Bank of baroda Recruitment: ഒന്നര ലക്ഷത്തിനടുത്ത് ശമ്പളം, ബാങ്ക് ഓഫ് ബറോഡയില്‍ മാനേജരാകാം, ഉടൻ അപേക്ഷിക്കൂ

Bank Job

തിരുവനന്തപുരം: ബാങ്ക് ഓഫ് ബറോഡയിൽ വിവിധ മാനേജർ തസ്തികകളിലേക്ക് അപേക്ഷ ക്ഷണിച്ചു. ചീഫ് മാനേജർ-ഇൻവെസ്റ്റർ റിലേഷൻസ്, മാനേജർ-ട്രേഡ് ഫിനാൻസ് ഓപ്പറേഷൻസ്, മാനേജർ-ഫോറെക്‌സ് അക്വിസിഷൻ ആൻഡ് റിലേഷൻഷിപ്പ്, സീനിയർ മാനേജർ-ഫോറെക്‌സ് അക്വിസിഷൻ ആൻഡ് റിലേഷൻഷിപ്പ് എന്നീ തസ്തികകളിലേക്കാണ് ഇപ്പോൾ അപേക്ഷകൾ സ്വീകരിക്കുന്നത്. ഉദ്യോഗാർത്ഥികൾക്ക് ഒക്ടോബർ 9 വരെ ഓൺലൈനായി അപേക്ഷ സമർപ്പിക്കാം.

തസ്തികകളും യോഗ്യതകളും

ചീഫ് മാനേജർ-ഇൻവെസ്റ്റർ റിലേഷൻസ് (2 ഒഴിവുകൾ): 30നും 40നും ഇടയിൽ പ്രായമുള്ളവർക്ക് അപേക്ഷിക്കാം. ഇക്കണോമിക്‌സിലോ കൊമേഴ്‌സിലോ ബിരുദം, സിഎ, എംബിഎ, ഐഐഎം സർട്ടിഫിക്കറ്റുകൾ അഭികാമ്യം. ഇൻവെസ്റ്റർ റിലേഷൻസിലോ കോർപ്പറേറ്റ് കമ്മ്യൂണിക്കേഷനിലോ റിസർച്ചിലോ 2 വർഷത്തെ പരിചയമുൾപ്പെടെ 8 വർഷത്തെ ബാങ്കിങ്/ബ്രോക്കറേജ് പരിചയം ആവശ്യമാണ്. ശമ്പളം 1,02,300 – 1,20,940 രൂപ.

മാനേജർ-ട്രേഡ് ഫിനാൻസ് ഓപ്പറേഷൻസ് (14 ഒഴിവുകൾ): 24-34 വയസ്സാണ് പ്രായപരിധി. ബിരുദവും ബാങ്കിങ് മേഖലയിൽ 2 വർഷത്തെ ട്രേഡ് ഫിനാൻസ് ഓപ്പറേഷൻസ് പരിചയവും വേണം. ഐഐബിഎഫ് ഫോറെക്‌സ്, സിഡിസിഎസ്, സിഐടിഎഫ് സർട്ടിഫിക്കറ്റുകളുള്ളവർക്ക് മുൻഗണനയുണ്ട്. ശമ്പളം: 64,820 – 93,960 രൂപ.

Also Read: CBSE Scholarship: ‘സിംഗിള്‍’ പെണ്‍കുട്ടികള്‍ക്കായി സിബിഎസ്ഇ സ്‌കോളര്‍ഷിപ്പ് നല്‍കുന്നു; ആര്‍ക്കൊക്കെ അപേക്ഷിക്കാം?

മാനേജർ-ഫോറെക്‌സ് അക്വിസിഷൻ ആൻഡ് റിലേഷൻഷിപ്പ് (37 ഒഴിവുകൾ): 26-36 വയസ്സാണ് പ്രായപരിധി. ബിരുദവും, എംബിഎ അല്ലെങ്കിൽ പിജിഡിഎം യോഗ്യതയും, 2 വർഷത്തെ ബാങ്കിങ് പരിചയവും 1 വർഷത്തെ ട്രേഡ് ഫിനാൻസ് പരിചയവും വേണം.

സീനിയർ മാനേജർ-ഫോറെക്‌സ് അക്വിസിഷൻ ആൻഡ് റിലേഷൻഷിപ്പ് (5 ഒഴിവുകൾ): 29-39 വയസ്സാണ് പ്രായപരിധി. ബിരുദവും, സെയിൽസ്/മാർക്കറ്റിങ്/ഫിനാൻസ്/ട്രേഡ് ഫിനാൻസ് എന്നിവയിൽ ഫുൾ ടൈം എംബിഎ/പിജിഡിഎം എന്നിവയും, 5 വർഷത്തെ ബാങ്കിങ് പരിചയവും 3 വർഷത്തെ ട്രേഡ് ഫിനാൻസ് പരിചയവും ആവശ്യമാണ്. ശമ്പളം: 85,920 – 1,05,280 രൂപ.

അപേക്ഷിക്കേണ്ട വിധം

അപേക്ഷകർ ബാങ്കിന്റെ ഔദ്യോഗിക വെബ്സൈറ്റായ bankofbaroda.bank.in സന്ദർശിക്കുക. തുടർന്ന് ‘Careers’ എന്ന വിഭാഗത്തിലെ ‘Current Opportunities’ ക്ലിക്ക് ചെയ്ത് അപേക്ഷ സമർപ്പിക്കാവുന്നതാണ്.