Pravasi Bhadratha: പ്രവാസിയാണോ? നാട്ടിൽ സംരംഭം തുടങ്ങാൻ പണം പ്രശ്നമാകില്ല

പ്രവാസജീവിതം അവസാനിപ്പിച്ച് നാട്ടിൽ സംരംഭം തുടങ്ങാൻ ആ​ഗ്രഹിക്കുന്നവർക്ക് ധനസഹായം നൽകുന്ന കേരള സർക്കാർ പദ്ധതിയാണ് പ്രവാസി ഭദ്രത. കോവിഡ് കാലത്ത് ജോലി നഷ്ടപ്പെട്ട് തിരിച്ചെത്തിയ പ്രവാസികളെ സ​ഹായിക്കാൻ ആരംഭിച്ചതാണെങ്കിലും നിലവിലും പ്രവാസികൾക്ക് പുതിയ സംരംഭങ്ങൾ തുടങ്ങാൻ ഈ പദ്ധതി സഹായകരമാണ്. പ്രവാസി ഭദ്രതയെ കുറിച്ച് കൂടുതൽ വിവരങ്ങൾ അറിഞ്ഞാലോ….

പേൾ, മൈക്രോ, മെ​ഗാ എന്നിങ്ങനെ മൂന്ന് തലങ്ങളിലാണ് പ്രവാസി ഭദ്രത പദ്ധതി പ്രവർത്തിക്കുന്നത്. കുടുംബശ്രീയുമായി ചേർന്നാണ് പേൾ നടപ്പിലാക്കുന്നത്. കുടുംബശ്രീ അം​ഗങ്ങളോ അവരുടെ കുടുംബാം​ഗങ്ങളോ ആയ പ്രവാസികൾക്കാണ് മുൻ​ഗണന. 2 ലക്ഷം രൂപ വരെ പലിശ രഹിത വായ്പകൾ അനുവദിക്കുന്നതാണ്. രണ്ട് വർഷത്തിനുള്ളിൽ തുല്യ ഗഡുക്കളായി തിരിച്ചടയ്ക്കേണ്ടതുണ്ട്.

ALSO READ: ഗര്‍ഭിണികള്‍ ഇതറിഞ്ഞോ? സര്‍ക്കാര്‍ വഹിക്കും എല്ലാ ചെലവും, കൂടെ ധനസഹായവും

ചെറുസംരംഭങ്ങൾ തുടങ്ങാൻ ആ​ഗ്രഹിക്കുന്നവർക്ക് വേണ്ടിയുള്ളതാണ് മൈക്രോ. കെഎസ്എഫഇ വഴിയാണ് നടപ്പിലാക്കുന്നത്. 5 ലക്ഷം രൂപ വരെയുള്ള വായ്പകൾ, വായ്പാ ഘടകത്തിന്റെ 25% മുതൽ മൂലധന സബ്‌സിഡി പരമാവധി 1 ലക്ഷം രൂപ വരെ, ആദ്യത്തെ 4 വർഷത്തേക്ക് 3% നിരക്കിൽ പലിശ സബ്‌വെൻഷൻ തുടങ്ങിയവയാണ് പ്രത്യേകതകൾ.

വലിയ സംരംഭങ്ങൾ തുടങ്ങാൻ ആ​ഗ്രഹിക്കുന്നവർക്ക് വേണ്ടിയുള്ളതാണ് പ്രവാസി ഭദ്രത മൈക്രോ. കെ‌എസ്‌ഐ‌ഡി‌സി വഴിയുള്ള മെഗാ സംരംഭത്തിന് 25 ലക്ഷം രൂപ മുതൽ 2 കോടി രൂപ വരെ വായ്പ നൽകും. 8.25% മുതൽ 8.75% വരെ പലിശ നിരക്കിലാണ് വായ്പകൾ. നോർക്ക-റൂട്ട്സ് ആദ്യ 4 വർഷത്തേക്ക് 3.25% മുതൽ 3.75% വരെ പലിശ ആനുകൂല്യങ്ങൾ നൽകും.