Kerala Rain Alert: എല്ലാ ജില്ലക്കാർക്കും മഴ പ്രതീക്ഷിക്കാം…. പക്ഷെ ചൂട് കുറയുമോ?

Rain Alert (4)

തിരുവനന്തപുരം: കേരളത്തിലെ എല്ലാ ജില്ലകളിലും ഇന്ന് നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഇന്ന് എല്ലാ ജില്ലകളിലും ​ഗ്രീൻ അലർട്ടാണ് ഉള്ളത്. നാളെയും ഇതേ അവസ്ഥ തന്നെയാണ് ഉള്ളത്. പിന്നീട് മഴ തെക്കൻ ജില്ലകളിലേക്ക് ചുരുങ്ങുന്നതായും മുന്നറിയിപ്പിൽ വ്യക്തമാക്കുന്നു. കടൽമാർഗം എത്തുന്ന ഈർപ്പമുള്ള കാറ്റിന്റെ സ്വാധീനഫലമായി മധ്യ-തെക്കൻ കേരളത്തിൽ ഇടിയോടുകൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷകർ അറിയിച്ചതായി വെതർമാൻ കേരള റിപ്പോർട്ട് ചെയ്യുന്നു. ഇനി വരും ദിവസങ്ങളിൽ തിരുവനന്തപുരം മുതൽ തൃശ്ശൂർ വരെയുള്ള ജില്ലകളിൽ മഴ ലഭിക്കാനാണ് സാധ്യത. കൊച്ചി, തൊടുപുഴ, കോന്നി തുടങ്ങിയ മേഖലകളിൽ രാവിലെ മുതൽ ഇടയ്ക്കിടെ മഴയ്ക്ക് സാധ്യതയുണ്ട്.

ഉച്ചയ്ക്കും വൈകുന്നേരത്തോടും കൂടി മഴ ശക്തമാകാൻ സാധ്യതയുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. മധ്യ-തെക്കൻ ജില്ലകളിൽ മഴ ലഭിക്കുമ്പോൾ മലപ്പുറം ഉൾപ്പെടെയുള്ള വടക്കൻ ജില്ലകളിൽ മഴയുടെ സാധ്യത കുറവായിരിക്കും. വടക്കൻ കേരളത്തിൽ ഇടവിട്ട് ആകാശം മേഘാവൃതമായിരിക്കുമെങ്കിലും ചൂടിന് കാര്യമായ കുറവുണ്ടായേക്കില്ല.

Also Read – കുറ്റ്യാടിയിൽ ജനറേറ്റർ തകരാർ; മലബാർ മേഖലയിൽ വൈദ്യുതി നിയന്ത്രണത്തിന് സാധ്യത

സംസ്ഥാനത്ത് പൊതുവേ താപനില 28°C മുതൽ 30°C വരെ ആയിരിക്കും. കൊച്ചി, ആലപ്പുഴ എന്നിവിടങ്ങളിൽ ചൂട് തുടരുമെങ്കിലും മഴ ലഭിക്കുന്നതോടെ നേരിയ ആശ്വാസം അനുഭവപ്പെടും. മലയോര മേഖലകളിൽ താപനില താരതമ്യേന കുറവായിരിക്കും. കടലിൽ നിന്നുള്ള കാറ്റ് ശക്തമായി കരയിലേക്ക് വീശുന്നതും മേഘങ്ങൾ രൂപപ്പെടാൻ അനുകൂലമായ സാഹചര്യവുമാണ് നിലവിൽ മഴയ്ക്ക് വഴിയൊരുക്കുന്നത്.

ജാഗ്രത നിർദ്ദേശം

• ഉച്ചയ്ക്ക് ശേഷമുള്ള സമയങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണം.
• മലയോര മേഖലകളിൽ കാറ്റും ഇടിയും ശക്തമാകാൻ സാധ്യതയുണ്ട്.
• ഇടിമിന്നൽ സമയത്ത് തുറസ്സായ സ്ഥലങ്ങളിൽ നിൽക്കുന്നത് ഒഴിവാക്കുക.
• ഇലക്ട്രോണിക് ഉപകരണങ്ങളുടെ ഉപയോഗത്തിൽ നിയന്ത്രണം ഏർപ്പെടുത്തുക.
• വേനൽച്ചൂടിന് താല്ക്കാലിക ശമനമേകാൻ ഈ മഴ സഹായിക്കുമെന്നാണ് പ്രതീക്ഷിക്കുന്നത്.