Eid salary : പ്രവാസികൾക്ക് സന്തോഷ വാർത്ത, സ്വകാര്യ മേഖലയിൽ ശമ്പളം നേരത്തെ നൽകും, കർശന നിർദ്ദേശമെത്തി
Oman Labour Ministry Directs Private Sector to Pay March Salaries : പെരുന്നാളിന് മുന്നോടിയായി കുടുംബങ്ങൾക്കുള്ള വസ്ത്രങ്ങളും മറ്റ് അവശ്യസാധനങ്ങളും വാങ്ങാൻ ജീവനക്കാരെ സഹായിക്കുക എന്ന ലക്ഷ്യത്തോടെയാണിത് നടപ്പാക്കുന്നത്.
മസ്കത്ത്: ഈദുൽ ഫിത്തർ ആഘോഷങ്ങൾ കണക്കിലെടുത്ത്, സ്വകാര്യ മേഖലയിലെ ജീവനക്കാർക്ക് മാർച്ച് മാസത്തെ ശമ്പളം നിശ്ചിത സമയത്തിന് മുമ്പായി വിതരണം ചെയ്യാൻ ഒമാൻ തൊഴിൽ മന്ത്രാലയം നിർദ്ദേശം നൽകി. ആഘോഷ വേളയിൽ ജീവനക്കാർക്ക് സാമ്പത്തിക ബുദ്ധിമുട്ടുകൾ ഉണ്ടാകാതിരിക്കാനാണ് മന്ത്രാലയത്തിന്റെ ഈ ഇടപെടൽ.
ഇതനുസരിച്ച് മാർച്ച് മാസത്തെ വേതനം മാർച്ച് 18-നകം ജീവനക്കാരുടെ ബാങ്ക് അക്കൗണ്ടുകളിൽ എത്തിക്കണമെന്നാണ് സ്ഥാപനങ്ങൾക്ക് നൽകിയിരിക്കുന്ന നിർദ്ദേശം. തൊഴിൽ നിയമം അനുസരിച്ച് ഒമാൻ തൊഴിൽ നിയമത്തിലെ വ്യവസ്ഥകൾ പാലിച്ച് കൊണ്ട് തന്നെ വേതനം നൽകുന്നുണ്ടെന്ന് കമ്പനികൾ ഉറപ്പുവരുത്തണം.
Also Read – പ്രവാസികൾ ശ്രദ്ധിക്കണം, ആഭ്യന്തര മന്ത്രാലയത്തിന്റെ പരിശോധനയിൽ പിടിയിലായത് പതിനായിരങ്ങൾ
പെരുന്നാളിന് മുന്നോടിയായി കുടുംബങ്ങൾക്കുള്ള വസ്ത്രങ്ങളും മറ്റ് അവശ്യസാധനങ്ങളും വാങ്ങാൻ ജീവനക്കാരെ സഹായിക്കുക എന്ന ലക്ഷ്യത്തോടെയാണിത് നടപ്പാക്കുന്നത്. ശമ്പള വിതരണത്തിൽ വീഴ്ച വരുത്തുന്ന സ്ഥാപനങ്ങൾക്കെതിരെ കർശന നടപടിയുണ്ടാകുമെന്ന് മന്ത്രാലയം മുന്നറിയിപ്പ് നൽകിയിട്ടുണ്ട്. വേതന സുരക്ഷാ സംവിധാനം വഴി മന്ത്രാലയം ഇക്കാര്യം നിരീക്ഷിക്കും.
നേരത്തെ പൊതുമേഖലയിലും ശമ്പളം നേരത്തെ നൽകുന്നത് സംബന്ധിച്ച സൂചനകൾ പുറത്തുവന്നിരുന്നു. പെരുന്നാൾ അവധി കൂടി പ്രഖ്യാപിക്കുന്നതോടെ വിപണിയിൽ വലിയ ഉണർവുണ്ടാകുമെന്നാണ് പ്രതീക്ഷിക്കുന്നത്.
