IPL 2025: ഡുപ്ലെസിയിൽ നിന്ന് ഫിൽ സാൾട്ടിലേക്ക് എത്തിയത് ഇങ്ങനെ..! വിശദീകരണവുമായി ആർസിബി
RCB pick Phil Salt over Faf du Plessis: 40 കാരനായ ഫാഫ് ഡു പ്ലെസിസ് ഐപിഎല്ലിൽ ചെന്നൈ സൂപ്പർ കിംഗ്സ്, പൂനെ, ആർസിബി എന്നീ ടീമുകൾക്ക് വേണ്ടി കളിച്ചിട്ടുണ്ട്. 145 ഐപിഎൽ മത്സരങ്ങളിൽ നിന്ന് 35.99 ശരാശരിയിൽ 4,571 റൺസാണ് താരത്തിന്റെ സമ്പാദ്യം.
Phil Salt, Faf du Plessis (Image Credits: PTI)
2025 ഐപിഎൽ സീസണ് മുന്നോടിയായി റോയൽ ചലഞ്ചേഴ്സ് ബെംഗളൂരു നിലനിർത്തിയ താരങ്ങളുടെ പട്ടികയിൽ മുൻനായകൻ ഫാഫ് ഡുപ്ലെസിസ് ഉണ്ടായിരുന്നില്ല. ജിദ്ദയിൽ വച്ച് നടന്ന താരലേലത്തിൽ ആർടിഎം ഓപ്ഷൻ ഉപയോഗിച്ചും താരത്തെ ബെംഗളൂരു നിലനിർത്തിയിരുന്നില്ല. പകരക്കാരനായി എത്തിച്ചത് ഇംഗ്ലണ്ട് ഫിൽ സാൾട്ടിനെയാണ്. ഫാഫ് ഡു പ്ലെസിക്ക് പകരമായി സോൾട്ടിനെ ടീമിൽ എത്തിക്കാനുണ്ടായ കാരണം വിശദീകരിച്ച് വ്യക്തമാക്കിയിരിക്കുകയാണ് ടീം അധികൃതർ. റോയൽ ചലഞ്ചേഴ്സ് ബെംഗളൂരു തങ്ങളുടെ സമൂഹമാധ്യമ അക്കൗണ്ടുകളിലൂടെയാണ് വീഡിയോ പുറത്തുവിട്ടിരിക്കുന്നത്.
ഒരു വിദേശ ഓപ്പണറെ ടീമിലെത്തിക്കാനാണ് ആർസിബി താരലേലത്തിൽ ലക്ഷ്യമിട്ടത്. ക്രിസീൽ നിലയുറപ്പിച്ചു കഴിഞ്ഞാൽ വിദേശതാരങ്ങൾക്ക് 60, 50 അല്ലെങ്കിൽ 40 പന്തിൽ സെഞ്ച്വറി നേടാൻ കഴിയും. ഇക്കാര്യം പലതവണയും പ്രകടനത്തിലൂടെ തെളിയിച്ച വ്യക്തിയാണ് ജോസ് ബട്ലറും ഫിൽ സോൾട്ടും. ഫാഫ് ഡു പ്ലെസിയുടെ പ്രായം കൂടി പരിഗണിച്ചാണ് പകരക്കാരനായി മറ്റൊരു താരത്തെ ടീമിലെത്തിച്ചതെന്നും ആർസിബി അധികൃതർ വ്യക്തമാക്കി.
ഒരു ഇന്നിംഗ്സിൻ്റെ ആദ്യ ഓവറിൽ സ്പിന്നിനെതിരെ കളിക്കുന്ന ബാറ്ററുടെ സ്ട്രെെക്ക് റേറ്റ് ടീമിന് പ്രധാനപ്പെട്ടതാണ്. ടീമിന് ഒരു വിദേശ ഓപ്പണർ അത്യാവശ്യമായിരുന്നു. ഫോം കണ്ടെത്തിയാൽ ഇവർ 60, 50, അല്ലെങ്കിൽ 40 പന്തുകളിൽ സെഞ്ച്വറി നേടും. ജോസ് ബട്ട്ലർ , ഫിൽ സാൾട്ട് എന്നിവർ ഇക്കാര്യം നമുക്ക് മുന്നിൽ പലയാവർത്തി തെളിയിച്ചതാണ്. പവർ ഹിറ്റിംഗ് നടത്തുന്ന ഇന്ത്യൻ ഓപ്പണർമാർ കുറവായതും ഫിൽ സാൾട്ട് എന്ന ഓപ്ഷനിലേക്ക് ഞങ്ങളെ നയിച്ചെന്ന് ബാറ്റിംഗ് കോച്ചായ ദിനേശ് കാർത്തിക് പറഞ്ഞു.
