Kamal Haasan: സിനിമയിൽ നിന്ന് വിരമിക്കുന്നതിനെപ്പറ്റി ആരാധകർ തീരുമാനിക്കും; നല്ല ഒരു സിനിമ ചെയ്യണമെന്നുണ്ടെന്ന് കമൽ ഹാസൻ

സിനിമയിൽ നിന്ന് വിരമിക്കുന്നതിനെപ്പറ്റി ആരാധകർ തീരുമാനിക്കുമെന്ന് കമൽ ഹാസൻ. വിരമിക്കാൻ ആരാധകർ ആവശ്യപ്പെടുന്നതുവരെ താൻ ഇവിടെത്തന്നെയുണ്ടാവും. വിരമിക്കുന്നതിന് മുൻപ് ഒരു മികച്ച ചിത്രം കൂടി അവർക്ക് നൽകണമെന്നുണ്ടെന്നും താരം പറഞ്ഞു. മനോരമ ഹോർത്തൂസ് ഫെസ്റ്റിവലിൽ സംസാരിക്കുകയായിരുന്നു അദ്ദേഹം.

“പുതുമുഖങ്ങൾ സിനിമയിലേക്ക് കടന്നുവരേണ്ടതുണ്ട്. എന്നാൽ, പഴയ ആളുകൾ എപ്പോൾ വിരമിക്കണമെന്ന് പറയേണ്ടത് നിങ്ങൾ പ്രേക്ഷകരാണ്. തന്നോട് ആരും ഇതുവരെ വിരമിക്കാൻ ആവശ്യപ്പെട്ടിട്ടില്ല. വിരമിക്കുന്നതിന് മുൻപ് ഒരു മികച്ച ചിത്രം കൂടി പ്രേക്ഷകർക്ക് സമ്മാനിക്കണം. ഞാൻ മോശം സിനിമകൾ ചെയ്ത സമയത്ത് ഇപ്പോൾ നിർത്തരുതെന്നും നല്ല ഒരു സിനിമ ചെയ്ത ശേഷം ഇടവേളയെടുക്കൂ എന്നും സുഹൃത്തുക്കൾ പറയാറുണ്ടായിരുന്നു. അത്തരം ഒരു സിനിമയ്ക്കായി കാത്തിരിക്കുകയാണ്.”- കമൽ ഹാസൻ പ്രതികരിച്ചു.

Also Read: Manju warrier jayaram movie actress: മഞ്ജുവിന്റെ അനിയത്തി, ജയറാമിന്റെ 5 കസിൻസിൽ ഒരുവൾ! ഓർമ്മയുണ്ടോ ഈ നടിയെ?

മണിരത്നം ഒരുക്കിയ തഗ് ലൈഫ് എന്ന ചിത്രം തൻ്റെ തിരിച്ചുവരവെന്ന് പറയാൻ കഴിയില്ലെന്നും അദ്ദേഹം പറഞ്ഞു. ബോക്സോഫീസിലെ ജയപരാജയങ്ങൾക്കപ്പുറം സിനിമയോടുള്ള തൻ്റെ അഭിനിവേശം തുടരും. വിരമിക്കൽ ബാഹ്യസമ്മർദ്ദങ്ങളാൽ എടുക്കുന്ന തീരുമാനമല്ല, ഒരു കലാകാരൻ്റെ സ്വയം വിലയിരുത്തലാണെന്നും അദ്ദേഹം കൂട്ടിച്ചേർത്തു.

ലോകെഷ് കനകരാജ് സംവിധാനം ചെയ്ത വിക്രം എന്ന സിനിമയാണ് കമൽ ഹാസൻ്റെ അവസാനം ഹിറ്റായ സിനിമ. പിന്നീട് പുറത്തിറങ്ങിയ കൽകി, ഇന്ത്യൻ 2, തഗ് ലൈഫ് എന്നീ സിനിമകളിൽ ബോക്സോഫീസിൽ പരാജയപ്പെട്ടു. ഇന്ത്യൻ 3 ആണ് ഇനി പുറത്തിറങ്ങാനുള്ളത്. 1960ൽ കലത്തൂർ കണ്ണമ്മ എന്ന സിനിമയിലൂടെ അഭിനയജീവിതം ആരംഭിച്ച താരം മലയാള സിനിമകളിലൂടെയാണ് ശ്രദ്ധിക്കപ്പെടുന്നത്. പിന്നീട് തെലുങ്ക്, ഹിന്ദി സിനിമകളിലും താരം അഭിനയിച്ചു. നടൻ എന്നതിനപ്പുറം നിർമ്മാതാവ്, തിരക്കഥാകൃത്ത്, സംവിധായകൻ തുടങ്ങി വിവിധ മേഖലളിൽ തിളങ്ങിയിട്ടുണ്ട്.