India Federation of Germany: ജർമ്മനിയിലെ ഇന്ത്യൻ സംഘടനകൾ ഇനി ഒരു കുടക്കീഴിൽ; ‘ഇന്ത്യാ ഫെഡറേഷൻ ഓഫ് ജർമ്മനി’ യാഥാർത്ഥ്യമായി

ബെർലിൻ: യൂറോപ്പിലെ പ്രവാസി ജനതകളുടെ ചരിത്രത്തിൽ പുതിയൊരു അധ്യായം കുറിച്ച് ‘ഇന്ത്യാ ഫെഡറേഷൻ ഓഫ് ജർമ്മനി’ (India Federation of Germany) ഔദ്യോഗികമായി പ്രവർത്തനം ആരംഭിച്ചു. ജർമ്മനിയിലെ എല്ലാ ഇന്ത്യൻ സമൂഹങ്ങളെയും ഒരുമിച്ച് കൊണ്ടുവന്നുകൊണ്ട്, ആഗോളതലത്തിൽ പ്രവാസികളുടെ കൂട്ടായ ശബ്ദം കൂടുതൽ ശക്തമാക്കാനാണ് ഈ പുതിയ മഹാസഖ്യം ലക്ഷ്യമിടുന്നത്. ജർമ്മനിയിലുടനീളമുള്ള സാംസ്കാരിക, പ്രാദേശിക കൂട്ടായ്മകളെ ഏകോപിപ്പിക്കുന്നതിൽ ഇതൊരു വലിയ നാഴികക്കല്ലായി മാറുമെന്നാണ് പ്രതീക്ഷിക്കുന്നത്. ജർമ്മനിയിലെ 16 ഫെഡറൽ സംസ്ഥാനങ്ങളിലായിട്ടുള്ള നൂറിലധികം ഇന്ത്യൻ അസോസിയേഷനുകളാണ് ഒരൊറ്റ കുടക്കീഴിൽ അണിനിരക്കുന്നത്.

പ്രവാസി സമൂഹത്തിന്റെ ക്ഷേമം, സാംസ്കാരിക കൈമാറ്റം, വിദ്യാർത്ഥികളുടെയും പ്രൊഫഷണലുകളുടെയും തൊഴിൽ-താമസ സുരക്ഷ എന്നിവയ്ക്ക് മുൻഗണന നൽകിക്കൊണ്ടായിരിക്കും ഫെഡറേഷൻ വരും ദിവസങ്ങളിൽ പ്രവർത്തിക്കുകയെന്ന് ഭാരവാഹികൾ വ്യക്തമാക്കി. പുതുതായി രൂപീകരിക്കപ്പെട്ട ഇന്ത്യാ ഫെഡറേഷൻ ഓഫ് ജർമ്മനിയുടെ കണക്കുകൾ പ്രകാരം, നിലവിൽ മൂന്ന് ലക്ഷത്തിലധികം ഇന്ത്യക്കാരാണ് ജർമ്മനിയിൽ സ്ഥിരതാമസമാക്കിയിരിക്കുന്നത്.

ALSO READ: യു.എ.ഇയിൽ പുതിയ ശമ്പള സുരക്ഷാ നിയമം ജൂൺ 1 മുതൽ, ഇനി മുതൽ ശമ്പളം എന്നു കിട്ടും?

ഐടി പ്രൊഫഷണലുകളും ആരോഗ്യപ്രവർത്തകരും വിദ്യാർത്ഥികളുമടങ്ങുന്ന ഈ വലിയ സമൂഹം ജർമ്മൻ സമ്പദ്‌വ്യവസ്ഥയിലേക്ക് പ്രതിവർഷം സംഭാവന ചെയ്യുന്നത് 15 ബില്യൺ യൂറോയാണ് (ഏകദേശം 1.35 ലക്ഷം കോടി രൂപ). ജർമ്മനിയുടെ സാമ്പത്തിക-സാമൂഹിക വളർച്ചയിൽ നിർണ്ണായക പങ്കാണ് ഇന്ത്യൻ ജനതയ്ക്കുള്ളതെന്നാണ് ഈ കണക്കുകൾ വ്യക്തമാക്കുന്നത്.

ചിത്ര വിശ്വനാഥ് എന്ന പെൺ കരം

ഇന്ത്യാ ഫെഡറേഷൻ ഓഫ് ജർമ്മനിയുടെ രൂപീകരണത്തിന് പിന്നിൽ 28 വർഷം നീണ്ട ഒരു സ്ത്രീയുടെ നിശബ്ദ പോരാട്ടത്തിന്റെയും കഠിനാധ്വാനത്തിൻ്റെയും വൈകാരികമായ ഒരു കഥയുണ്ട്. 28 വർഷങ്ങൾക്ക് മുമ്പ്, വലിയ പ്രതീക്ഷകളോടെ ജർമ്മനിയിലേക്ക് പറന്ന ചിത്ര വിശ്വനാഥ് എന്ന യുവതിയാണ് ഈ വിജയഗാഥയിലെ പ്രധാന കണ്ണി. ജർമ്മനിയിലെ അന്താരാഷ്ട്ര മാസ്റ്റേഴ്സ് പ്രോഗ്രാമിന്റെ ഏറ്റവും ആദ്യത്തെ ബാച്ചിലെ വിദ്യാർത്ഥിനിയായാണ് ചിത്ര അവിടെയെത്തുന്നത്.

അന്യരാജ്യത്ത് നേരിടേണ്ടി വന്ന പ്രതിസന്ധികളെെയെല്ലാം അതിജീവിച്ച് അവർ അവിടെ സ്ഥിരതാമസമാക്കി. പിന്നീട്, ജർമ്മനിയിലെ ശക്തമായ ഇന്ത്യൻ സമൂഹത്തിൻ്റെ പിന്തുണയോടെ അവർ പ്രവാസികളെ ഒന്നിപ്പിക്കാനുള്ള ദൗത്യം ഏറ്റെടുത്തു. ചിത്ര വിശ്വനാഥിന്റെയും കൂട്ടരുടെയും നേതൃത്വത്തിലാണ് ജർമ്മനിയിലെ 100-ലധികം അസോസിയേഷനുകളെ ഒരൊറ്റ കുടക്കീഴിൽ കൊണ്ടുവന്ന ഈ പുതിയ മഹാസഖ്യത്തിന് അടിത്തറ പാകിയിരിക്കുന്നത്.

ഇത് വെറുമൊരു സംഘടനയല്ലെന്നും ഇരു രാജ്യങ്ങളും തമ്മിലുള്ള ബന്ധം ശക്തിപ്പെടുത്തുന്നതിനുള്ള ഒരു മഹത്തായ പ്രസ്ഥാനമാണെന്നും സ്ഥാപകർ പറഞ്ഞു. വിദേശകാര്യ മന്ത്രാലയം, ജർമ്മൻ ഫെഡറൽ വിദേശകാര്യ ഓഫീസിന്റെ ഫെഡറൽ വിദേശകാര്യ ഓഫീസ്, ബെർലിനിലെ ഇന്ത്യൻ എംബസി, മ്യൂണിക്കിലെ കോൺസുലേറ്റ് ജനറൽമാർ, ഇരു രാജ്യങ്ങളിലെയും നിരവധി പ്രമുഖ നേതാക്കൾ എന്നിവർ ചേർന്നാണ് സംഘടനയുടെ ഉദ്ഘാടനം പ്രഖ്യാപിച്ചത്.

English Summary:

The India Federation of Germany officially started with Indian communities in Germany together. More than 100 Indian associations, which are spread across 16 federal states in Germany, have become partners in the Federation.