ഇന്ത്യൻ താരങ്ങൾക്കിടയിൽ തുടക്കം മുതലെ ആക്രമിച്ച് കളിക്കുന്ന ഒരു ഓപ്പണർ ഇഷാൻ കിഷനാണ്. എന്നാൽ ഫിൽ സാൾട്ടിന്റെ സ്ഥിരതയാർന്ന പ്രകടനവും സിക്സും ഫോറും നേടാനുള്ള കഴിവും, വിക്കറ്റ് കീപ്പർ- ബാറ്ററാണെന്നും അദ്ദേഹത്തെ ഞങ്ങളോട് അടുപ്പിച്ചു. ഫിൽ സാൾട്ടിൻെറ പ്രകടനം ഉൾപ്പെടെ എടുത്ത് പറഞ്ഞു കൊണ്ടായിരുന്നു വിലയിരുത്തൽ. ഫിൽ സാൾട്ട്, വിൽ ജാക്ക്സ്, രച്ചിൻ രവീന്ദ്ര, ജോസ് ബട്ട്ലർ, ഫാഫ് ഡു പ്ലെസിസ് എന്നിവരായിരുന്നു ഓപ്പണിംഗ് സ്ഥാനത്തേക്ക് പരിഗണിച്ച പേരുകൾ.
11.5 കോടി രൂപയ്ക്കാണ് ആർസിബി ഫിൽ സാൾട്ടിനെ ലേലത്തിലൂടെ സ്വന്തമാക്കിയത്. 40 കാരനായ ഫാഫ് ഡു പ്ലെസിസ് ഐപിഎല്ലിൽ ചെന്നൈ സൂപ്പർ കിംഗ്സ്, പൂനെ, ആർസിബി എന്നീ ടീമുകൾക്ക് വേണ്ടി കളിച്ചിട്ടുണ്ട്. 145 ഐപിഎൽ മത്സരങ്ങളിൽ നിന്ന് 35.99 ശരാശരിയിൽ 4,571 റൺസാണ് താരത്തിന്റെ സമ്പാദ്യം. 96 റൺസാണ് ഏറ്റവും ഉയർന്ന സ്കോർ.
2022-ൽ RCB യുടെ ക്യാപ്റ്റനായതിന് ശേഷം ഡുപ്ലെസിസ് സ്ഥിരതയാർന്ന പ്രകടനമാണ് കാഴ്ചവച്ചത്. ബെംഗളൂരുവിനായി 1,636 റൺസാണ് അദ്ദേഹം അടിച്ചെടുത്തത്. 45 ഇന്നിംഗ്സുകളിൽ 15 അർദ്ധ സെഞ്ച്വറികളും ഉൾപ്പെടുന്നു. കഴിഞ്ഞ സീസണിൽ 438 റൺസുമായി ആർസിബിയെ പ്ലേ ഓഫിൽ എത്തിക്കുന്നതിൽ നിർണായക പങ്കുവഹിക്കാനും താരത്തിന് സാധിച്ചു.
ആർസിബി 2025 സ്ക്വാഡ്
വിരാട് കോലി, രജത് പാട്ടിദാർ, യാഷ് ദയാൽ, ലിയാം ലിവിംഗ്സ്റ്റൺ, ഫിൽ സോൾട്ട്, ജിതേഷ് ശർമ്മ, ജോഷ് ഹേസൽവുഡ്, സുയാഷ് ശർമ്മ, റാസിഖ് ധാർ, ദേവ്ദത്ത് പടിക്കൽ, ഭുവനേശ്വർ കുമാർ, ജേക്കബ് ബെഥൽ, ക്രുണാൽ പാണ്ഡ്യ, ടിം ഡേവിഡ്, സ്വാസ്തിക് ചികാര, സ്വപ്നിൽ സിംഗ്, റൊമാരിയോ ഷെപ്പേർഡ്, ലുങ്കി എൻഗിഡി, മനോജ് ബാൻഡേജ്, നുവാൻ തുഷാര, മോഹിദ് റാത്തി, അഭിനന്ദൻ സിംഗ്.
