Breakfast: രാവിലെ 8 മണിക്ക് മുമ്പ് കഴിച്ചാൽ ആയുസ്സ് വർദ്ധിക്കുമോ? ഇങ്ങനെയുമുണ്ട് ചില ഗുണങ്ങൾ

പ്രതീകാത്മക ചിത്രം

ആരോഗ്യകരമായ ജീവിതശൈലിയിൽ ഭക്ഷണത്തിൻ്റെ ഗുണമേന്മ പോലെതന്നെ പ്രധാനമാണ് അത് കഴിക്കുന്ന സമയവും. ‘പ്രഭാതഭക്ഷണം രാജാവിനെപ്പോലെ കഴിക്കണം’ എന്ന ചൊല്ല് നമ്മൾ കേട്ടിട്ടുണ്ട്. എന്നാൽ കൃത്യം രാവിലെ 8 മണിക്ക് പ്രഭാതഭക്ഷണം കഴിക്കുന്നത് ഹൃദയാരോഗ്യത്തിനും ഉപാപചയ പ്രവർത്തനങ്ങൾക്കും ഏറെ ഗുണകരമാണെന്ന് നിങ്ങൾക്കറിയാമോ? കൃത്യസമയത്ത് പ്രഭാതഭക്ഷണം കഴിക്കുന്നത് കൊണ്ടുള്ള ഗുണങ്ങൾ എന്തെല്ലാമെന്ന് പരിശോധിക്കാം….

8 മണിക്ക് ഭക്ഷണം കഴിക്കുന്നതുകൊണ്ടുള്ള ഗുണങ്ങൾ

ഹൃദയാരോഗ്യം മെച്ചപ്പെടുത്തുന്നു: രാവിലെ നേരത്തെ പ്രഭാതഭക്ഷണം കഴിക്കുന്നത് ഹൃദയസംബന്ധമായ അസുഖങ്ങൾ വരാനുള്ള സാധ്യത കുറയ്ക്കുന്നു. വൈകി ഭക്ഷണം കഴിക്കുന്നത് രക്തസമ്മർദ്ദം വർദ്ധിപ്പിക്കാനും ഹൃദയത്തിന് അമിത ജോലിഭാരം നൽകാനും കാരണമായേക്കാം.

ഉപാപചയ പ്രവർത്തനം: ശരീരത്തിലെ മെറ്റബോളിസം കൃത്യമായി നടക്കാൻ രാവിലെ നേരത്തെയുള്ള ഭക്ഷണം സഹായിക്കുന്നു. ഇത് ഭക്ഷണത്തിലെ പോഷകങ്ങളെ ഊർജ്ജമാക്കി മാറ്റാൻ ശരീരത്തെ പ്രാപ്തമാക്കുന്നു.

പ്രമേഹ നിയന്ത്രണം: കൃത്യസമയത്ത് ഭക്ഷണം കഴിക്കുന്നത് ഇൻസുലിൻ്റെ അളവ് നിയന്ത്രിക്കാൻ സഹായിക്കുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് കൂടുന്നത് തടയുകയും ടൈപ്പ്-2 പ്രമേഹ സാധ്യത കുറയ്ക്കുകയും ചെയ്യുന്നു.

ശരീരഭാരം കുറയ്ക്കും: രാവിലെ 8 മണിക്ക് ഭക്ഷണം കഴിക്കുന്നവർക്ക് പകൽ സമയത്ത് അമിതമായ വിശപ്പ് അനുഭവപ്പെടാറില്ല. ഇത് ജങ്ക് ഫുഡുകളോ അമിത ഭക്ഷണമോ ഒഴിവാക്കാൻ സഹായിക്കുന്നു, തൽഫലമായി ശരീരഭാരം നിയന്ത്രണവിധേയമാകുന്നു.

ALSO READ: പച്ചക്കറി ആവിയിൽ പുഴുങ്ങുന്നതോ തിളപ്പിക്കുന്നതോ നല്ലത്? കൂടുതൽ ആരോഗ്യം ഇത്

ശ്രദ്ധിക്കുക….

രാത്രി ഭക്ഷണത്തിന് ശേഷം കുറഞ്ഞത് 12 മണിക്കൂർ എങ്കിലും കഴിഞ്ഞു വേണം പ്രഭാതഭക്ഷണം കഴിക്കാൻ. അതായത് രാത്രി 8 മണിക്ക് അത്താഴം കഴിക്കുന്നവർക്ക് രാവിലെ 8 മണി മികച്ച സമയമാണ്.

സമയം പോലെ തന്നെ ഭക്ഷണത്തിലെ പോഷകങ്ങളും പ്രധാനമാണ്. പ്രോട്ടീനും നാരുകളും  അടങ്ങിയ ഭക്ഷണം തിരഞ്ഞെടുക്കുക.

നമ്മുടെ ശരീരത്തിൻ്റെ ‘ബയോളജിക്കൽ ക്ലോക്കിന്’ അനുസരിച്ച് പ്രവർത്തിക്കുന്നത് ദഹനപ്രക്രിയ എളുപ്പമാക്കും. പ്രഭാതഭക്ഷണം ഒഴിവാക്കുന്നതോ വൈകി കഴിക്കുന്നതോ ദീർഘകാലാടിസ്ഥാനത്തിൽ ആരോഗ്യപ്രശ്നങ്ങൾക്ക് കാരണമായേക്കാം.