Twenty 20 Joins NDA: കേരള രാഷ്ട്രീയത്തിൽ വൻ ട്വിസ്റ്റ്! ട്വന്റി ട്വന്റി എൻഡിഎയിലേക്ക്; ഔദ്യോഗിക പ്രഖ്യാപനം പ്രധാനമന്ത്രിയുടെ സാന്നിധ്യത്തിൽ
Twenty 20 Joins NDA: ഒരു സംരംഭകൻ എന്ന നിലയിൽ പതിനായിരങ്ങൾക്ക് തൊഴിൽ നൽകുന്ന സാബു ജേക്കബ് എൻഡിഎയ്ക്കൊപ്പം ചേരുന്നത് കേരളത്തിന്റെ വികസനത്തിന് അത്യാവശ്യമാണെന്ന് അദ്ദേഹം കൂട്ടിച്ചേർത്തു.
തിരുവനന്തപുരം: കേരള രാഷ്ട്രീയത്തിൽ നിർണ്ണായക നീക്കം. കിറ്റക്സ് എം.ഡി. സാബു ജേക്കബിന്റെ നേതൃത്വത്തിലുള്ള ട്വന്റി ട്വന്റി എൻഡിഎയുടെ ഭാഗമാകുന്നു. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറാണ് ഇക്കാര്യം ഔദ്യോഗികമായി അറിയിച്ചത്.
വെള്ളിയാഴ്ച തിരുവനന്തപുരത്ത് പ്രധാനമന്ത്രി നരേന്ദ്ര മോദി പങ്കെടുക്കുന്ന വൻ ജനറൽ മീറ്റിംഗിൽ വെച്ച് സഖ്യം സംബന്ധിച്ച ഔദ്യോഗിക പ്രഖ്യാപനമുണ്ടാകും. ജനങ്ങളുടെ പ്രശ്നങ്ങൾ പരിഹരിക്കുന്ന വികസന രാഷ്ട്രീയമാണ് ട്വന്റി ട്വന്റിയുടേതെന്നും അവർ മുന്നണിയുടെ ഭാഗമാകുന്നത് വലിയ സന്തോഷമാണെന്നും രാജീവ് ചന്ദ്രശേഖർ പറഞ്ഞു.
ഒരു സംരംഭകൻ എന്ന നിലയിൽ പതിനായിരങ്ങൾക്ക് തൊഴിൽ നൽകുന്ന സാബു ജേക്കബ് എൻഡിഎയ്ക്കൊപ്പം ചേരുന്നത് കേരളത്തിന്റെ വികസനത്തിന് അത്യാവശ്യമാണെന്ന് അദ്ദേഹം കൂട്ടിച്ചേർത്തു. എൽഡിഎഫിന്റെയും യുഡിഎഫിന്റെയും പരാജയപ്പെട്ട സാമ്പത്തിക നയങ്ങൾക്കെതിരെ ജനം എൻഡിഎയ്ക്ക് വലിയ പിന്തുണ നൽകുമെന്നും അദ്ദേഹം വാർത്താ സമ്മേളനത്തിൽ വ്യക്തമാക്കി.
എന്തുകൊണ്ട് ഈ സഖ്യം ശ്രദ്ധേയമാകുന്നു?
കിഴക്കമ്പലം മോഡൽ വികസനത്തിലൂടെ ശ്രദ്ധേയമായ ട്വന്റി ട്വന്റി ബിജെപി നയിക്കുന്ന എൻഡിഎയുമായി കൈകോർക്കുന്നത് വരാനിരിക്കുന്ന തിരഞ്ഞെടുപ്പിൽ വലിയ ചലനങ്ങൾ സൃഷ്ടിക്കും. എൽഡിഎഫ് ഭരണത്തിനെതിരെയുള്ള പോരാട്ടത്തിൽ ഈ സഖ്യം നിർണ്ണായകമാകുമെന്നാണ് ബിജെപിയുടെ കണക്കുകൂട്ടൽ.
