LPG storage: പശ്ചിമേഷ്യൻ പ്രതിസന്ധി, 30 ദിവസത്തെ പാചകവാതകം കരുതൽ ശേഖരമായി സൂക്ഷിക്കാൻ കേന്ദ്ര നിർദേശം
India Govt Directs Oil Firms to Maintain 30-Day LPG Stock: രാജ്യത്ത് പെട്രോൾ, ഡീസൽ, എൽപിജി എന്നിവയുടെ മതിയായ ശേഖരമുണ്ടെന്നും പൊതുജനങ്ങൾ ഒട്ടും ആശങ്കപ്പെടേണ്ട സാഹചര്യമില്ലെന്നും സർക്കാർ അറിയിച്ചു. രാജ്യത്തെ എണ്ണ ശുദ്ധീകരണ ശാലകൾ മികച്ച രീതിയിലാണ് പ്രവർത്തിക്കുന്നത്. പാചകവാതക ഉൽപ്പാദനം പ്രതിദിനം ഏകദേശം 92 ടിഎംടി (ഏകദേശം 52,000 ടൺ) എന്ന എക്കാലത്തെയും ഉയർന്ന നിരക്കിലാണ്.
ന്യൂഡൽഹി: പശ്ചിമേഷ്യയിലെ ആഭ്യന്തര സംഘർഷങ്ങളും ഹോർമുസ് കടലിടുക്കിലെ ഉപരോധവും കടുക്കുന്ന പശ്ചാത്തലത്തിൽ, രാജ്യത്തിന്റെ ഇന്ധന സുരക്ഷ ഉറപ്പാക്കാൻ അടിയന്തര നടപടികളുമായി കേന്ദ്ര സർക്കാർ. നിലവിലുള്ള വാണിജ്യ സംഭരണത്തിന് പുറമെ, കുറഞ്ഞത് 30 ദിവസത്തേക്കാവശ്യമായ പാചകവാതക (എൽപിജി) ശേഖരം അടിയന്തരമായി കരുതിവെക്കാൻ പൊതുമേഖലാ എണ്ണക്കമ്പനികളായ ഇന്ത്യൻ ഓയിൽ കോർപ്പറേഷൻ (IOC), ഭാരത് പെട്രോളിയം (BPCL), ഹിന്ദുസ്ഥാൻ പെട്രോളിയം (HPCL) എന്നിവയ്ക്ക് സർക്കാർ നിർദേശം നൽകി. പെട്രോളിയം മന്ത്രാലയം ജോയിന്റ് സെക്രട്ടറി സുജാത ശർമയാണ് വെള്ളിയാഴ്ച ഇതുസംബന്ധിച്ച ഉത്തരവ് പുറപ്പെടുവിച്ചത്.
ഗൾഫ് പ്രതിസന്ധിയും ഇന്ത്യയുടെ ആശങ്കയും
ഇന്ത്യയുടെ ഊർജ ആവശ്യങ്ങളുടെ വലിയൊരു പങ്ക് ആശ്രയിക്കുന്നത് ഗൾഫ് മേഖലയെയാണ്. ഹോർമുസ് കടലിടുക്കിലെ ഇപ്പോഴത്തെ പ്രതിസന്ധി ഇന്ത്യയുടെ ഇറക്കുമതിയെ സാരമായി ബാധിച്ചിട്ടുണ്ട്. ഇന്ത്യക്കാവശ്യമായ 90 ശതമാനം പാചകവാതകവും, 40 ശതമാനം ക്രൂഡ് ഓയിലും, 65 ശതമാനം പ്രകൃതിവാതകവും ഗൾഫ് രാജ്യങ്ങളിൽ നിന്നാണ് എത്തിക്കുന്നത്.
