Manusmriti : എൽഎൽബി സിലബസിൽ മനുസ്മൃതി; നിർദ്ദേശം ഔദ്യോഗികമായി തള്ളി ഡൽഹി യൂണിവേഴ്സിറ്റി

Manusmriti For LLB Students (Image Courtesy - Social Media)

എൽഎൽബി വിദ്യാർത്ഥികൾക്കുള്ള സിലബസിൽ മനുസ്മൃതി ഉൾപ്പെടുത്തണമെന്ന നിർദ്ദേശം തള്ളി ഡൽഹി യൂണിവേഴ്സിറ്റി. നിർദ്ദേശം അനുയോജ്യമല്ലെന്ന് ഡൽഹി യൂണിവേഴ്സിറ്റി വൈസ് ചാൻസിലർ യോഗേഷ് സിംഗ് പറഞ്ഞു. ഇന്ത്യൻ അറിവുകൾ പഠിപ്പിക്കാൻ മറ്റ് പുസ്തകങ്ങളുണ്ടെന്നും അദ്ദേഹം പറഞ്ഞു. പ്രസ് ട്രസ്റ്റ് ഓഫ് ഇന്ത്യക്ക് നൽകിയ അഭിമുഖത്തിലായിരുന്നു യോഗേഷ് സിംഗിൻ്റെ പ്രതികരണം.

വെള്ളിയാഴ്ച നടന്ന അക്കാദമിക് കൗൺസിൽ മീറ്റിംഗിനിടെ സിലബസിൽ മനുസ്മൃതി ഉൾപ്പെടുത്തണമെന്ന നിർദ്ദേശം തള്ളിയതായി അദ്ദേഹം പ്രതികരിച്ചു. നേരത്തെ തന്നെ ഈ വിഷയത്തിൽ അദ്ദേഹം നിലപാട് വ്യക്തമാക്കിയിരുന്നതാണ്. ഒരുപറ്റം അധ്യാപകർ എതിർപ്പറിയിച്ചതിനാൽ സിലബസിൽ മനുസ്മൃതി ഉൾപ്പെടുത്തില്ലെന്ന് അദ്ദേഹം അറിയിച്ചിരുന്നു. എൽഎൽബി സെമസ്റ്റർ ഒന്നിലും ആറിലും മനുസ്മൃതി പഠിപ്പിക്കണമെന്നായിരുന്നു നിർദ്ദേശം.

Also Read : Dhruv Rathee: ലോക്‌സഭ സ്പീക്കറുടെ മകളെ അപകീർത്തിപ്പെടുത്തി; ധ്രുവ് റാഠിക്കെതിരേ പോലീസ് കേസ്

മനുസ്മൃതിയുടെ രണ്ട് വിശദീകരണ പുസ്തകങ്ങളാണ് നിർദ്ദേശത്തിലുണ്ടായിരുന്നത്. ജിഎൻ ഝായുടെ ‘മേധാതിഥിയുടെ വ്യാഖ്യാനത്തോടു കൂടിയ മനുസ്മൃതി’ എന്ന പുസ്തകവും ടി കൃഷ്ണസ്വാമി അയ്യരിൻ്റെ ‘മനുസ്മൃതി വിവരണം- സ്മൃതിചന്ദ്രിക’ എന്ന പുസ്തകവുമാണ് സിലബസിൽ ഉൾപ്പെടുത്തണമെന്ന് ആവശ്യപ്പെട്ടിരുന്നത്. എന്നാൽ, വൈസ് ചാൻസിലറിൻ്റെ നേതൃത്വത്തിലുള്ള സമിതി ഈ നിർദ്ദേശം അനുയോജ്യമല്ലെന്ന നിലപാടെടുത്തു.

മനുസ്മൃതി സ്ത്രീവിരുദ്ധവും ന്യൂനപക്ഷ വിരുദ്ധവുമാണെന്നും പുരോഗമന വിദ്യാഭ്യാസ സംസ്കാരത്തിൽ അത് പഠിപ്പിക്കാൻ പാടില്ലെന്നുമായിരുന്നു ചില അധ്യാപകർ നിലപാടെടുത്തത്. ഇടത് വിദ്യാർത്ഥി സംഘടനകൾ ഈ നിർദ്ദേശത്തിനിടെ വ്യാപക പ്രതിഷേധവും സംഘടിപ്പിച്ചിരുന്നു. സംഭവത്തിൽ ബിജെപിക്കെതിരെ കോൺഗ്രസ് നേതൃത്വവും രംഗത്ത് വന്നു. നിർദ്ദേശം ഭരണഘടനാവിരുദ്ധമാണെന്ന് വിമർശിച്ച് കോൺഗ്രസിൻ്റെ എസ്‌സി വിഭാഗം സംഘടന പ്രതിഷേധ പരിപാടി പ്രഖ്യാപിക്കുകയും എൻഎസ്‌യുവിൻ്റെ നേതൃത്വത്തിൽ സർവകലാശാലയിൽ പ്രതിഷേധം സംഘടിപ്പിക്കുകയും ചെയ്തു. ഇതിന് പിന്നാലെയാണ് വൈസ് ചാൻസിലർ തൻ്റെ നിലപാടറിയിച്ചത്.