Veena George : സുരക്ഷ വീഴ്ച, KSU പ്രതിഷേധം അതിരുവിട്ടു; മന്ത്രി വീണാ ജോർജിന് പരിക്ക്

കണ്ണൂർ : കെ എസ് യു പ്രതിഷേധത്തിനിടെ ആരോഗ്യമന്ത്രി വീണ ജോർജിന് പരിക്ക്. കണ്ണൂർ റെയിൽവെ സ്റ്റേഷനിൽ എത്തിയ മന്ത്രിയെ കരിങ്കൊടി കാണിച്ചുള്ള പ്രതിഷേധം അതിരുവിടുകയായിരുന്നു. കഴുത്തിനും കൈക്കും പരിക്കേറ്റ മന്ത്രിയെ ഉടൻ തന്നെ ആശുപത്രിയിലേക്ക് മാറ്റി. പോലീസ് ഒരുക്കേണ്ട സുരക്ഷയിൽ വീഴ്ചയുണ്ടായതിന് പിന്നാലെയാണ് കെ എസ് യു പ്രവർത്തകർ മന്ത്രിയുടെ അരികിലേക്ക് പ്രതിഷേധമുണ്ടായത്. ആരോഗ്യ മന്ത്രിക്കൊപ്പം സ്പീക്കർ എ എൻ ഷംസീറുമുണ്ടായിരുന്നു. പരിക്കേറ്റ മന്ത്രിയെ ഐസിയുവിലേക്ക് പ്രവേശിപ്പിച്ചുയെന്ന് സിപിഎം നേതാക്കൾ അറിയിച്ചു.

കണ്ണൂരിൽ വിവിധ പരിപാടികൾക്കാണ് ആരോഗ്യമന്ത്രിയെത്തിയത്. കണ്ണൂരിൽ എത്തിയപ്പാടെ മന്ത്രിക്കെതിരെ വ്യാപകമായ കരിങ്കൊടി പ്രതിഷേധമാണ് ഉയർന്നത്. എകെജി ആശുപത്രിക്ക് സമീപം മന്ത്രിയുടെ വാഹനം യൂത്ത് ലീഗ് പ്രവർത്തകർ തടഞ്ഞിരുന്നു. തുടർന്ന് തിരികെ പോകാനായി റെയിൽവെ സ്റ്റേഷനിലേക്കെത്തിയപ്പോഴാണ് കെ എസ് യു പ്രവർത്തകർ കരിങ്കൊടി പ്രതിഷേധവുമായി എത്തിയത്. സമരക്കാർ മന്ത്രിയെ ആക്രമിച്ചുയെന്നാണ് സ്പീക്കർ എ എൻ ഷംസീർ മാധ്യമങ്ങളോട് പറഞ്ഞത്