Coffee farming: കാപ്പി കർഷകർക്ക് ആശ്വാസമായി വേനൽമഴ; ഇക്കുറി മികച്ച വിളവെടുപ്പ് പ്രതീക്ഷയിൽ കർഷകർ

Coffee

ഉപ്പുതറ: ഹൈറേഞ്ചിലെ കാപ്പി കർഷകർക്ക് ആശ്വാസമായി വേനൽമഴ. വിളവെടുപ്പ് പൂർത്തിയായതിന് തൊട്ടുപിന്നാലെ മഴ പെയ്തത് ഇക്കുറി ഉത്പാദനം വർദ്ധിക്കാൻ കാരണമാകുമെന്ന പ്രതീക്ഷയിലാണ് കർഷകർ. കഴിഞ്ഞ വർഷത്തെ തിരിച്ചടികളിൽ നിന്നും കരകയറാൻ ഈ കാലാവസ്ഥാ മാറ്റം സഹായിക്കുമെന്നാണ് വിലയിരുത്തൽ.

കഴിഞ്ഞ സീസണിൽ വിളവെടുപ്പ് നടന്നുകൊണ്ടിരിക്കെ മഴ പെയ്തത് കർഷകർക്ക് വലിയ സാമ്പത്തിക നഷ്ടമുണ്ടാക്കിയിരുന്നു. കുരു പറിച്ചെടുക്കുന്നതിന് മുൻപേ ചെടികൾ പൂവിട്ടതോടെ വിളവെടുപ്പ് തടസ്സപ്പെട്ടു. പൂക്കൾ കൊഴിഞ്ഞുപോകാതിരിക്കാൻ വിളവെടുപ്പ് വേണ്ടെന്ന് വെച്ചതോടെ പാകമായ കാപ്പിക്കുരു പഴുത്ത് താഴെ വീണ് നശിക്കുകയായിരുന്നു.

പ്രതീക്ഷയോടെ പുതിയ സീസൺ

ഈ വർഷം വിളവെടുപ്പ് പൂർണ്ണമായും അവസാനിച്ച ശേഷമാണ് മഴ എത്തിയത് എന്നത് കർഷകർക്ക് അനുഗ്രഹമായി. നിലവിൽ ചെടികൾ സമൃദ്ധമായി പൂത്തിട്ടുണ്ട്. ചെറിയ രീതിയിൽ കായ്‌കൾ വന്നുതുടങ്ങി. വരും ദിവസങ്ങളിൽ ഒന്നോ രണ്ടോ മഴ കൂടി ലഭിച്ചാൽ കായ് ഫലം ഇരട്ടിയാകും. ഉത്പാദനത്തിൽ പ്രതീക്ഷയുണ്ടെങ്കിലും വിപണിയിലെ വിലയിടിവ് കർഷകരെ ആശങ്കയിലാക്കുന്നുണ്ട്. നിലവിൽ കാപ്പിക്കുരുവിന് കിലോയ്ക്ക് 200 രൂപയിൽ താഴെയാണ് വില. ഉത്പാദനം കുറഞ്ഞിട്ടും വില കുറയുന്നത് കർഷകർക്ക് തിരിച്ചടിയാണ്. എന്നാൽ പുതിയ സീസൺ എത്തുന്നതോടെ വിലയിൽ വർദ്ധനമുണ്ടാകുമെന്നാണ് കർഷകരുടെ പ്രതീക്ഷ.

സമ്മിശ്ര കൃഷി നടത്തുന്ന ഹൈറേഞ്ചിലെ കർഷകർക്ക് കാപ്പിപ്പൂക്കൾ നൽകുന്ന മനോഹരമായ കാഴ്ചയ്ക്ക് പുറമെ, ഈ മഴ ഏലം ഉൾപ്പെടെയുള്ള മറ്റ് നടുതല കൃഷികൾക്കും വലിയ ഗുണം ചെയ്യും.