Saudi Arabian Airlines : സൗദിയ വിമാനങ്ങളിൽ ഇനി സൗജന്യ വൈ-ഫൈ; 70 വിമാനങ്ങളിൽ അതിവേഗ ഇന്റർനെറ്റ് വരുന്നു
Saudia to Offer Free In-Flight Wi-Fi : 2027 അവസാനത്തോടെ സൗദിയയുടെ മുഴുവൻ വിമാനങ്ങളിലും സൗജന്യ വൈ-ഫൈ സേവനം വ്യാപിപ്പിക്കാനാണ് കമ്പനി ലക്ഷ്യമിടുന്നത്. അത്യാധുനികമായ എൻ.എസ്.ജി സ്കൈവേവ്സ് സിസ്റ്റം വഴിയാണ് ഈ സേവനം പ്രവർത്തിക്കുന്നത്. മീഡിയം എർത്ത് ഓർബിറ്റിലെയും ജിയോസ്റ്റേഷണറി ഓർബിറ്റിലെയും ഉപഗ്രഹങ്ങളെ സംയോജിപ്പിച്ചുള്ള സാങ്കേതിക വിദ്യയായതിനാൽ യാത്രക്കാർക്ക് തടസ്സമില്ലാത്ത ഇന്റർനെറ്റ് ലഭിക്കും.
ജിദ്ദ: വിമാനയാത്രയ്ക്കിടെ തടസ്സമില്ലാത്ത ഇന്റർനെറ്റ് സേവനം നൽകുന്നതിനായി പബ്ലിക് ഇൻവെസ്റ്റ്മെന്റ് ഫണ്ടിന് കീഴിലുള്ള നിയോ എയ്റോസ്പേസ് ഗ്രൂപ്പുമായി സൗദിയ കരാറൊപ്പിട്ടു. മിഡിൽ ഈസ്റ്റിൽ വിമാനത്തിനുള്ളിൽ സൗജന്യ ബ്രോഡ്ബാൻഡ് കണക്റ്റിവിറ്റി നൽകുന്ന ആദ്യ വിമാനക്കമ്പനികളിൽ ഒന്നായി ഇതോടെ സൗദിയ മാറും.
67 നാരോ-ബോഡി എ-320 വിമാനങ്ങളിലും മൂന്ന് വൈഡ്-ബോഡി എ-330 വിമാനങ്ങളിലുമാണ് അതിവേഗ ഇന്റർനെറ്റ് സൗകര്യം ലഭ്യമാക്കുക. 2027 അവസാനത്തോടെ സൗദിയയുടെ മുഴുവൻ വിമാനങ്ങളിലും സൗജന്യ വൈ-ഫൈ സേവനം വ്യാപിപ്പിക്കാനാണ് കമ്പനി ലക്ഷ്യമിടുന്നത്. അത്യാധുനികമായ എൻ.എസ്.ജി സ്കൈവേവ്സ് സിസ്റ്റം വഴിയാണ് ഈ സേവനം പ്രവർത്തിക്കുന്നത്. മീഡിയം എർത്ത് ഓർബിറ്റിലെയും ജിയോസ്റ്റേഷണറി ഓർബിറ്റിലെയും ഉപഗ്രഹങ്ങളെ സംയോജിപ്പിച്ചുള്ള സാങ്കേതിക വിദ്യയായതിനാൽ യാത്രക്കാർക്ക് തടസ്സമില്ലാത്ത ഇന്റർനെറ്റ് ലഭിക്കും.
യാത്രക്കാർക്ക് ലോകോത്തര അനുഭവം
ആഗോള വ്യോമയാന മേഖലയിൽ തങ്ങളുടെ മത്സരക്ഷമത വർധിപ്പിക്കുന്നതിനും യാത്രക്കാർക്ക് മികച്ച ഡിജിറ്റൽ സൗകര്യങ്ങൾ ഒരുക്കുന്നതിനുമാണ് മുൻഗണന നൽകുന്നതെന്ന് സൗദിയ ഗ്രൂപ്പ് സി.ഇ.ഒ ഇബ്രാഹിം അൽഉമർ പറഞ്ഞു. സോഷ്യൽ മീഡിയ ഉപയോഗിക്കുന്നതിനും ഇമെയിലുകൾ അയക്കുന്നതിനും മറ്റ് ഡിജിറ്റൽ ആവശ്യങ്ങൾക്കും വിമാനത്തിനുള്ളിലെ ഈ ഇന്റർനെറ്റ് സേവനം ഏറെ സഹായകമാകും.
ഈ നീക്കത്തിലൂടെ ഡിജിറ്റൽ ഫ്ലൈറ്റ് അനുഭവങ്ങളിൽ സൗദി അറേബ്യയുടെ സ്ഥാനം ആഗോളതലത്തിൽ കൂടുതൽ കരുത്തുറ്റതാകുമെന്ന് കോർപ്പറേറ്റ് കമ്മ്യൂണിക്കേഷൻസ് ഡയറക്ടർ അബ്ദുല്ല അൽശഹ്റാനി വ്യക്തമാക്കി.
