also Read: Cristiano Ronaldo: പോര്‍ച്ചുഗല്‍ ജഴ്‌സിയില്‍ ഇനി റൊണാള്‍ഡോയില്ല? സാധ്യതകള്‍ കുറവെന്ന് സഹോദരി

കാലാവസ്ഥാ വ്യതിയാനത്തിന്റെയും കാട്ടുതീയുടെയും ആഘാതങ്ങൾ മൂലം ഈ സസ്യത്തെ ‘വംശനാശഭീഷണി നേരിടുന്ന’വയുടെ കൂട്ടത്തിലാണ് പെടുത്തിയിരിക്കുന്നത്. നാഷണൽ യൂണിവേഴ്സിറ്റി ഓഫ് സാൻ മാർക്കോസിലെ നാച്ചുറൽ ഹിസ്റ്ററി മ്യൂസിയത്തിലെ പോൾ ഗോൺസാലസ്, അർജന്റീനൻ ഗവേഷകനായ റൊളാൻഡോ ഉറിയ, ഹുവാരാംഗോ നേച്ചറിലെ ജീവശാസ്ത്രജ്ഞനായ ജീൻ കാപ്ച-രാമോസ് എന്നിവരുടെ നേതൃത്വത്തിലാണ് ഈ സസ്യത്തെ കണ്ടെത്തുന്നതിനും, പേര് നല്‍കുന്നതിനുമുള്ള ഗവേഷണം നടത്തിയത്.

സമാന ആദരവ് മറ്റ് താരങ്ങള്‍ക്കും

ഫിഫ ലോകകപ്പിലെ ഹീറോയായ കാംബോ വെര്‍ദെയുടെ ഗോള്‍കീപ്പര്‍ വോസീന്യയുടെ പേരിൽ സ്പാനിഷ് ഗവേഷകനായ ജീസസ് ഓർടീയ ഒരു പുതിയ സമുദ്ര ജീവിയെ (marine mollusk) നാമകരണം ചെയ്തിരുന്നു. ജീസസ് ഓർടീയ 2019-ല്‍ കണ്ടെത്തിയ കടലൊച്ചിന്‌ റയൽ മാഡ്രിഡിന്റെയും കോസ്റ്ററിക്കയുടെയും മുൻ ഗോൾകീപ്പറായ കെയ്‌ലർ നവാസിന്റെ പേര് നൽകിയിരുന്നു.

English Summary

A new endangered plant species discovered in Peru has been named Salvia messii after Lionel Messi. Found in the Andes mountains, the plant features light blue and white flowers resembling Argentina’s jersey. It belongs to the mint family and is known for its potential medicinal properties. The plant grows in harsh environments but is currently classified as endangered.