പോസ്റ്റ് ഓഫീസ് പദ്ധതിയോ മ്യൂച്വൽ ഫണ്ടോ; വരുമാനത്തിനും സമ്പാദ്യത്തിനും ഏത് വേണം?

പ്രതീകാത്മക ചിത്രം

സുരക്ഷിതമായ നിക്ഷേപത്തിലൂടെ എല്ലാ മാസവും സ്ഥിരമായ വരുമാനം നേടണോ, അതോ ദീര്‍ഘകാലത്തേക്ക് കൂടുതല്‍ സമ്പാദ്യം ലക്ഷ്യമിടണോ എന്ന കാര്യത്തില്‍ പല നിക്ഷേപകര്‍ക്കും ആശയക്കുഴപ്പം ഉണ്ടാകാറുണ്ട്. പോസ്റ്റ് ഓഫീസ് മാസ വരുമാന പദ്ധതി, അതായത് പിഒഎംഐഎസ്, മ്യൂച്വല്‍ ഫണ്ടുകള്‍ എന്നിവയാണ് ഇതിനായി പരിഗണിക്കാവുന്ന രണ്ട് പ്രധാന മാര്‍ഗങ്ങള്‍. ഇവ രണ്ടും വ്യത്യസ്തമായ ആവശ്യങ്ങള്‍ നിറവേറ്റുന്ന നിക്ഷേപ മാര്‍ഗങ്ങളാണ്. അതിനാല്‍ നിക്ഷേപം തിരഞ്ഞെടുക്കുമ്പോള്‍ ലക്ഷ്യം, റിസ്‌ക് എടുക്കാനുള്ള ശേഷി, എത്രകാലത്തേക്ക് പണം നിക്ഷേപിക്കാനാണ് ഉദ്ദേശിക്കുന്നത് തുടങ്ങിയ കാര്യങ്ങള്‍ പരിഗണിക്കണം.

പോസ്റ്റ് ഓഫീസ് മാസ വരുമാന പദ്ധതി

പോസ്റ്റ് ഓഫീസ് മാസ വരുമാന പദ്ധതി സര്‍ക്കാര്‍ പിന്തുണയുള്ള നിക്ഷേപ പദ്ധതിയാണ്. പദ്ധതിയില്‍ നിക്ഷേപിക്കുന്ന തുകയ്ക്ക് നിശ്ചിത പലിശ ലഭിക്കുകയും അതിന്റെ അടിസ്ഥാനത്തില്‍ എല്ലാ മാസവും വരുമാനം നേടുകയും ചെയ്യാം. നിലവില്‍ പദ്ധതിയുടെ വാര്‍ഷിക പലിശ നിരക്ക് ഏകദേശം 7.4 ശതമാനമാണ്. വിപണിയിലെ ഏറ്റക്കുറച്ചിലുകള്‍ നിക്ഷേപത്തെ നേരിട്ട് ബാധിക്കാത്തതാണ് പദ്ധതിയുടെ പ്രധാന പ്രത്യേകത.

സുരക്ഷിതമായ നിക്ഷേപമാണെങ്കിലും ഉയര്‍ന്ന വരുമാനം ലക്ഷ്യമിടുന്നവര്‍ക്ക് പോസ്റ്റ് ഓഫീസ് മാസ വരുമാന പദ്ധതിക്ക് ചില പരിമിതികളുണ്ട്. പലിശ നിരക്ക് നിശ്ചിതമായതിനാല്‍ വിപണിയുമായി ബന്ധപ്പെട്ട നിക്ഷേപങ്ങളെ അപേക്ഷിച്ച് കൂടുതല്‍ വരുമാനം ലഭിക്കാനുള്ള സാധ്യത കുറവാണ്.

മ്യൂച്വല്‍ ഫണ്ടില്‍ നിക്ഷേപിച്ചാല്‍

മ്യൂച്വല്‍ ഫണ്ടുകള്‍ വിപണിയുമായി ബന്ധപ്പെട്ട നിക്ഷേപങ്ങളാണ്. പ്രത്യേകിച്ച് ഓഹരി അധിഷ്ഠിത മ്യൂച്വല്‍ ഫണ്ടുകള്‍ ദീര്‍ഘകാലത്ത് കൂടുതല്‍ സമ്പാദ്യം സൃഷ്ടിക്കാനുള്ള അവസരം നല്‍കുന്നു. ക്രമമായി പണം നിക്ഷേപിക്കാന്‍ ആഗ്രഹിക്കുന്നവര്‍ക്ക് സിസ്റ്റമാറ്റിക് ഇന്‍വെസ്റ്റ്‌മെന്റ് പ്ലാന്‍ അഥവാ എസ്ഐപി ഉപയോഗിക്കാം. നിക്ഷേപത്തില്‍ നിന്നുള്ള വരുമാനം വീണ്ടും നിക്ഷേപിക്കുന്നതിലൂടെ ദീര്‍ഘകാലത്ത് കൂട്ടുപലിശയുടെ നേട്ടം ലഭിക്കാനും സാധ്യതയുണ്ട്.

Also Read: EPFO Pension: സ്വകാര്യ ജീവനക്കാർക്ക് വിരമിച്ച ശേഷം എത്ര പെൻഷൻ ലഭിക്കും; കണക്കാക്കുന്നത് ഇങ്ങനെ

മ്യൂച്വല്‍ ഫണ്ടില്‍ നിക്ഷേപിച്ച് മാസ വരുമാനം നേടാനും സാധിക്കും. ഇതിനായി സിസ്റ്റമാറ്റിക് വിത്‌ഡ്രോവല്‍ പ്ലാന്‍ അഥവാ എസ്ഡബ്ല്യുപി ഉപയോഗിക്കാം. ഹൈബ്രിഡ് അല്ലെങ്കില്‍ ഡെറ്റ് മ്യൂച്വല്‍ ഫണ്ടുകളില്‍ നിക്ഷേപിച്ച തുകയില്‍ നിന്ന് നിശ്ചിത ഇടവേളകളില്‍ പണം പിന്‍വലിക്കുന്ന രീതിയാണ് എസ്ഡബ്ല്യുപി. എന്നാല്‍ ഇതിലും നിക്ഷേപത്തിന്റെ മൂല്യത്തില്‍ വിപണിയുടെ സ്വാധീനം ഉണ്ടാകാം.

ഏതാണ് തിരഞ്ഞെടുക്കേണ്ടത്

പോസ്റ്റ് ഓഫീസ് മാസ വരുമാന പദ്ധതി പ്രധാനമായും സുരക്ഷിതമായ നിക്ഷേപവും സ്ഥിരമായ മാസ വരുമാനവും ആഗ്രഹിക്കുന്നവര്‍ക്ക് അനുയോജ്യമായ മാര്‍ഗമാണ്. അതേസമയം ദീര്‍ഘകാലത്ത് സമ്പാദ്യം വളര്‍ത്താനും വിപണിയിലെ സാധ്യതകള്‍ പ്രയോജനപ്പെടുത്താനും താല്‍പര്യമുള്ളവര്‍ക്ക് മ്യൂച്വല്‍ ഫണ്ടുകള്‍ പരിഗണിക്കാം.

English Summary

Post Office MIS offers fixed monthly income with low risk, while mutual funds provide the potential for higher long-term returns with market-linked risk. The right option depends on an investor’s financial goals, risk tolerance and investment horizon.