Kerala Election 2026: പൊതുയോഗങ്ങള് പാടില്ല, പുറത്തുനിന്നുള്ളവര് മണ്ഡലം വിടണം; പരസ്യ പ്രചാരണം കഴിഞ്ഞാല് പാലിക്കേണ്ട നിയന്ത്രണങ്ങള് പുറത്ത്
Kerala election campaigning to end on April 7: പരസ്യ പ്രചാരണം നാളെ അവസാനിക്കും. പരസ്യ പ്രചാരണം അവസാനിച്ചതിനു ശേഷം പാലിക്കേണ്ട നിയന്ത്രണങ്ങള് പുറപ്പെടുവിച്ചിട്ടുണ്ട്. വോട്ടെടുപ്പ് അവസാനിക്കുന്ന സമയത്തിന് 48 മണിക്കൂര് മുമ്പ് നിയന്ത്രണങ്ങള് പ്രാബല്യത്തില് വരും. ഈ സമയം പൊതുയോഗങ്ങള് സംഘടിപ്പിക്കാന് അനുവദിക്കില്ല. നിയന്ത്രണങ്ങള് എങ്ങനെയാണെന്ന് നോക്കാം.
തിരുവനന്തപുരം: നിയമസഭ തിരഞ്ഞെടുപ്പിന്റെ പരസ്യ പ്രചാരണം നാളെ വൈകിട്ട് ആറു മണിക്ക് അവസാനിക്കും. പരസ്യ പ്രചാരണം അവസാനിച്ചതിനു ശേഷം പാലിക്കേണ്ട നിയന്ത്രണങ്ങള് പുറത്തുവിട്ടിട്ടുണ്ട്. വോട്ടെടുപ്പ് അവസാനിക്കുന്ന സമയത്തിന് 48 മണിക്കൂര് മുമ്പ് നിയന്ത്രണങ്ങള് പ്രാബല്യത്തില് വരും. ഈ സമയം പൊതുയോഗങ്ങള് സംഘടിപ്പിക്കാന് അനുവദിക്കില്ല. പൊതുയോഗങ്ങള് സംഘടിപ്പിക്കുകയോ, പങ്കെടുക്കുകയോ ചെയ്താല് നടപടി സ്വീകരിക്കും.
ഘോഷയാത്രകള്, നാടകങ്ങള്, ജാഥകള്, സംഗീത പരിപാടികള് തുടങ്ങിയ പ്രചാരണ രീതികളും അനുവദിക്കില്ല. വോട്ടര്മാരെ ആകര്ഷിക്കുന്ന മറ്റ് വിനോദ പരിപാടികളും ഈ കാലയളവില് നിരോധിച്ചിട്ടുണ്ട്. ടിവി, ചലച്ചിത്രം, അല്ലെങ്കില് സമാനമായ മറ്റ് മാധ്യമങ്ങള് വഴി തിരഞ്ഞെടുപ്പ് സംബന്ധമായ കാര്യങ്ങള് പ്രദര്ശിപ്പിക്കാന് പാടില്ല.
റേഡിയോ വഴിയുള്ള പ്രചാരണങ്ങളും അനുവദിക്കില്ല. വോട്ടെടുപ്പ് നടക്കുന്ന ദിവസവും, അതിന്റെ തലേന്നും രാഷ്ട്രീയ പരസ്യങ്ങള് പത്രങ്ങളില് പ്രസിദ്ധീകരിക്കുന്നതിന് മീഡിയ സര്ട്ടിഫിക്കേഷന് ആന്ഡ് മോണിറ്ററിങ് കമ്മിറ്റിയുടെ മുന്കൂര് അനുമതി വേണം. വോട്ടെടുപ്പ് നടക്കുന്ന മണ്ഡലത്തിലെ വോട്ടര്മരല്ലാത്ത, പുറത്തുനിന്ന് എത്തിയ രാഷ്ട്രീയ പ്രവര്ത്തകര്, ഭാരവാഹികള് എന്നിവര് പ്രചാരണം അവസാനിക്കുമ്പോള് മണ്ഡലം വിട്ടുപോകേണ്ടതാണ്.
ഏപ്രില് ഒമ്പതിനാണ് വോട്ടെടുപ്പ്. വോട്ടെടുപ്പ് അവസാനിക്കുന്നതിന് 48 മണിക്കൂര് മുമ്പ് പരസ്യപ്രചാരണം അവസാനിപ്പിക്കണം. തുടര്ന്നുള്ള സമയം നിശബ്ദ പ്രചാരണത്തിന്റേതാണ്. മൈക്ക് കെട്ടിയുള്ള പ്രചാരണങ്ങളോ, പ്രകടനങ്ങളോ ഈ സമയം അനുവദിക്കില്ല.
