Reliance scholarship: രണ്ട് ലക്ഷം രൂപ വരെ നേടാണോ? റിലയൻസ് ഫൗണ്ടേഷൻ സ്കോളർഷിപ്പിന് അപേക്ഷിക്കാം, 5100 പേർക്ക് അവസരം
Apply for the Reliance Foundation Scholarship: റിലയൻസ് ഫൗണ്ടേഷന്റെ സ്ഥാപകയും ചെയർപേഴ്സനുമായ നിത അംബാനി 2022-ൽ അടുത്ത 10 വർഷത്തിനുള്ളിൽ 50,000 വിദ്യാർഥികൾക്ക് സ്കോളർഷിപ്പുകൾ നൽകുമെന്ന് പ്രഖ്യാപിച്ചിരുന്നു.
കൊച്ചി: രാജ്യത്തെ ഏറ്റവും വലിയ സ്വകാര്യ സ്കോളർഷിപ്പ് പദ്ധതിയായ റിലയൻസ് ഫൗണ്ടേഷൻ സ്കോളർഷിപ്പിന് അപേക്ഷ ക്ഷണിച്ചു. 2025-26 അധ്യയന വർഷത്തേക്ക് രാജ്യത്തുടനീളമുള്ള 5100 മികച്ച വിദ്യാർഥികൾക്കാണ് ഈ വർഷം അവസരം ലഭിക്കുക.
സ്കോളർഷിപ്പ് വിവരങ്ങൾ
ബിരുദ വിദ്യാർഥികൾക്ക്: 5,000 ബിരുദ വിദ്യാർഥികൾക്ക് 2 ലക്ഷം രൂപ വരെ സ്കോളർഷിപ്പ് ലഭിക്കും. മെറിറ്റ് അടിസ്ഥാനത്തിലായിരിക്കും തിരഞ്ഞെടുപ്പ്.
ബിരുദാനന്തര ബിരുദ വിദ്യാർഥികൾക്ക്: എൻജിനീയറിങ്, ടെക്നോളജി, ഊർജ്ജം, ലൈഫ് സയൻസസ് തുടങ്ങിയ മേഖലകളിൽ നിന്നുള്ള 100 ബിരുദാനന്തര ബിരുദ വിദ്യാർഥികൾക്ക് 6 ലക്ഷം രൂപ വരെ സ്കോളർഷിപ്പ് ലഭിക്കും.
അപേക്ഷിക്കാൻ യോഗ്യതയുള്ളവർ
ബിരുദ, ബിരുദാനന്തര കോഴ്സുകളുടെ ആദ്യ വർഷ വിദ്യാർഥികൾക്ക് മാത്രമാണ് സ്കോളർഷിപ്പിന് അപേക്ഷിക്കാൻ യോഗ്യത. റിലയൻസ് ഫൗണ്ടേഷന്റെ ഈ പദ്ധതിക്ക് കീഴിൽ വിദഗ്ധരുടെ മാർഗ്ഗനിർദ്ദേശവും, നേതൃത്വ പരിശീലനവും, സാമൂഹിക വികസനത്തിൽ പങ്കാളികളാകാനുള്ള അവസരങ്ങളും ലഭിക്കും.
ശ്രദ്ധിക്കേണ്ട തീയതി
അപേക്ഷകൾ സമർപ്പിക്കാനുള്ള അവസാന തീയതി 2025 ഒക്ടോബർ 4 ആണ്.
റിലയൻസ് ഫൗണ്ടേഷന്റെ സ്ഥാപകയും ചെയർപേഴ്സനുമായ നിത അംബാനി 2022-ൽ അടുത്ത 10 വർഷത്തിനുള്ളിൽ 50,000 വിദ്യാർഥികൾക്ക് സ്കോളർഷിപ്പുകൾ നൽകുമെന്ന് പ്രഖ്യാപിച്ചിരുന്നു. ഇതിന്റെ ഭാഗമായി എല്ലാ വർഷവും 5000 ബിരുദ വിദ്യാർഥികൾക്കും 100 ബിരുദാനന്തര ബിരുദ വിദ്യാർഥികൾക്കും സ്കോളർഷിപ്പ് നൽകിവരുന്നു.
