Census 2027: രാജ്യത്തെ ആദ്യ ഡിജിറ്റൽ സെന്‍സസ് വരുന്നു, ലിവിങ് ടുഗദർ ദമ്പതികളെയും വിവാഹിതരായി പരിഗണിക്കും

Mritunjay Kumar Narayan

ന്യൂഡൽഹി: രാജ്യത്തെ ആദ്യത്തെ സമ്പൂർണ സെൻസസ് വരുന്നുവെന്ന് സെൻസസ് കമ്മീഷണർ മൃത്യുഞ്ജയ് കുമാർ നാരായൺ. 2027 സെൻസസ് രണ്ട് ഘട്ടമായിട്ടാണ് നടത്തുന്നത്. കേരളത്തിൽ ആദ്യഘട്ട സെൻസ് ജൂണിൽ ആരംഭിക്കുമെന്നും സെൽഫ് എന്യൂമേറേഷന് ജൂൺ 16 മുതൽ 30 വരെ സമയമുണ്ടാകുമെന്നും അദ്ദേഹം വാർത്താ സമ്മേളനത്തിൽ പറഞ്ഞു.

ആദ്യഘട്ടത്തിൽ ഭവന സെൻസസ് ആണ് നടക്കുന്നത്. ജൂലൈ ഒന്ന് മുതൽ മുപ്പത് വരെ ഉദ്യോ​ഗസ്ഥർ നേരിട്ട് വീട്ടിലെത്തി വിവരം ശേഖരിക്കും. ലഭ്യമായ അടിസ്ഥാന സൗകര്യങ്ങൾ, താമസ സൗകര്യങ്ങൾ, ആസ്തി എന്നിവയുമായി ബന്ധപ്പെട്ട വിവരങ്ങളാണ് ശേഖരിക്കുക. ശേഷം, രണ്ടാം ഘട്ടത്തിൽ ജനസംഖ്യ കണക്കെടുപ്പ് നടക്കും. കുടുംബങ്ങളിലെ ജനസംഖ്യാപരമായ വിവരങ്ങൾ, സാമ്പത്തിക നിലവാരം, പ്രത്യുൽപ്പാദന നിരക്ക്, കുടിയേറ്റം തുടങ്ങിയവയുമായി ബന്ധപ്പെട്ട വിവരങ്ങൾ ശേഖരിക്കുന്നതാണ്.

ALSO READ: ബീഹാർ കൗൺസിൽ അംഗത്വം ഒഴിഞ്ഞ് നിതീഷ് കുമാർ; അടുത്ത മുഖ്യമന്ത്രി ആര്?

രണ്ടാം ഘട്ടത്തിലാണ് ജാതി സെൻസസും നടത്തുന്നത്. സെൻസസിൽ ശേഖരിക്കുന്ന വ്യക്തി​ഗത വിവരങ്ങൾ രഹസ്യമായിരിക്കും. വിവരവകാശ നിയമപ്രകാരം ഈ വിവരങ്ങൾ ലഭിക്കുന്നതല്ല. കോടതിയിൽ തെളിവായി ഹാജരാക്കാനും സാധിക്കില്ല. സെൻസസും എസ്ഐആറും തമ്മിൽ ബന്ധമില്ല. ഇനി മുതൽ ലിവിങ് ടു​ഗദർ ദമ്പതികളെയും സെൻസസിൽ വിവാഹിതരായി പരി​ഗണിക്കുന്നതാണ്. സെൻസസ് നടപടികളുടെ ആകെ ചെലവിനായി 11,718.24 കോടി രൂപ കേന്ദ്ര മന്ത്രി സഭ അം​ഗീകരിച്ചിട്ടുണ്ട്.

ഒന്നാം ഘട്ടത്തിനായുള്ള പ്രാഥമിക പരിശോധന എല്ലാ സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും കഴിഞ്ഞ വർഷം നവംബറിൽ നടത്തി. ആദ്യത്തെ ഡിജിറ്റൽ സെൻസസാണിത്. വിവരങ്ങൾ‌ ശേഖരിക്കാൻ പ്രത്യേക മൊബൈൽ ആപ്പും സെൽഫ് ഇന്യൂമറേഷൻ പോർട്ടലും ഒരുക്കും. സെൻസസിനായുള്ള മൊബൈൽ ആപ്പ് 16 ഭാഷകളിൽ ലഭ്യമാകും. എല്ലാ പൗരന്മാരും സെൻസസിൽ പങ്കെടുക്കണമെന്നും വിവരങ്ങൾ കൃത്യമായി നൽകണമെന്നും സെൻസസ് കമ്മീഷണർ പറഞ്ഞു.