Narendra Modi: പ്രധാനമന്ത്രി ഈ മാസം 23ന് തിരുവനന്തപുരത്ത്; തലസ്ഥാന വികസന പദ്ധതി പ്രഖ്യാപനം നടത്തും
Narendra Modi In Thiruvananthapuram: പ്രധാനമന്ത്രി നരേന്ദ്ര മോദി തിരുവനന്തപുരത്ത്. ജനുവരി 23നാണ് അദ്ദേഹം തലസ്ഥാനത്തെത്തുക.
നരേന്ദ്ര മോദി
പ്രധാനമന്ത്രി നരേന്ദ്രമോദി ഈ മാസം 23ന് തിരുവനന്തപുരത്തെത്തും. രാവിലെ 10.30ന് തിരുവനന്തപുരത്തെത്തുന്ന പ്രധാനമന്ത്രി രണ്ട് മണിക്കൂറാവും ഇവിടെ ചിലവഴിക്കുക. നാല് ട്രെയിനുകളുടെ ഉദ്ഘാടനം നിർവഹിക്കുന്ന പ്രധാനമന്ത്രി തലസ്ഥാന വികസന പദ്ധതി പ്രഖ്യാപനം നടത്തുകയും ചെയ്യും.
കിഴക്കേക്കോട്ട പുത്തരിക്കണ്ടം മൈതാനിയിലാണ് പ്രധാനമന്ത്രി പങ്കെടുക്കുന്ന പരിപാടികൾ. റെയിൽവേയും ബിജെപിയും സംഘടിപ്പിക്കുന്ന പരിപാടികളിൽ മോദി തുടർച്ചയായി പങ്കെടുക്കും. രാവിലെ 10.45 മുതൽ 11.20 വരെയാണ് റെയിൽവേയുടെ പരിപാടി. ഈ പരിപാടിയിൽ വച്ച് നാല് ട്രെയിനുകളുടെയും വിവിധ റെയിൽവേ പദ്ധതികളുടെയും ഉദ്ഘാടനം നിർവഹിക്കും. തുടർന്ന് അതേ വേദിയിൽ തന്നെ ബിജെപി സംഘടിപ്പിക്കുന്ന പരിപാടിയിലും പ്രധാനമന്ത്രി പങ്കെടുക്കും. ആദ്യമായി ബിജെപി ഭരണം നേടിയ തിരുവനന്തപുരം കോർപ്പറേഷന് വേണ്ടിയുള്ള തലസ്ഥാന വികസന പദ്ധതി പ്രഖ്യാപനവും പ്രധാനമന്ത്രി ഈ ചടങ്ങിൽ വച്ച് നടത്തും. 12.40ഓടെ പരിപാടികൾ അവസാനിപ്പിച്ച് പ്രധാനമന്ത്രി ചെന്നൈയിലേക്ക് പോകും.
ഇന്ന് പ്രധാനമന്ത്രി നരേന്ദ്രമോദി അഞ്ച് അമൃത് ഭാരത് ട്രെയിനുകൾ രാജ്യത്തിന് സമർപ്പിക്കുകയാണ്. പശ്ചിമ ബംഗാളില് നിന്നും അസമില് നിന്നുമുള്ള ട്രെയിനുകളാണ് ഇന്ന് ഫ്ലാഗ് ഓഫ് ചെയ്യുക. പശ്ചിമ ബംഗാളിലെ ഹൂഗ്ലിയിൽ നിന്നുള്ളതാണ് മൂന്ന് ട്രെയിനുകൾ. ഇതിനൊപ്പം ബംഗാളിൽ 830 കോടി രൂപയുടെ വികസനപദ്ധതികളും പ്രധാനമന്ത്രി ഉദ്ഘാടനം ചെയ്യും. അസമിൽ നിന്ന് രണ്ട് ട്രെയിനുകളുണ്ട്. ഹൗറ-ആനന്ദ് വിഹാര് ടെര്മിനല്, സീല്ഡ-ബനാറസ്, സന്ത്രാഗച്ചി-താംബരം എന്നിവയാണ് പശ്ചിമ ബംഗാളിന് ലഭിക്കുന്ന അമൃത് ഭാരത് ട്രെയിനുകള്. കാമാഖ്യ-റോഹ്തക്, ദിബ്രുഗഡ്-ലഖ്നൗ (ഗോമതി നഗര്) എന്നിവയാണ് അസമിൽ നിന്നുള്ള വന്ദേഭാരത് ട്രെയിനുകൾ. ആയിരം കിലോമീറ്ററിന് അഞ്ഞൂറ് രൂപയാണ് അമൃത് ഭാരതിലെ ടിക്കറ്റ് നിരക്ക്.