ALSO READ:കർണാടകയിൽ ജാതി സെൻസസ്; രാജിക്ക് മുമ്പ് ‘പണികൊടുത്ത്’ സിദ്ധരാമയ്യ
340 മെട്രിക് ടൺ എൽപിജിയുമായി വന്ന എട്ടോളം കപ്പലുകളെ ഇതിനകം ഇന്ത്യയിലെത്തിക്കാൻ സാധിച്ചെങ്കിലും, ഇത് കേവലം 11 ദിവസത്തേക്കുള്ള ഇന്ധന ലഭ്യത മാത്രമാണ് ഉറപ്പാക്കുന്നത്. നിലവിൽ 11 ഇന്ത്യൻ കപ്പലുകൾ പേർഷ്യൻ ഗൾഫ് മേഖലയിൽ കുടുങ്ങിക്കിടക്കുകയാണെന്ന് വിദേശകാര്യ മന്ത്രാലയം വ്യക്തമാക്കി.
ആശങ്ക വേണ്ടെന്ന് സർക്കാർ; ഉത്പാദനം റെക്കോർഡ് നിലയിൽ
രാജ്യത്ത് പെട്രോൾ, ഡീസൽ, എൽപിജി എന്നിവയുടെ മതിയായ ശേഖരമുണ്ടെന്നും പൊതുജനങ്ങൾ ഒട്ടും ആശങ്കപ്പെടേണ്ട സാഹചര്യമില്ലെന്നും സർക്കാർ അറിയിച്ചു. രാജ്യത്തെ എണ്ണ ശുദ്ധീകരണ ശാലകൾ മികച്ച രീതിയിലാണ് പ്രവർത്തിക്കുന്നത്. പാചകവാതക ഉൽപ്പാദനം പ്രതിദിനം ഏകദേശം 92 ടിഎംടി (ഏകദേശം 52,000 ടൺ) എന്ന എക്കാലത്തെയും ഉയർന്ന നിരക്കിലാണ്. നിലവിൽ വിതരണത്തിൽ യാതൊരു തടസ്സവുമില്ല. ക്രൂഡ് ഓയിൽ സംഭരണ ശേഷി വർധിപ്പിക്കാനുള്ള നടപടികളും പുരോഗമിക്കുകയാണ് എന്ന് പെട്രോളിയം മന്ത്രാലയം ജോയിന്റ് സെക്രട്ടറി സുജാത ശർമ അറിയിച്ചു. കാർഷിക ആവശ്യങ്ങൾ വർധിച്ചതും സ്വകാര്യ പമ്പുകളെ അപേക്ഷിച്ച് പൊതുമേഖലാ പമ്പുകളിൽ വില കുറവായതും കാരണം പെട്രോൾ, ഡീസൽ വിൽപനയിൽ വലിയ വർധനവ് ഉണ്ടായിട്ടുണ്ട്. എന്നാൽ പൊതുജനങ്ങൾ പരിഭ്രാന്തരായി ഇന്ധനം വാങ്ങിക്കൂട്ടരുതെന്ന് സർക്കാർ അഭ്യർഥിച്ചു.
പൂഴ്ത്തിവെപ്പിനെതിരെ കർശന നടപടി; പുതിയ സ്രോതസ്സുകൾ തേടുന്നു
പ്രതിസന്ധി ഘട്ട മുതലെടുപ്പ് നടത്തി ഇന്ധനം പൂഴ്ത്തിവെക്കുന്നതും കള്ളക്കടത്ത് നടത്തുന്നതും തടയാൻ പ്രത്യേക സ്ക്വാഡുകളെ നിയോഗിക്കാൻ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും കേന്ദ്ര സർക്കാർ നിർദേശം നൽകിയിട്ടുണ്ട്. ഗൾഫ് പ്രതിസന്ധി തുടരുന്ന സാഹചര്യത്തിൽ, ഇന്ധന ഇറക്കുമതിക്കായി നോർവേ ഉൾപ്പെടെയുള്ള മറ്റ് പകരക്കാരായ വിപണികളെ ആശ്രയിക്കാനുള്ള നയതന്ത്ര ശ്രമങ്ങളും ഇന്ത്യ ഊർജിതമാക്കി.
English Summary
Amid escalating tensions in the Middle East and disruptions in the Strait of Hormuz, the Indian government has directed state-run oil companies to maintain a minimum 30-day emergency buffer stock of liquefied petroleum gas (LPG). While the Ministry of Petroleum assured citizens that current domestic fuel supplies remain stable and record-high production is underway, it has ordered strict vigilance against hoarding and is exploring alternative import destinations like Norway to safeguard energy security.
