Coconut Oil Price: പുതുവർഷത്തിൽ വെളിച്ചെണ്ണ തിളങ്ങും; വിലയിൽ ഞെട്ടിക്കുന്ന മാറ്റമോ?
Coconut Oil Price in Kerala: തമിഴ്നാട്, കർണാടക സംസ്ഥാനങ്ങളിൽ വരും ദിവസങ്ങളിൽ കൊപ്ര മാർക്കറ്റിൽ കൂടുതലായി എത്തുന്നതോടെ വില ഇനിയും കുറയാൻ സാദ്ധ്യതയുണ്ട്. 2026ൽ വെളിച്ചെണ്ണ വിപണി കുതിച്ചുയരുമെന്നും ഒരു വിഭാഗം പറയുന്നു.
വില കൂടിയും കുറഞ്ഞും ഈ വർഷം മലയാളികളെ ഞെട്ടിച്ചവരിൽ മുൻപന്തിയിലാണ് വെളിച്ചെണ്ണയുടെ സ്ഥാനം. ഓണക്കാലത്ത് അഞ്ഞൂറ് കടന്ന വില നിലവിൽ ഒരു ലിറ്ററിന് ഏകദേശം 350 രൂപയിൽ എത്തി നിൽക്കുകയാണ്. 2026ൽ ഇനി എന്ത് സംഭവിക്കുമെന്ന ആകാംക്ഷയിലാണ് ഓരോരുത്തരും.
പുതുവർഷത്തിൽ വെളിച്ചെണ്ണ വില മൂന്നൂറിൽ താഴെയാകുമെന്നാണ് ഒരു വിഭാഗത്തിന്റെ പ്രവചനം. തമിഴ്നാട്, കർണാടക സംസ്ഥാനങ്ങളിൽ തേങ്ങ ഉത്പാദനം വർദ്ധിച്ചതും ഇറക്കുമതി കൊപ്ര ധാരാളം മാർക്കറ്റിൽ എത്തിയതുമാണ് നിലവിൽ വെളിച്ചെണ്ണ വില കുത്തനെ കുറയാൻ കാരണമായത്.
തമിഴ്നാട്, കർണാടക സംസ്ഥാനങ്ങളിൽ വരും ദിവസങ്ങളിൽ കൊപ്ര മാർക്കറ്റിൽ കൂടുതലായി എത്തുന്നതോടെ വില ഇനിയും കുറയാൻ സാദ്ധ്യതയുണ്ടെന്നും അവർ ചൂണ്ടിക്കാട്ടുന്നു. വെളിച്ചെണ്ണ വിലയോടൊപ്പം തേങ്ങ വിലയിലും വലിയ കുറവ് സംഭവിച്ചേക്കും. നിലവിൽ 80 രൂപയ്ക്കു മുകളിൽ വരെയെത്തിയ തേങ്ങയുടെ ചില്ലറ വില 53-60 രൂപയായിട്ടുണ്ട്.
അതേസമയം, 2026ൽ വെളിച്ചെണ്ണ വിപണി കുതിച്ചുയരുമെന്നും ഒരു വിഭാഗം പറയുന്നു. 2025നും 2035നും ചർമസംരക്ഷണ വ്യവസായത്തിലെ ഏറ്റവും വേഗത്തിൽ വളരുന്ന വിഭാഗങ്ങളിലൊന്നായി വെളിച്ചെണ്ണ ഉൽപന്നങ്ങൾ മാറുമെന്നാണ് സൂചന. 2025ൽ ആഗോള വെളിച്ചെണ്ണ മോയ്സ്ചറൈസിങ് ക്രീമുകളുടെ വിപണിയുടെ മൂല്യം 2,352.1 ദശലക്ഷം ഡോളറായിരുന്നുവെന്നാണ് റിപ്പോർട്ട്.
2026 - 2036 വരെ ആഗോള വെളിച്ചെണ്ണ മോയ്സ്ചറൈസിങ് ക്രീമുകളുടെ വിപണി വലിയ വളർച്ച കൈവരിച്ചേക്കും. 2035 ആകുമ്പോഴേക്കും വിപണി മൂല്യം മൂന്നിരട്ടിയായി ഉയരുമെന്നാണ് പ്രതീക്ഷിക്കുന്നത്. (Image Credit: Getty Images)
