Asia Cup 2025: സഞ്ജുവിനോട് ഏറെനേരം സംസാരിച്ച് ഗൗതം ഗംഭീർ; ടീമിൽ നിന്ന് ഒഴിവാക്കുന്നു എന്ന സൂചനയോ?
Sanju Samson And Gautam Gambhir: സഞ്ജു സാംസണോട് ദീർഘമായി സംസാരിച്ച് ഗൗതം ഗംഭീർ. ഇതോടെ സഞ്ജു ഏഷ്യാ കപ്പിൽ കളിച്ചേക്കില്ലെന്നാണ് സൂചന.
ഏഷ്യാ കപ്പിൽ സഞ്ജു സാംസൺ കളിക്കുമോ ഇല്ലയോ എന്ന ചോദ്യം ഹോട്ട് ടോപ്പിക്കായി തുടരുകയാണ്. അതിനുള്ള മറുപടി ലഭിക്കണമെങ്കിൽ ഈ മാസം 10 ആവണം. ഇന്ത്യ ഏഷ്യാ കപ്പിൽ ആദ്യ മത്സരം കളിക്കുക ഈ മാസം 10നാണ്. സഞ്ജു ഉണ്ടാവില്ലെന്ന് തന്നെയാണ് ലഭിക്കുന്ന വിവരങ്ങൾ. (Image Credits- PTI)
കഴിഞ്ഞ ദിവസങ്ങളിൽ നടന്ന പരിശീലന സെഷനുകളിൽ വളരെ കുറച്ച് സമയം മാത്രമാണ് സഞ്ജു ഉൾപ്പെട്ടത്. ടീമിലെ മറ്റൊരു വിക്കറ്റ് കീപ്പറായ ജിതേഷ് ശർമ്മ കീപ്പിങ്, ബാറ്റിങ് ഡ്രില്ലുകൾ ഏറെ സമയം നടത്തുകയും ചെയ്തു. ഇതോടെയാണ് ജിതേഷാവും കളിക്കുകയെന്നത് ഏറെക്കുറെ ഉറപ്പായത്.
ഇതിനോടൊപ്പം പരിശീലകൻ ഗൗതം ഗംഭീറിൻ്റെ പെരുമാറ്റവും സഞ്ജുവിൻ്റെ ഒഴിവാക്കലിനെ സൂചിപ്പിക്കുന്നുണ്ട്. പരിശീലന സെഷനിടെ സഞ്ജുവിനെ മാറ്റിനിർത്തി ഗംഭീർ ഏറെസമയം സംസാരിച്ചിരുന്നു. ഇതിലൂടെ ടീമിൽ നിന്ന് ഒഴിവാക്കുന്നത് എന്തുകൊണ്ടെന്ന കാരണം പറയുകയായിരുന്നു എന്നാണ് അഭ്യൂഹം.
നേരത്തെ തന്നെ സഞ്ജു ഏഷ്യാ കപ്പിൽ കളിക്കാനിടയില്ലെന്ന സൂചനകളുണ്ടായിരുന്നു. ടീം പ്രഖ്യാപിച്ചത് മുതൽ മുഖ്യ സെലക്ടർ അജിത് അഗാർക്കറും സൂര്യകുമാർ യാദവുമൊക്കെ പരോക്ഷമായി ശുഭ്മൻ ഗിൽ ആവും ഓപ്പൺ ചെയ്യുക എന്ന് സൂചിപ്പിച്ചിരുന്നു. ഇത് പിന്നീട് ഉറപ്പിക്കുകയും ചെയ്തു.
ഇന്നാണ് ഏഷ്യാ കപ്പ് മത്സരങ്ങൾ ആരംഭിക്കുക. ആദ്യ മത്സരത്തിൽ അഫ്ഗാനിസ്ഥാൻ ഹോങ്കോങിനെ നേരിടും. അബുദാബിയിലാണ് മത്സരം. നാളെ, സെപ്തംബർ 10ന് ഇന്ത്യയും യുഎഇയും തമ്മിൽ മത്സരിക്കും. രാത്രി എട്ട് മണിക്ക് ദുബായ് രാജ്യാന്തര സ്റ്റേഡിയത്തിലാണ് മത്സരം നടക്കുക.
